Na Sote Votovotoa Kei na Qaravi Kalou

A DARA na sote vaka oqo na tui kei Varanise o Louis IX. A vukei Sir Thomas More na mataqali sote oqo ni se itabagone. E vakavuna me dau yadra tiko kina me rauta e 19 se 20 na aua ena dua na siga ena vica vata na vula ni vulica tiko na veika vakalawa. E kilai tale ga ni a dau dara voli ga na nona sote vaka oqo o More ena nona bula. A kune ni a dara tiko na sote votovotoa o Thomas Becket, na Ajibisovi ni Canterbury, ena gauna a labati kina ena valenilotu e Canterbury. Na cava eratou tautauvata kina na le tolu na turaga oqo? Eratou vakararawataka na yagodratou ena nodratou dara na sote votovotoa.

A caka na sote votovotoa oqori mai na vutinime qai dau daramaki e loma me votivoti kina na yago ni yacaraka na sote, me logalogaca kina o koya e dara. Na mataqali sote oqo e dau qasiva na kutu. A kainaki ni dau dara na nona sote votovotoa o Thomas Becket kei na kena tarausese se isuluiloma e caka tale ga ena vutinimanumanu me yacova “ni sa qasiva na kutu.” Ni oti na ika16 ni senitiuri, sa dau darami ena so na gauna na sote e caka ena waya vakavotona matailalai qai momoto. Na sote oqo e vakavuna me logalogaca sara ga kina o koya e dara.

E kaya e dua na ivolavosa ni inaki ni sote votovotoa, me vaka ga na veisala tale e so e dau vakararawataki kina na yago, oya me “vakamalumalumutaka na gagadre ca ni yago, me rawa kina ni vakamua e dua ina veika vakayalo kei na ivakarau ni bula e vakamarautaka na Kalou.” Era sega wale ga ni dara na sote votovotoa o ira na dau vakuai ira mai na gagadre ni yagodra, era dau dara tale ga o ira na sega ni vakaitavi ena veika vakalotu, me vakataki ira na vakaitutu ena matanitu. Ena gauna tale ga oqo era dau dara na sote votovotoa e so na matalotu.

E vakamarautaka beka na Kalou e dua na tamata e dara na sote votovotoa se na nona dau vakararawataka tiko na yagona me kua ni vakaceguya nona gagadre vakayago? Ena sega ni gadrevi vua e dua me muria na ivalavala vaka oqo me rawa ni qai qarava kina na Kalou. A sega sara mada ga ni vakadonuya na yapositolo o Paula ‘na kena vakararawataki na yago.’ (Kolosa 2:​23)a Na kena veibasai ga, eda vakamarautaka na Kalou ena noda qara na kilaka me baleti koya kei na noda vulica vagumatua na nona Vosa da qai bulataka.

[iVakamacala e ra]

[iTaba ni Credit Line ena tabana e 32]

King Louis IX, e cake: From the book Great Men and Famous Women; Thomas Becket, e loma: From the book Ridpath’s History of the World (Vol. IV); Thomas More, e ra: From the book Heroes of the Reformation, 1904