“Na Cava Eda Mai Tiko Kina Eke?”

O ELIE WIESEL na turaga a rawata na icovi na Nobel Prize, e bulata tale ga na gauna a saga kina o Itala me vakawabokotaki ira na Jiu, e vakatoka oqo me “taro bibi duadua vua na kawatamata.” Na taro cava oya? Na taro oqo: “Na cava eda mai tiko kina e ke?”

De dua o sa na dau vakasamataka tu na taro oqo. E vuqa era sa dau vakasamataka tale ga, ia era se sega tiko ga ni kila rawa na kena isau. Na daunitukutuku makawa ni Peritania, o Arnold Toynbee, ena nona sasaga me kila na inaki ni bula e vola: “Na inaki dina ga ni tamata oya me vakalagilagia na Kalou, ia na Kalou me na qai vakarautaka mai na ka meda marau tawamudu kina.”

E talei dina ni rauta na tolunaudolu na yabaki sa oti, a sa sauma sara ga kina vakadodonu na taro oqori e dua tale na turaga e kilai ni dau kauaitaka na bula. E tukuna na tui vuku o Solomoni: “Tou rogoca nai tinitini ni ka kecega oqo: Mo rerevaka na Kalou, ka muria na nona vunau: ni sai koya ga oqo nai tavi taucoko ni tamata.”​​—⁠Dauvunau 12:⁠13.

A duavata kei na tikina oqo na Luve ni Kalou o Jisu Karisito. E saga vagumatua me vakalagilagia na Tamana vakalomalagi ni se bula tiko e vuravura. E uasivi na bula i Jisu ni qaravi koya na Dauveibuli. E vakaukauataki koya qai vakabulabulataki koya tale ga, e rawa kina vua me kaya: “A qau kakana me’u kitaka na loma i koya sa talai au mai.”​​—⁠Joni 4:​34.

O koya gona, na cava sara mada eda mai tiko kina e ke? Vakataki Jisu ga, o Solomoni, kei na vuqa tale na dauveiqaravi ni Kalou, ena vakaibalebale dina na noda bula qai tawamudu noda marau nida cakava tiko na loma ni Kalou. Oni taleitaka mo ni kila e so tale na ka e vauca na noda qarava “vakayalo ka vakaidina” na Kalou? (Joni 4:​24) Era na marau na iVakadinadina i Jiova era tiko volekati kemuni mera vukei kemuni mo ni sauma na taro, “Na cava eda mai tiko kina e ke?”