Ena Vakatavulici Rawa Beka na Turaganilewa?

O SLADJANA, e dua na iVakadinadina i Jiova mai Croatia, a dodonu me rairai ena mataveilewai me baleta e so na ka vakailavo. A yaco totolo yani me lai raici koya na turaganilewa. Ia, a qai bera yani o koya e veibeitaki. A gadreva dina o Sladjana me vunau vei turaganilewa, nira se wawa kece tiko, a doudou o koya me vosa vua.

“Oi kemuni saka na Turaga, oni kila beka ni sa voleka na gauna me na sega kina na turaganilewa kei na mataveilewai e vuravura?” a taroga o Sladjana. E vakaibalebaletaki ira tiko na turaganilewa me vaka eda kila tu nikua.

Ena nona kurabui na turaganilewa, a mani vakaraici koya tu ga yani qai sega ni kaya e dua na ka. Ena gauna vata oqori sa tekivu sara na veilewai. Ni sa cava, a lai sainitaka o Sladjana e dua na ivola, mani kala mai e liu o turaganilewa qai vakasolokakana vua ena nona taroga: “O vakadeitaka na ka o sa qai tukuna oti ga qo vei au, ni sa voleka mai na gauna me na sega kina na turaganilewa kei na mataveilewai e vuravura?”

“Io saka. Ena yaco dina!” a sauma o Sladjana.

“O vakadinadinataka vakacava na tikina oqori?” e taroga o turaganilewa.

“E kune ena iVolatabu,” e sauma o Sladjana.

Sa qai tukuna o turaganilewa ni taleitaka me na wilika na ivakadinadina oya, ia e sega ni dua na nona iVolatabu. A lomasoli sara o Sladjana me na qai kauta mai vua e dua. Sa ra qai lai sikovi turaganilewa o ira na iVakadinadina, solia vua e dua na iVolatabu qai vakauqeti koya me vuli iVolatabu e veimacawa. A ciqoma na veisureti o turaganilewa, sega ni dede sa yaco o koya me dua na iVakadinadina i Jiova.

E parofisaitaki ena Same 2:​10: “Mo dou qai vuku oqo, koi kemudou na tui: dou vakatavulici, koi kemudou na turaga ni lewa kei vuravura.” E veivakayaloqaqataki dina nira ciqoma na tamata yalomalumalumu vaka oqo na veidusimaki i Jiova!

[iYaloyalo ena tabana e 32]

O Sladjana kei turaganilewa