O Rawa ni Vosota na iTuvaki Dredre

ENA veigauna cacamatua oqo, e levu era vosota na veika dredre era sotava. Ia, vei ira na lotu Vakarisito, na nodra lomana na Kalou kei na nodra muria tiko ga na nona ivakavuvuli e vukei ira mera vosota. Ena sala cava? Na kena isau e kune ena dua na vosa vakatautauvata i Jisu Karisito. E vakatauvatani iratou kina na nona tisaipeli talairawarawa kei na “tamata vuku, sa tara na nona vale e na dela ni vatu.” E kaya o Jisu: “Sa tau mai na uca, ka coka mai na dobui, ka liwa na cagi, ka tabaka na vale ko ya; a sa sega ni bale: ni sa tauyavutaki e na vatu.”​—Maciu 7:​24, 25.

Dikeva, e dina ga ni vuku na tamata ena vosa vakatautauvata, ia e sotava tale ga na veika dredre​—e vakatakarakarataki ena tau ni uca, na coka ni dobui kei na liwa ni cagi. A sega gona ni tukuna o Jisu nira na sega ni sotava na nona tisaipeli na veika dredre kece qai sega ni vakataotaki nodra marautaka na bula veiyaloni kei na bula vakacegu. (Same 34:19; Jemesa 4:​13-​15) Ia, a kaya ga ni o ira na tamata yalodina ni Kalou e rawa nira tu vakarau mera vosota na ituvaki dredre kei na veileqa ena basika mai.

A tekivuna o Jisu na vosa vakatautauvata ena nona kaya: “Ko koya yadua sa rogoca na noqu vosa oqo, ka cakava, ka’u na vakatautauvatataka kei na tamata vuku, sa tara na nona vale e na dela ni vatu.” Io, a sega ni tukuna tiko o Jisu na tara ni dua na vale dina, ia e veivakauqeti ga ena vakavinakataki ni bula vakarisito. O ira na muria na veivosa oya i Karisito era yalomatua ra qai lewamatau. Era yavutaka nodra lalawa kei na cakacaka vinaka ena yavu vatu na ivakavuvuli i Karisito ena nodra cakava sara ga na veika era sa vulica. E vakavure vakasama ni vatu vakaivakatakarakara oqo e sega ni toka ga e cake. Ena gadrevi vua na tamata ena vosa vakatautauvata me “titobu” nona kelikeli me rawa ni yacova. (Luke 6:​48) Era na sasaga tale ga vagumatua na tisaipeli i Jisu mera vakaitovotaka tiko ga na vosota ni na vakavolekati ira kina vua na Kalou.​—Maciu 5:​5-7; 6:​33.

Na cava e yaco ni sotavi na ituvaki dredre e vakatovolei kina na yavu ni nodra yalodina na lotu Vakarisito era imuri i Jisu? Na nodra talairawarawa ina ivakavuvuli i Karisito kei na nodra itovo vakarisito e ivurevure ni kaukaua levu ena ituvaki rarawataki vaka oqori qai vakauasivi ena gauna dredre sa voleka mai ena Amaketoni. (Maciu 5:​10-12; Vakatakila 16:​15, 16) Io, nira muria na ivakavuvuli i Karisito, e levu era vosota rawa kina na ituvaki dredre. O rawa tale ga ni cakava vaka kina.​—1 Pita 2:​21-​23.