Yabaki Drau Vakacaca, ia e Vakainaki na Nona Bula

NA KENA marama o Elin, e dua vei ira na le 60 mai Suwiteni e se qai volai wale ga oqo na yacadra nira sa yabaki 105 se sivia. E yabaki 105 o Elin. Dina ga ni tiko ena nodra vale na malumalumu ia e se kaukaua vinaka, se rawa ga ni ogaoga tiko ena nona itavi me vaka ni dua o koya na iVakadinadina i Jiova, na bula se digia ena sivia e 60 na yabaki sa oti.

Ena nona vunau o Elin vei ira e so tale, e vakadamurimuria ga na ivakaraitaki ni yapositolo o Paula ena nona a dau vunau ena gauna a vakatabui tu kina me biuta nona vale. A vunau o Paula vei ira kece era sikovi koya yani. (Cakacaka 28:16, 30, 31) E cakava vaka kina o Elin ena nona dau tukuna na itukutuku vinaka mai na iVolatabu vei ira na dau sasamaki, ira na vuniwainibati, ira na vuniwai, ira na dauveikoti, ira na nasi, kei na so tale era dau gole yani ena vale ni malumalumu. So na gauna, o ira na mataveitacini era ivavakoso vata kei Elin, era dau uqeti ira nodra vuli iVolatabu mera sikovi koya me rawa nira vuli mai na veika e kila, ra rogoca tale ga na nona vakasavuirogorogo.

Era taleitaka o ira era ivavakoso vata kei Elin na nona dau mamarau kei na nona dau via vulika. E kaya e dua nona itokani iVakadinadina: “Veivakurabuitaki na nona kila vinaka sara tu ga na veika e yaco tiko ena loma ni ivavakoso. E nanuma vinaka tu na yacadra kece na gone kei ira na toki vou yani ina ivavakoso.” Dau kilai tale ga o Elin ena nona dau veikauaitaki, dau lasalasa, kei na nona marautaka na bula.

Na cava e vukei Elin me marau tiko ga kina qai dei ina nona inakinaki me baleta na nona bula? Ena nona wilika ena siga yadua e dua na tikinivolatabu mai na ivola lailai na Dikeva na iVolatabu e Veisiga, e tabaka na iVakadinadina i Jiova. Ni vakayagataka na iloilo ni vakalevutaki ka, e rawa tale ga kina me wilika e dua na iwase ni iVolatabu e veisiga. Dau vakavakarau o Elin ena soqoni ni iVakadinadina i Jiova e veimacawa, e dina ga ni sega ni rawa ni tiko ena veisoqoni oqori ena vuku ni kena ituvaki. Ia e dau katoni na ka e caka ena soqoni me rawa ni lai rogoca. O koya gona, se da qase se gone, ena vakainaki qai taucoko noda bula ke da wilika wasoma na iVolatabu kei na ivola vakaivolatabu, vaka kina noda sega ni vakaweleweletaka na soqoni Vakarisito.​—Same 1:2; Iperiu 10:24, 25, VV.