“Turaga, na Cava Oni Sega ni Cakava Kina e Dua na Ka?”
A CAVUTA na veivosa oqo o Tui Tabu Benedict XVI ena gauna a sikova kina na keba makawa ni veivakararawataki e Auschwitz, mai Poladi, ena 28 Me, 2006. A vosa tiko o koya ena vanua era vakamatea kina na Nazi e vica vata na udolu na Jiu kei na so tale, e qai kuria: “Levu dina na vakatataro e basika me baleta na vanua oqo! Vakavuqa me dau tarogi: A tiko e vei na Kalou ena gauna oya? Na cava e sega ni cakava kina e dua na ka? Rawa vakacava me vakatara me yaco tiko ga na veilabalabati oqo, me cibitaki kina na ca? . . . Meda masuta tiko ga na Kalou ena yalomalumalumu: Mo ni yavala! Ni kua ni guilecava na kawatamata, na nomuni ibulibuli!”
E levu sara na revurevu ni veika a cavuta oqo na tui tabu. So era dikeva ni a calata e so na ka, me vaka nona sega ni tukuna na nodra vakararawataki na Jiu mai Auschwitz. So tale era siqema ena nona vosa ni a vinakata me kua ni tauri vakabibi na nona kerekere na tui tabu o John Paul II, oya me vosoti na ivalavala ca a cakava na lotu. E dua na daunitukutuku ni lotu Katolika o Filippo Gentiloni, e kaya: “Levu gona na daunitukutuku era a taroga na taro dredre me baleta na cava beka a sega ni cakava kina e dua na ka na Kalou—na taro e sega ni kilai na kena isau—era qai kerea me saumi na taro e rawarawa cake sara: Cava a cakava tu o Pius XII?” Era vakaibalebaletaka na daunitukutuku na nona sega ni tukuna e dua na ka na tui tabu o Pius XII ena gauna era vakamatei kina vakayauyau na Jiu.
Na veivakararawataki a vakayacori ena gauna i Itala, kei na so tale na labakawa a vakayacori ena volaitukutuku ni kawatamata e vakadinadinataka ni ‘sa lewa na tamata vua na tamata tani, sa mani ca kina.’ (Dauvunau 8:9) Kena ikuri, a sega ni tiko lo na Dauveibuli ena gauna a vakayacori kina na veika vakadomobula oqo. E vakaraitaka o koya ena iVolatabu na vuna e vakatara kina na veika ca me yaco tiko. Vakadeitaka tale ga na Kalou ni na sega ni guilecavi keda na kawatamata. Io, sa voleka ni mai cava na nona vakatara tiko na Kalou na nona liutaki koya ga na tamata. (Jeremaia 10:23) Oni via kila e levu tale na ka me baleta na inaki ni Kalou vei keda? Era na marau na iVakadinadina i Jiova mera vukei kemuni mo ni raica ena iVolatabu na isaunitaro a sega ni kila na tui tabu o Benedict XVI.
[iTaba ni Credit Line ena tabana e 32]
Oświęcim Museum