“Vuavua Tiko Nira sa Qase Mai”

E LEVU na tamata ena vanua vaka Mediterranean era dau tea na vuniniusawa ena nodra lomanibai. E dau kilai na vunikau oqo ena kena rairai vinaka kei na kamikamica ni vuana, qai sivia na drau na yabaki na kena dau vua.

A lagata vakaserekali o Tui Solomoni e Isireli makawa na irairai totoka ni goneyalewa ni Sulamaiti qai vakatauvatana ina vuniniusawa. (Sere i Solomoni 7:7) E volai ena ivola Plants of the Bible: “Na vosa vakaIperiu ni vuniniusawa na ‘tàmâr.’ . . . Era dau vakayagataka na Jiu me ivakatakarakara ni ka e lokomi qai dokai, qai vakayagataki vakalevu mera vakayacani kina na yalewa.” Kena ivakaraitaki, na gane i Solomoni vakacabecabe a vakayacani me o Tema. (2 Samuela 13:1) Era se vakayagataka tiko ga nikua e so na itubutubu mera vakayacani luvedra yalewa kina.

Ia, era sega wale ga ni vakatauvatani ina vuniniusawa na marama rairai totoka. E lagata na daunisame: “Ena bulabula na yalododonu me vaka na balabala [“vuniniusawa,” NW]; ena tubu tiko me vaka na sitari mai Lepanoni. O ira era tei e na vale i Jiova era na bulabula e na lomanibai ni noda Kalou. Era na vuavua tiko ni ra sa qase mai; era na drokadroka ka bulabula.”​—Same 92:12-14.

Era vakatauvatani ina vuniniusawa na itabaqase era qaravi Jiova ena yalodina. “Ai sala vakaiukuuku na ulu sika, ni sa kune e na sala ni valavala dodonu,” e kaya na iVolatabu. (Vosa Vakaibalebale 16:31) De dua era na malumalumu vakayago, ia era na kaukaua tiko ga vakayalo kevaka ra vulica vakawasoma na Vosa ni Kalou, na iVolatabu. (Same 1:1-3; Jeremaia 17:7, 8) E dau veivakauqeti dina na nodra vosa kei na nodra ivakaraitaki vinaka, ra qai vuavuaivinaka tiko ga ena veiyabaki. (Taito 2:2-5; Iperiu 13:15, 16) Io, me vaka ga na vuniniusawa, e rawa nira vuavuaivinaka tiko ga na itabaqase.