“Au Kerea Moni Ciqoma na Noqu iLoloma Lailai”

OQORI na lewe ni dua na ivola a vakau ina valenivolavola ni tabana ni iVakadinadina i Jiova e Rusia. A vakau vata yani kei na dua na kato kau levu e sinai kina na sitokini e caka mai na vutinisipi.

Na veika oqori e lolomataka o Alla, e dua na marama yabaki 67, e iVakadinadina i Jiova qai veiqaravi tiko ena dua na ivavakoso e Rusia i cake. Sa sivia e tini na yabaki na nona qaravi Jiova tiko o Alla, qai gugumatua na vunautaka na itukutuku vinaka ni Matanitu ni Kalou. Ka ni rarawa ni a qai paralasi e dua na wase ni yagona ni a tauvi koya vakasauri na mateniyago na stroke. Ia, a uqeti Alla na loloma me muria na ivakaraitaki i Tokasa, na yalewa lotu Vakarisito a bula ena imatai ni senitiuri a dau cula na nodra isulu na tacina vakayalo.​—Cakacaka 9:​36, 39.

A vola o Alla: “Sa sega ni yavala tu na yavaqu, ia se yavala tiko na ligaqu. O koya gona, au dau vola ivola ga meu vunau kina.” E tomana: “Ni se kaukaua na ligaqu, au nanuma kina meu na cula e so na sitokini katakata. Au kerea ga me qai soli na sitokini oqo vei ira na mataveitacini era na lai tara Kingdom Hall ena vanua liliwa, me vakataki Siberia kei na veivanua e Rusia i cake.”

E kaya o Jisu Karisito me baleti ira na nona imuri dina: “A ka oqo era na kila kina na tamata kecega ni dou sa noqu tisaipeli, kevaka dou sa veilomani.” (Joni 13:35) Io, e vakatakilakilataki ira na tisaipeli dina i Jisu na mataqali loloma e vakaraitaka o Alla.