A Dua Beka Nona iVolatabu o Jisu?
A SEGA ni dua na iVolatabu i Jisu. Na vuna? Ni a se sega ni lavetaki taucoko na iVolatabu ena gauna i Jisu me vaka na kena sa tu vei keda nikua. Ia era a maroroi tu ena valenisoro e dua na iwase ni ivolavivigi, ra qai lavetaki tu kina na ivola era tu ena noda iVolatabu nikua. A wilika o Jisu na ivolavivigi i Aisea ena valenisoro e Nasareci. (Luke 4:16, 17) A rogoca na yapositolo o Paula ‘na wiliki ni ivola [“ivolavivigi,” NW] ni vunau kei ira na parofita’ mai Anitioki, e Pisitia. (Cakacaka 13:14, 15) Kaya na tisaipeli o Jemesa ni dau ‘wiliki’ na ivola a vola o Mosese “e na veivale ni lotu e na veisiga ni vakacecegu.”—Cakacaka 15:21.
A tiko beka nodra ilavelave ni ivolavivigi ni iVolatabu na bula ena imatai ni senitiuri? Io, na matanivanua ni Iciopea, e vakailesilesi i Ranadi Kadasi, a ‘wilika tiko na ivolavivigi ni parofita o Aisea, ena nona qiqi ni turaga’ ena gauna e raici koya kina na tisaipeli o Filipi ena gaunisala o Kesa. (Cakacaka 8:26-30) A tukuna vei Timoci na yapositolo o Paula me kauta mai na “vei i vola e so, vakauasivi na i vola kuli ni sipi.” (2 Timoci 4:13, VV) A sega ni tukuna o Paula se ra ivola cava oya, ia e rairai so na iwase ni ivolavivigi era lewe ni iVolatabu vakaIperiu.
E kaya me baleti ira na Jiu o Alan Millard, e dua na parofesa ni vosa vakaArapea kei na vosa vakaIperiu, ni a rairai tiko na ivolavivigi ni iVolatabu vei “ira ga na vuku e Palesitaina, era kaya nira tamata vuli, me vaka e so na Fairisi kei ira na dauveivakavulici me vakataki Nikotimo.” Dua na vuna oya na kena isau. E vakabauta o Millard “ni tiko ena ono ina tini na pene na isau ni dua na ilavelave ni ivola i Aisea” qai kaya ni dua na iVolatabu vakaIperiu taucoko e “tiko kina e 15 ina 20 na ivolavivigi,” qai rawa ni saumi ena isau ni rauta e ono na vula ni cakacaka.
E sega ni tukuni ena iVolatabu ni a dua nona ilavelave ni ivolavivigi ni iVolatabu o Jisu kei ira nona tisaipeli. Ia, e sega ni vakatitiqataki na nona buta vinaka tu o Jisu ena iVolatabu, e rawa ni dusia lesu qai cavuqaqataka na veika era volai tu kina. (Maciu 4:4, 7, 10; 19:4, 5) Sega li ni uqeti keda na bula tiko nikua meda vulica vinaka na iVolatabu, me vaka ga ni sa tu vakarawarawa qai sega ni saulevu?