Kena iKarua

Mo Kua ni Vakatauvatani Iko kei Ira Eso

NA CAVA E KAYA NA IVOLATABU? “Mo cakava vinaka na nomu cakacaka, o na qai sakitaki iko kina. Ia mo kua ni vakatauvatani iko kei ira eso.”​—Kalatia 6:​4, Contemporary English Version.

NA CAVA E VAKADREDRETAKA QO? De dua eda dau via vakatauvatani keda kei ira eso tale​—ena so na gauna kei ira e lailai na ka e tu vei ira, vakalevu ga meda vakatauvatani keda kei ira era kaukaua, vutuniyau, se o ira era vuli vinaka cake. Se mani cava na vuna, qo e sega ni vinaka. E cala ke da nanuma na yaga ni nona bula e dua e vakatau ena ka e taukena se na ka e rawa ni cakava. Eda na rairai uqeta tale ga kina na vuvu kei na veisisivi.​—Dauvunau 4:4.

NA CAVA O RAWA NI CAKAVA? Tovolea mo raici iko ena rai ni Kalou. Me uqeti iko na nona rai ni yaga na nomu bula. “Sa raica na ka esau ko ira na tamata, ia sa raica na yalo ko Jiova.”a (1 Samuela 16:7) O Jiova e sega ni dau vakatauvatani iko kei na dua tale. E raica o koya na kemu yaga ena nona kila na lomamu, e vakalewa na nomu vakasama, na malele ni lomamu, kei na nomu inaki. (Iperiu 4:​12, 13) E kila ni vakaiyalayala na ka o rawa ni cakava, e uqeti iko tale ga mo ciqoma oya. Ke o dau vakatauvatani iko kei na dua tale mo kila kina na kemu yaga, o na yalolailai ga qai sega ni lomavakacegu. Mo ciqoma gona ena yalomalumalumu ni sega ni ka kece o na cakava e vinaka.​—Vosa Vakaibalebale 11:2.

Na cava sara mada mo cakava mo talei kina ena mata ni Kalou? Na Kalou a uqeta na parofita o Maika me vola: “Sa vakatakila oti vei iko, na tamata, na ka e vinaka: ia ka cava tale sa taroga maivei iko ko Jiova, mo caka dodonu ga, ka mo vinakata na yalololoma, ka mo yalomalumalumu talega ni drau lako vata kaya na nomu Kalou?” (Maika 6:8) Ena kauaitaki iko na Kalou ke o muria na ivakasala oya. (1 Pita 5:​6, 7) Qo na vu levu duadua ni lomavakacegu.

[iVakamacala e ra]

[iYaloyalo ena tabana e 5]

E raica o Jiova na keda yaga ena ka e tu e lomada