Taro na Dauwiliwili . . .

E Dodonu Mera Papitaiso na Gonelalai?

▪ E kaya o Victoria: “Au leqataka de na biu e Libo na ganequ o John.” Na cava e leqataka kina oya? E tomana o Victoria: “A mate ni se bera ni papitaiso, qai tukuna e dua na bete ni Katolika ni oya na vuna ena biu kina e Libo me tawamudu.” E veivakarerei dina na vakasama qori, ia e yavutaki beka ena iVolatabu? E tukuna beka na iVolatabu nira na biu e Puregatorio na gone era mate nira se bera ni papitaiso?

E tukuna na iVolatabu mera papitaiso na lotu vaKarisito. A vakasalataki ira na nona imuri o Jisu: “Moni vakavulici ira na lewe ni veivanua kece ga mera noqu tisaipeli, ni papitaisotaki ira ena yaca i Tamada kei na Luvena kei na yalo tabu, vakavulici ira mera muria na ka kece au vakarota vei kemuni.” (Maciu 28:19, 20) E tukuni e keri mera tisaipeli i Jisu o ira era papitaiso. Kena ibalebale oya, era sa vulica na veika me baleti Jisu ra qai vakatulewataka mera nona imuri—era sega ni rawa ni cakava na vakatulewa qori na gonelalai.

Ia era tukuna e levu ni vakaibalebaletaki vei ira na gonelalai na ivakaro i Jisu. E tukuna o Richard P. Bucher na nodra italatala na lotu Lutheran: “E dodonu meda papitaiso kece, o ira tale ga na gonelalai.” E tomana: “Ke ra sega ni papitaiso, era na sega ni vosoti ra qai vakararawataki tawamudu i eli.” Ia raica mada e tolu na sala e veicalati kina na ivakamacala qori kei na ka e vakavulica o Jisu.

Kena imatai, a sega ni vakavulica o Jisu mera papitaiso na gonelalai. Na cava e talei kina na ka dina qori? Vakasamataka mada qo: E dau gumatua ni vakavulici iratou na nona tisaipeli o Jisu ena ivakaro ni Kalou. E taleva vakavica vata ena so na gauna na ivakavuvuli bibi. Na vuna? Me vakadeitaka kina ni ratou sa taura na ka e vakamacalataka tiko. (Maciu 24:42; 25:13; Marika 9:34-37; 10:35-45) Ia e sega vakadua ni vakavulica mera papitaiso na gonelalai. A guilecava beka me tukuna o Jisu ni oya e dua na ivakatagedegede? Sega! Ke bibi mera papitaiso na gonelalai, ena vakavulica qori o Jisu.

Kena ikarua, a sega ni vakavulica o Jisu nida na vakararawataki ena gauna eda mate kina. A vakabauta ni tukuna vakamatata na iVolatabu: “Ni ra sa kila ko ira sa bula ni ra na mate: ia ko ira na mate era sa sega ni kila e dua na ka.” (Dauvunau 9:5) A kila tu o Jisu ni o ira na mate era na sega ni vakararawataki e puregatorio, Libo, eli, se dua tale na vanua. Ia e tukuna nira sega ni vakila e dua na ka, e vaka ga era moce tu.—Joni 11:1-14.

Kena ikatolu, a tukuna o Jisu ni “o ira kece na tu ena ibulubulu” era na vakaturi. (Joni 5:28, 29) Era na wili tale ga e keri na vica vata na milioni era sega ni papitaiso. Nira vakaturi, ena soli vei ira na gauna mera vulica na ivakaro ni Kalou ra qai bula tawamudu ena parataisi e vuravura.a—Same 37:29.

E sega ni tukuna na iVolatabu mera papitaiso na gonelalai.

[iVakamacala e ra]