Vanua e Maroroi Kina na Keda iTukutuku Makawa

‘Era Vakaraici Au e Levu’

Ni yaco yani e Louisville, Kentucky, e Merika o Charlotte White, e dua na dauvunau vakatabakidua, era vakaraici koya e levu ni kauta tiko e dua na kato vaqiqi.

QORI a yaco ena 1908 baleta ni a kauta tiko yani na tacida qori e dua na mataqali kato vou​—e vakatokai na Dawn-Mobile. E tukuna o Charlotte: “Eso era veitalanoataka, era vakaraici au kina e levu.”

O ira na Gonevuli ni Vuli iVolatabu,a era raica ni bibi na kena vakasavui na ka dina era sa vulica mai na iVolatabu. E levu era kila na ka vakaivolatabu mai na vica na itabataba ni ivola e kena ulutaga na Millennial Dawn (e kilai e muri me Studies in the Scriptures). Era tu vakarau na lotu vaKarisito mera lako ena vanua yawa​—⁠ena veitaoni, kei na veikorokoro​—mera veisoliyaka kina na ivola qori vei ira na via wilika dina.

Ena 1908, e veisoliyaka o Charlotte kei na so tale na dauvunau gugumatua na ono na itabataba ni ivola oya era vesu vata tu ena isulu. Na isau ni ono na itabataba e $1.65 ena ilavo ni Merika. Era sega ni veisoliyaka vakaveitalia na ivola qori, era na taura rawa ga na ota, ra qai lesu mera lai solia na ivola, era taura na kena isau me rauta ga na kena tabaki. E dau caka ga vakalevu qori ena siga ni veisaumi. E vosa kudrukudrutaka kina e dua na dauveitusaqati ni sa rui lailai na isau ni ivola!

E nanuma lesu o Malinda Keefer na nona taura e rua na drau ina tolu na drau na ota ni ivola ena dua na macawa. Dua na ka na kena taleitaki na ivola na Dawn, ia e dua tiko na leqa. Na ikaono mada ga ni itabataba e 740 na tabana! E tukuna na Watch Tower: “Na bibi ni limasagavulu na ivola e 18 na kilokaramu,” e “veivakaocai vakalevu” na kena dau veikauyaki, vakabibi vei ira na tacida yalewa.

Me vakarawarawataka na veikauyaki ni ivola na Dawn, a bulia kina e dua na tacida o James Cole e dua na kato e rawa ni lobi na kena kaukamea e tara tu e rua na taya qai sukuru tu na kaukamea qori e tutuna ruarua. E tukuna kina na tacida qori ena nona sa na sega tale ni laveta tiko na kateni e sinai tu kina na ivola: “Au sega ni vinakata me ramusu na tabaqu.” A sevutaka na kato vou qo ena 1908 ena dua na soqo ni tikina e Cincinnati, Ohio. Ena kena idola bulukau e ceuti tu kina na vosa Dawn-Mobile, baleta ni tawani kina vakalevu na itabataba ni ivola na Millennial Dawn. Ni vakatovolei, e laurai ni vakarawarawataki na veikauyaki ni ivola, e rawa mada ga ni ligaduataki. O rawa ni lewa na kena balavu kei na kena lekaleka, rawa mada ga ni vakayagataki ena gaunisala qereqere. Ni oti ga na cakacaka vakavunau ena dua na siga, ena lobi cake tale na kena taya, me rawarawa kina na kena kau lesu e vale ni taubaletaki ga se vakavodoki ena streetcar (kena irairai e vaka tu na sitima ni vanua).

E soli wale na kato qo vei ira na tacida yalewa era cakacaka vakatabakidua. Ia vei ira na kena vo e $2.50 na kena isau ena ilavo ni Merika. O Malinda, e taba toka qo ena imawi, e kila vinaka na ivakavakayagataki ni kato qori. Ena vaqiqica na kato ena dua na ligana, ena taura ena dua tale na ligana na beki e sinai tu kina na ivola. Me vaka ni levu era tataleitaki ena dua na taoni ni keli kola e Pennsylvania, e Merika, ena dau takosova kina vakatolu se vakava na wavu ena siga ni kau ivola.

Ena icavacava ni 1980 vakacaca, a bulia e dua na pailate ni waqavuka e dua na kato vaqiqi e sa dau laurai vakalevu nikua ena raraniwaqavuka kei na gaunisala osooso ena loma ni siti. Ia rauta ni dua na drau na yabaki sa oti, e levu era dau vakaraici ira na Gone Vuli ni iVolatabu gugumatua nira kauta tiko na kato vaqiqi. Era rairai taleitaka qori na tacida me rawa nira vakatetea kina na ka dina ni iVolatabu.

[iVakamacala e ra]

[Tikina bibi ena tabana e 32]

Ena siga ni kau ivola, ena takosova vakatolu se vakava o Malinda na wavu

[Tikina bibi ena tababa e 32]

E vakarawarawataka vakalevu na cakacaka ni vakau ivola