Me Sauma na iVolatabu
Gauna Cava a Tui Kina o Jisu?
Ena veivosakitaki ena ulutaga qo eso na taro o rairai dau lomatarotarotaka tu, o na raica tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kena isau.
1. Na matanitu cava a yalataki vei Jisu?
E yalataka na Kalou ni na dua mai na yatukawa i Tui Tevita ena dabe ena veiliutaki vakatui me tawamudu. Na kawa yalataki qori o Jisu, ena gauna qo sa veiliutaki tiko vakatui ena Matanitu ni Kalou mai lomalagi.—Wilika Same 89:4; Luke 1:32, 33.
Ni se gone o Tevita, a digitaki koya na Kalou me liutaki ira nona tamata na Isireli. Ni mate o Tevita, a digitaki Solomoni o Jiova me dabe ena “[i]tikotiko vakaturaga i Jiova.” (1 Veigauna 28:4, 5; 29:23) Ni mate o Solomoni, e levu na tui era qai veiliutaki e Jerusalemi, ia e levu era tawayalodina. Sa qai vakalaiva o Jiova na mataivalu i Papiloni me vakarusai Jerusalemi, me kauta tani tale ga na kena tui e veiliutaki tiko. A yaco qori ena yabaki 607 B.S.K. Me tekivu mai na gauna qori, a sega tale ni dua na tui mai na yatukawa i Tevita a veiliutaki ena koro o Jerusalemi.—Wilika Isikeli 21:27.
2. Ena vakacava na dede ni kena sega ni matataki e vuravura na veiliutaki ni Matanitu ni Kalou?
Ni oti e vica na yabaki na kena vakarusai o Jerusalemi, e tukuna o Jiova vei Taniela na parofita ni na digitaka e dua na tui me na veiliutaki mai lomalagi. Ena tekivu ena gauna cava nona veiliutaki?—Wilika Taniela 7:13, 14.
A vakamacalataka o Taniela na ibalebale ni tadra me baleta nona vakarota na Kalou na musu ni dua na vunikau vakaitamera, me vaka ga na nona vakarota me kau laivi na matanitu e Jerusalemi qai vakarusai. Ia na waka ni kau qori ena vo tu ga ena qele ni na tubu tale ni oti e “vitu na gauna.” E tukuna na iVolatabu ni tolu veimama na “gauna” e tautauvata kei na 1,260 na siga, e tautauvata gona na “vitu na gauna” kei na 2,520 na siga. (Vakatakila 12:6, 14) Ena parofisai vakaivolatabu, na siga e vakaibalebaletaki ina yabaki. (Tiko Voli Mai na Lekutu 14:34) Koya gona, ena sega ni dua ena veiliutaki vakatui ena Matanitu ni Kalou me 2,520 na yabaki.—Wilika Taniela 4:10-17.
3. Gauna cava a tui kina o Jisu?
A solia na Kalou vei Jisu na lewa vakatui mai lomalagi ena 1914, qori e veidonui sara ga ni cava e 2,520 na yabaki e tekivu mai na gauna e vakarusai oti kina o Jerusalemi. Na imatai ni ka e vakayacora o Jisu ni sa Tui nona vakatalai Setani kei ira na nona timoni mai lomalagi. (Vakatakila 12:7-10) Na ka e yaco oya eda sega ni raica e matada, ia eda vakadinadinataka ena levu ni leqa e tarai keda na kawatamata. (Vakatakila 12:12) Na veika a yaco me tekivu mai na 1914 e vakadeitaka ni sa Tui o Jisu ena yabaki ya.—Wilika Maciu 24:14; Luke 21: 10, 11, 31.
4. Ena yaga vakacava vei iko na nona sa veiliutaki vakatui o Jisu?
Na vakayacori ni veiparofisai me baleta na veiliutaki vakatui i Jisu e vakadinadinataka ni o rawa ni nuitaka na Vosa ni Kalou. Sa voleka ni vakayagataka o Jisu na nona lewa vakatui me vakacegui keda na kawatamata mai na noda rarawa kece.—Wilika Same 72:8, 12, 13; Taniela 2:44.
Me ikuri ni vakamacala, raica na tabana e 215-218 ni ivola qo, Na Cava Sara Mada e Kaya na iVolatabu?, tabaka na iVakadinadina i Jiova.
[Chart ena tabana e 16, 17]
(Raica tale na ivola)
Okotova Okotova
607 B.S.K. 1914 S.K.
← 2,520 na yabaki →
1000 B.S.K. 1 B.S.K. 1 S.K. 1000 S.K. 2000 S.K.
← 606.25 na yabaki →← 1,913.75 na yabaki →
Vakarusai na VAkayagataka nomu calculator: Na kalou e lesi Jisu
na matanitu 606.25 me Tui
o Jerusalemi + 1,913.75 mai lomalagi