Taro 1: E Vakainaki Beka na Noqu Bula?

O ROSALIND, e susu e Igiladi, e dau vinakata me kila e levu na ka. E dau taleitaka me vukei ira na tamata, a qai cakacaka ena nodra vukei na sega ni vakavale, e dau vukei ira tale ga na vakaleqai na ituvaki ni yagodra kei ira e berabera nodra vakasama. Ni sa rawata nona vuli, a dua sara na nona cakacaka vinaka. Dina ni cakacaka vinaka qai levu na ka e rawata, ia e tukuna: “Sa vica vata na yabaki noqu dau lomatarotarotaka, ‘Na cava eda bula tu kina e vuravura?’ kei ‘Na cava na inaki ni bula?’”

Cava e taroga kina qori?

Eda rawa ni vakasama na tamata ni vakatauvatani kei ira na manumanu. Eda rawa ni vuli mai na veika e sa yaco oti, lalawataka na veisiga ni mataka, da qai qara na inaki ni noda bula.

Na cava na nodra isaunitaro e levu?

Levu era nanuma ni inaki dina ni bula oya me taukeni na iyau se mera vaqara rogo, qori ena rawati kina na marau.

Na cava e vakavotui ena isaunitaro qori?

Eda vakaliuca ga na ka e bibi vei keda. E sega ni bibi sara vei keda na inaki ni Kalou.

Na cava e kaya na iVolatabu?

A taukena o Tui Solomoni e levu na iyau qai guta na qarai ni marau, ia e raica ni ka kece qori e sega ni vakainaki kina na bula. E kila rawa na ka ena vakainaki kina na bula, e qai vola: “Tou rogoca nai tinitini ni ka kecega oqo: Mo rerevaka na Kalou, ka muria na nona vunau: ni sai koya ga oqo nai tavi taucoko ni tamata.” (Dauvunau 12:13) Na cava e okati ena noda muria na ivunau ni Kalou?

E nona inaki tale ga na Kalou vei keda meda marautaka na bula. E vola o Solomoni: “Sa sega tale na ka e vinaka vua na tamata, ka me kana ga ka gunu, ka vakaceguya na yalona e na kena vinaka ni nona cakacaka. Oqo tale ka’u a kunea, ni sa ka mai vua na Kalou.”—Dauvunau 2:24.

E vinakata tale ga na Kalou meda lomana qai qarava na noda vuvale. Dikeva na ivakasala rawarawa qai yaga me baleti ira na lewenivuvale yadua.

“Na tagane mera lomani watidra me vaka ga nodra lomana na yagodra.”—Efeso 5:28.
“Na yalewa me dokai watina vakalevu.”—Efeso 5:33.
“Kemuni na gone, ni talairawarawa vei ira nomuni itubutubu.”—Efeso 6:1.

Ke da muria na ivakavuvuli vakaivolatabu qori, eda na bau vakila toka na marau kei na lomavakacegu. Ia na ka bibi duadua eda rawa ni cakava oya meda vulica e levu na ka me baleta na Dauveibuli da qai toro voleka vua me vaka e noda iTokani. Na iVolatabu mada ga e sureti keda meda “toro voleka yani vua na Kalou.” E tukuna tale ga na yalayala totoka qo: “Ena qai toro voleka mai vei kemuni.” (Jemesa 4:8) Ke o ciqoma na veisureti qo, ena vakainaki dina na nomu bula.

O Rosalind sa cavuti oti mai, e sa qai kila qo na inaki ni bula. Ena tabana e 10 ni mekesini qo, e vakamacalataka kina na vuna e veisau kina na nona ivakarau ni rai.

Me ikuri ni ivakamacala me baleta na ivakarau ni bula e vakamarautaka na Kalou, raica na wase 12 ni ivola Na Cava Sara Mada e Kaya na iVolatabu? O rawa kopitaka ena www.pr2711.com

Na Cava e Kaya o Jisu me Baleta na iNaki ni Bula?

E kila vinaka tu o Jisu na inaki ni nona bula. E tukuna: “Qo na vuna au sucu mai kina, qo tale ga na vuna au lako mai kina i vuravura meu tukuna na ka dina.” (Joni 18:37) E vakayagataka nona bula o Jisu me vakavulici ira na tamata ena ka dina me baleta na Kalou kei na nona inaki.

Ena vakainaki dina na noda bula ke da vakatotomuria na ivakaraitaki i Jisu. E sureti keda mada ga o koya meda vuli mai vua. (Maciu 11:29) Dikeva mada qo e rua na sala eda rawa ni cakava kina qori.

E vakavulica o Jisu nida na marau ke da kila nida “gadreva na Kalou.” (Maciu 5:3) Eda rawa ni vakacegui vakayalo ke da vulica tiko ga na veika e baleta ‘na Kalou dina duadua ga, kei Jisu Karisito o koya a tala mai.’—Joni 17:3.

E vakaroti ira na nona imuri o Jisu mera vakavulica vei ira eso tale na ka era sa vulica. E tukuna: “O koya gona, ni lako moni vakavulici ira na lewe ni veivanua kece ga mera noqu tisaipeli, ni papitaisotaki ira ena yaca i Tamada kei na Luvena kei na yalo tabu, vakavulici ira mera muria na ka kece au vakarota vei kemuni.”—Maciu 28:19, 20.

O ira era vakaceguya na nodra veika vakayalo ena nodra vulica na iVolatabu ra qai bulataka na ka era vulica, era na vakila ni vinaka na nodra bula. Nira tekivu vukei ira tale ga eso mera vulica na veika me baleta na Kalou, era na vakadeitaka kina ni vakainaki dina na nodra bula.