A yalataka beka o Jisu vua na daubasulawa ni na lai bula i lomalagi?

E tarogi na taro qori baleta ni a yalataka o Jisu vua na daubasulawa rau a lauvako vata, me na bula ena Parataisi ena gauna se bera mai. A kaya o Jisu: “Au tukuna vakadodonu vei iko nikua, daru na tiko vata mai Parataisi.” (Luke 23:43) Dikeva ni a sega ni tukuna o Jisu na vanua e tiko kina na Parataisi qori. Kena ibalebale beka qori ni rau na lai bula vata i lomalagi?

Meda dikeva mada e liu se rawata na daubasulawa na ivakatagedegede me na lai bula i lomalagi. O ira na nuitaka na lai bula i lomalagi era sa papitaiso ena wai kei na yalo tabu, era sa dua tale ga na luve ni Kalou ra qai tisaipeli i Jisu. (Joni 3:3, 5) Ena gadrevi mera muria na ivakatagedegede savasava ni Kalou qai laurai vei ira eso na itovo me vaka na daudina, yalodina, kei na yalololoma. (1 Korinica 6:9-11) E dodonu tale ga mera yalodina tiko ga vua na Kalou kei Karisito me yacova na nodra mate. (Luke 22:28-30; 2 Timoci 2:12) Nira yacova na ivakatagedegede qori, sa na qai ganiti ira mera vakaturi, sa na rawa tale ga nira qarava na itavi bibi e waraki ira tu mai lomalagi, oya mera bete ra qai tui kei Karisito mera liutaka na kawatamata me duanaudolu na yabaki.—Vakatakila 20:6.

Ia na turaga a vakoti ena yasai Jisu, a daubasulawa tu ena nona bula taucoko me yacova nona mate. (Luke 23:32, 39-41) E dina ni a tukuna ena veidokai vei Jisu: “Qai nanumi au ni oni sa tiko ena nomuni matanitu.” (Luke 23:42) Ia e se bera ni papitaiso se dua na luve ni Kalou qai tisaipeli i Jisu, e sega tale ga ni laurai ena nona bula ni tamata yalododonu qai yalodina. Vakacava e donu beka na nona yalataka vua o Jisu me na lai veiliutaki vakatui kei ira na nona imuri yalodina, era a yalodina tiko ga me yacova na nodra mate?—Roma 2:6, 7.

Kena ivakaraitaki: Ke kere veivosoti vei iko e dua na tagane ni a butakoca na nomu ilavo, o na rairai vakatulewataka mo kua ni veilewaitaki koya. Vakacava o na nuitaki koya me cicivaka na nomu bisinisi se qaravi ratou nomu vuvale? O na solia na itavi va qori vei ira ga o nuitaka dina. O ira tale ga na nuitaka mera na lai bula i lomalagi e dodonu mera vakaraitaka nira rawa ni nuitaki ena nodra tokona na ivakatagedegede yalododonu ni Kalou ena gauna era na liutaki ira kina na kawatamata. (Vakatakila 2:10) A sega ni vakaraitaka qori na daubasulawa, dina ga ni a vakamasuti Jisu ni bera ni mate.

Ia a tukuna beka o Jisu vua na daubasulawa ni rau na tiko vata mai lomalagi ena siga sara ga ya? Sega, ni o Jisu mada ga a sega ni lako i lomalagi ena siga sara ga ya. Ia a tiko ga ena “lomaniqele” se na ibulubulu me bogi tolu. (Maciu 12:40; Marika 10:34) Ni oti mada ga na nona vakaturi, a se tiko ga i vuravura me 40 na siga ni bera ni lako cake i lomalagi. (Cakacaka 1:3, 9) Koya gona, ena sega ni rawa vei koya na daubasulawa me na tiko vata kei Jisu mai lomalagi ena siga sara ga ya.

Ia na Parataisi cava ga ena bula kina na daubasulawa qo? Ni sa na vakaturi, ena bula o koya ena vuravura Parataisi e liutaka o Jisu. (Cakacaka 24:15; Vakatakila 21:3, 4) Ke o via kila e levu tale na ka me baleta na Parataisi kei na ivakatagedegede ni Kalou, taroga e dua na iVakadinadina i Jiova.