SAUMI NA TARO VAKAIVOLATABU

Na cava e vakatokai kina o Jisu me Luve ni Kalou?

E sega ni vakawati na Kalou me rawa ni vakaluveni kina baleta ni o koya ga a bulia na ka kece. Era buli na kawatamata mera itovo vata kei na Kalou. Oya na vuna a vakatokai kina na imatai ni tamata o Atama me “luve ni Kalou.” A vakatokai tale ga o Jisu me “Luve ni Kalou” baleta ni a buli me ucui Tamana.—Wilika Luke 3:38; Joni 1:14, 49.

A buli ena gauna cava o Jisu?

Na Kalou a buli Jisu e liu qai muri o Atama. A qai vakayagataki Jisu sara ga na Kalou me bulia na ka kece, wili kina nodra buli na agilosi. Oya na vuna e tukuna kina na iVolatabu ni o Jisu e “ulumatua ni kabuli kece” ni Kalou.—Wilika Kolosa 1:15, 16.

A dua tu na agilosi mai lomalagi o Jisu ni bera ni sucu e Peceliema. Ena nona gauna lokuci, sa qai tokitaka na Kalou na bula i Jisu mai lomalagi ina katonigone i Meri me sucu kina vakatamata.—Wilika Luke 1:30-32; Joni 6:38; 8:23.

Na cava e vinakata kina na Kalou me mai sucu vakatamata e vuravura o Jisu? Na itavi bibi cava a mai vakayacora o Jisu? O na rawa ni kunea na isaunitaro qori ena iVolatabu. Ena vakarabailevutaka na nomu kilai Jisu kei na Kalou, o na vakavinavinakataka tale ga na ka erau sa cakava ena vukumu.