Eda Mai Bula tu Vakacava e Vuravura?

E tukuna vakamatata na imatai ni ivola ena iVolatabu: “Enai vakatekivu sa bulia na lomalagi kei vuravura na Kalou.” (Vakatekivu 1:1) Ni bulia oti na kau kei na manumanu na Kalou, sa qai buli rau na imatai ni tamata o Atama kei Ivi. Erau duidui mai vei ira na manumanu baleta ni rau a buli me rau bulataka na itovo talei ni Kalou me vaka na loloma, yalododonu, marau kei na levu tale, wili kina na galala ni vakatulewa. Erau na saumitaro gona ena ka erau cakava. Ke rau a talairawarawa ena ivakaro ni Kalou, a rawa sara ga ni rau marautaka vata kei ira na nodrau kawa na bula uasivi e vuravura me tawamudu.

Ena nona nanumi koya ga e dua na agilosi, e vakacalai rau kina na imatai ni tamata me rau muri koya. A yaco na agilosi qori me o Setani, kena ibalebale “Dauveivorati.” A vakayagataka o Setani na gata me tukuna vei Ivi ni rawa ni lewai koya ga, e sega ni gadrevi na veidusimaki ni Kalou. Rau mani muri Setani o Atama kei Ivi, rau yalana kina nodrau veiwekani kei na Kalou. Ni rau digidigi cala erau vakayalia na bula tawamudu, rau vakadewa tale ga vei keda na ivalavala ca e kena isau na mate.

A tukuna sara na Kalou ni na vakavinakataka na ituvaki qori, e vakarautaka tale ga na sala mera rawata kina na kawa i Atama na bula tawamudu. E yalataka na Kalou e dua na “kawa” ena vaqeavutaki Setani, ena vakaotia tale ga na rarawa eratou vakavuna o Setani, Atama kei Ivi. (Vakatekivu 3:15) O cei na “kawa” qori? Ena qai kilai ni toso na gauna.

Ia e sega ni cegu o Setani me vakaseva na inaki totoka ni Kalou. Sa rauta me levu tiko ga na tamata ca e vuravura, mani vakatulewataka na Kalou me vakarusai ira ena waluvu. A vakaroti Noa me taya e dua na waqa, me bula kina kei ratou na nona vuvale, wili kina na manumanu.

Ni oti e dua na yabaki na kena yaco na waluvu, eratou sobu mai na waqa na vuvale i Noa, sa ra yali na tamata ca. Ia se bera ga ni basika na “kawa.”

​—Yavutaki ena Vakatekivu wase 1-11; Juta 6, 14, 15; Vakatakila 12:9.

[iYaloyalo ena tabana e 4]