‘Keimami sa Kunea na Mesaia’!

Ni oti e rauta e va na senitiuri na kena vakacavari na iotioti ni ivola vakaIperiu ena iVolatabu, sa qai vakayacori na parofisai i Maika me baleta na Mesaia: A sucu o Jisu e Peceliema. Oti tale e rauta e 30 na yabaki, a vakayacori ena 29 S.K. na imatai ni ka a parofisaitaka o Taniela me baleta nona basika na Mesaia. A papitaiso o Jisu qai lumuti koya na Kalou ena yalo tabu. Qori sara ga na gauna e basika kina na Kawa, se na Mesaia a waraki tu mai vakadede!

E tekivutaka sara o Jisu na nona cakacaka vakaitalatala ena nona “vunautaka na itukutuku vinaka ni matanitu ni Kalou.” (Luke 8:1) E laurai sara ga ena nona bula ni dau yalololoma, yalomalua, qai kauaitaki ira dina na lewenivanua me vaka ga a parofisaitaki. E yaga qai veivakauqeti na nona ivakavuvuli, e vakabulai ira tale ga na lewenivanua mai na “veimataqali mate.” Qori e vakaraitaka ni tokoni koya na Kalou. (Maciu 4:23) O ira kece era muri Jisu era rawa tale ga ni kaya: ‘Keimami sa kunea na Mesaia’!​—Joni 1:41.

E parofisaitaka o Jisu ni na yaco e vuravura na ivalu, uneune, kei na veika ca ni bera ni veiliutaki na nona Matanitu. E uqeti keda tale ga meda “yadra tiko.”​—Marika 13:37.

E uasivi o Jisu qai yalodina tiko ga vua na Kalou, ia o ira na kena meca era vakamatei koya. Na nona mate eda rawa kina ni nuitaka na bula tawamudu ena Parataisi, qori na ka rau a vakayalia o Atama kei Ivi.

Na nona mate o Jisu kei na nona vakaturi koya na Kalou me dua na agilosi kaukaua ni oti e tolu na siga, e vakayacori kina na ka e parofisaitaki tu mai. Sa qai rairai o Jisu vei ira na sivia e le 500 na nona tisaipeli. Ni bera ni lesu i lomalagi, a vakaroti ira na nona imuri mera vunautaka na itukutuku vinaka me baleti koya kei na nona Matanitu vei ira “na lewe ni veivanua kece ga.” (Maciu 28:19) Ena vakacava na rabailevu ni nodra cakacaka?

​—Yavutaki ena Maciu, Marika, Luke, Joni, 1 Korinica.

[iYaloyalo ena tabana e 6]