Na Cava na Ka Dina me Baleta na Kirisimasi?

E tiko na vuna era solevutaka kina e levu ena veiyasa i vuravura na Kirisimasi. Era raica eso ni qo e gauna vinaka mera veimaliwai kina kei na nodra itokani se vuvale. So tale era raica ni gauna vinaka mera vakananuma kina na Kalou se vukei ira na dravudravua. Sega ni vakabekataki ni qori era sasaga yaga kece. Ka ni rarawa nira mataboko tu e levu ena ka dina me baleta na olodei qo.

Kena imatai, era vakabauta e levu ni Kirisimasi e solevutaki kina na sucu i Jisu. Ia era tukuna na vuku ni sega ni kilai tu na tikinisiga e sucu kina. E kaya na ivola Christian Book of Why “nira sega ni via digitaka na lotu vaKarisito taumada e dua na tikinisiga e sucu kina o Jisu” baleta nira “sega ni via okati ena ivakarau ni lotu butobuto.” Na iVolatabu tale ga e sega ni volatukutukutaka ni a solevutaka o Jisu na nona siganisucu se dua tale. A vakaroti ira ga nona imuri mera vakananuma na nona mate.—Luke 22:19.

Kena ikarua, era vakabauta na vuku ni yavutaki tale ga ena lotu butobuto na ivalavala ni kena dau solevutaki na Kirisimasi. Qori e wili kina na Father Christmas, na vakayagataki ni tabanikau na mistletoe, vunikau ni Kirisimasi, soli iloloma, vakawaqa kadrala, kena waqa tu na matadravu ni tu kina na tolonikau, kena lili tu na itoqi senikau kei na lagati ni sere ni Kirisimasi. E kaya kina na ivola na Externals of the Catholic Church me baleta na ivakarau qori: “Vakacava eda siqema nida sa vakaitavi tiko ena ivakarau ni lotu butobuto nida ciqoma se soli iloloma ni Kirisimasi kei na noda vakaliliga na itoqi senikau drokadroka e vale se valenilotu?”

De dua o na vakasamataka ni sega ni cala na ivalavala ni kena dau solevutaki na Kirisimasi. Me vakamatatataki qori dikeva mada na kena ikatolu. E sega ni taleitaka na Kalou me bosoki vata na ivakarau ni lotu butobuto kei na sokalou dina. A vakasalataki ira na Isireli talaidredre na Kalou o Jiova ena gusu i Emosi: “Au sa cata, au sa vakasisilataka na nomudou so levu . . . ka’u sa bese ni rogoca na domo ni nomudou api.”—Emosi 5:21, 23.

Cava e vakasalataki ira kina vakaukaua? Vakasamataka mada na veika e cakava na matanitu ena vualiku kei Isireli makawa. A bulia na imatai ni nodra tui o Jeropoami e rua na luve ni bulumakau koula, e biuta e dua e Tani, dua tale e Peceli. E vakaroti ira tale ga na lewenivanua mera sokaloutaka qori mera kua ga ni gole ina valenisoro i Jerusalemi mera sokaloutaka na Kalou o Jiova. A tauyavutaka tale ga na tui e dua na solevu qai lesi ira na bete me vukei ira na tamata mera solevutaka.—1 Tui 12:26-33.

Era nanuma na Isireli ni donu na veika era cakava tiko. Era nanuma nira cakava tiko vua na Kalou ena vakamarautaki koya tale ga. Ia na veivakasalataki kaukaua e tukuna na Kalou ena gusu i Emosi kei ira na parofita e vakaraitaka nona rai me baleta na ivakarau ni sokalou qori. E tukuna na Kalou ena gusuna na parofita o Malakai: “Koi au ko Jiova, ka’u sa sega ni veivukiyaki.” (Malakai 3:6) Vakacava o nanuma ni va qori tale ga na rai ni Kalou me baleta na solevutaki ni Kirisimasi nikua?

Era vakadinata e levu na dina ni ka sa cavuti mai, era sa vakatulewataka kina mera kua ni solevutaka na Kirisimasi. Io, e vakamarautaki ira nira vakatikitikitaka na gauna mera veimaliwai kina kei na nodra vuvale se itokani ra qai tu vakarau e veigauna mera vukei ira na dravudravua.