ULUTAGA LEVU | E YAGA NA MASU?
Ena Rogoci Nomu Masu?
So era nanuma ni vakaoti gauna na masu, e sega ni dua e rogoca. So tale era masu, ia era nanuma ni sega ni saumi. E vakasamataka na Kalou e dua e sega ni dau vakabauti koya, masulaka sara: “Vakasolokakana mada mai vei au.” Ia e kaya ni “galu tu ga” na Kalou.
E vakadeitaka na iVolatabu ni bula dina tiko na Kalou e dau rogoca noda masu. E tukuna na iVolatabu vei ira ena gauna makawa sara: “Ena lomani iko o koya [na Kalou] ni rogoca na nomu tagi ni kere veivuke, ena sauma ena gauna ga e rogoca kina.” (Aisea 30:19) E dua tale na tikinivolatabu e kaya: “Nodra masu na yalododonu e taleitaka o koya.”—Vosa Vakaibalebale 15:8.
E masuti Tamana o Jisu, “mani rogoci na nona masu.”—Iperiu 5:7
E tukuni tale ga ena iVolatabu ni rogoci nodra masu eso. E tukuni va qo ena dua na tikina ni a “kerekere” o Jisu “vei koya e rawa ni vakabulai koya” e “mani rogoci na nona masu.” (Iperiu 5:7) So tale na ivakaraitaki e rawa ni wiliki ena Taniela 9:21 kei na 2 Veigauna 7:1.
Na cava ga era dau nanuma kina eso ni sega ni saumi na nodra masu? Ke da vinakata me rogoci noda masu, meda masu duadua ga vua na Kalou e cavuti ena iVolatabu, o Jiova,a sega ni dua tale na kalou se vuda. E vinakata tale ga na Kalou meda “kerea” na ka “me salavata kei na lomana”—na ka e vakadonuya o koya. Ke da masu va qori, e vakadeitaka ni na “rogoci keda.” (1 Joni 5:14) Me rogoci noda masu, ena vinakati meda kilai koya na Kalou e cavuti ena iVolatabu, da qai vulica na nona inaki.
Era vakabauta e levu ni sega ni dua ga na ivakarau ni lotu na masu, ia e dau rogo masu na Kalou, e sauma tale ga. E kaya o Isaac mai Kenya: “Au masulaka meu kila na iVolatabu. Sega ni dede sa lako yani vei au e dua, qai vukei au.” Mai na Yatu Filipaini, e via muduka nona vakatavako e dua na yalewa o Hilda. Ni guce vakavica nona sasaga, e vakatututaka o watina, “Masuta mada na Kalou.” E muria na ivakasala qori qai kaya: “Au kurabui sara ga ena sala e vukei au kina. E vaka ga au sa sega ni qai taleitaka na vakatavako. Rawa kina niu muduka.”
Vakacava, ena via vukei iko na Kalou ena dua na ka o kauai kina vakabibi qai salavata kei na nona inaki?
a O Jiova na yaca ni Kalou e tukuni ena iVolatabu.