Na ka Dina me Baleti Ira na Agilosi

Era kabula vakayalo na agilosi me vakataki koya ga na Kalou, era “sega ni vakalewe se vakasuina.” Era vakaitikotiko mai lomalagi na agilosi yalodina, ra qai dau veitaratara wasoma kei na Kalou.​—Luke 24:39; Maciu 18:10; Joni 4:24.

Era liatamata ena so na gauna na agilosi mera mai vakayacora nodra ilesilesi vakalou e vuravura. Nira vakayacora oti nodra ilesilesi, era vukici ira tale ina yago vakayalo.​—Dauveilewai 6:11-23; 13:15-20.

Nira vakamacalataki ena iVolatabu na agilosi se gauna era liatamata kina, e tukuni nira tagane. Ia e sega na veivakaduiduitaki ni tagane kei na yalewa vei ira na agilosi. Era sega ni vakawati se vakaluveni. Era sega ni bau bula e vuravura ena dua na gauna. E buli ira sara ga na agilosi o Jiova, oya na vuna e vakatokai ira kina na iVolatabu mera “luve ni Kalou dina.”​—Jope 1:6; Same 148:2, 5.

E cavuti ena iVolatabu na “nodra vosa na tamata . . . kei na nodra vosa na agilosi.” Kena ibalebale era rawa ni vosa na agilosi, e tiko sara ga na nodra vosa. A vakayagataki ira na agilosi na Kalou mera veivosaki kei na tamata, ia e sega ni vakadonuya meda sokaloutaki ira se masu vei ira.​—1 Korinica 13:1; Vakatakila 22:8, 9.

Era le oba vakaoba na agilosi, de dua e vica vata na bilioni na kedra iwiliwili.a​—Taniela 7:10; Vakatakila 5:11.

Era “cecere ena kaukaua” na agilosi, era kaukaua qai vuku cake vei keda na tamata. Ena sega ni katuma rawa na noda vakasama na totolo ni nodra veitosoyaki.​—Same 103:20; Taniela 9:20-23.

E vakasakiti nodra kaukaua kei na nodra vuku na agilosi, ia e vakaiyalayala na ka era rawa ni cakava kei na ka era kila.​—Maciu 24:36; 1 Pita 1:12.

Era rawa ni vakila na ka na agilosi qai tiko nodra itovo. Ni soli tale ga vei ira na galala ni vakatulewa, era rawa gona ni digia mera cakava na ka vinaka se ca me vakataki keda ga. Ka ni rarawa nira digia eso na agilosi mera talaidredre vua na Kalou.​—Juta 6.