Kere Veivuke
1 Na “veigauna dredre” e cavuti ena vosa uqeti ni Kalou, na iVolatabu, e vakamacalataka vinaka sara ga na gauna cacamatua eda bula tu kina oqo. (2 Tim. 3:1, VV) O koya gona, na cava mo cakava ke o sotava e so na leqa vakayalo o qai nanuma ni o sega ni vakarautaki iko vinaka?
2 Vakacava, e rawa mo lai raica e dua e matua vakayalo ena ivavakoso? E so ena dredre mera cakava oqo nira madua, nodra sega ni via vakaoga tale e dua, se nodra nanuma ni sega ni dua e rawa ni vukei ira. E dodonu meda dui cola noda icolacola ena kena vinaka duadua eda rawata, ia meda kua ni dau tu vakasuka ni kere veivuke ena veika e vauca na noda bula vakayalo.—Kala. 6:2, 5.
3 Vanua Mo Tekivu Kina: De o na via lai raici koya na nomu qasenivuli ni vulivola, mo tarogi koya ke rawa ni drau veitomani ena cakacaka vakavunau. Oqo e gauna vinaka mo qai vakaraitaka kina vua nomu gagadre mo tubu vakayalo. Ke dauveiqaravi vakaitalatala, vakaraitaka vua na veivuke vakayalo o gadreva, o koya ga e sa na qai kerei ira na qase mera vukei iko. Se o na vinakata mo torova e dua na qase o qai vakaraitaka vua nomu leqa.
4 Na veivuke vakacava o gadreva? Dua beka na ka e vakataotaka nomu gugumatua? O itubutubu le dua beka, o qai saga voli mera kabita na ivavakoso na luvemu? O sa qase beka mai o qai gadreva na veivuke? Se vakayalolailaitaki iko tiko e dua na nomu leqa? Ena dredre beka na bula ena gauna cacamatua oqo—ia meda nuidei. E rawa nida vukei.
5 Sala Era Veivuke Kina na Qase: Era kauaitaki keda dina na qase. Era na rogoca na nomu leqa. Ke ra sotava e so tale na dautukutuku na leqa o sotava tiko, era na vakasamataka tiko oqo na qase ena gauna era veivakatawani tiko kina se veivakavulici ena ivavakoso. Nira “nodrai vakarau ga na qele ni sipi,” era na dau marautaka mera cakacaka vata kei kemuni. (1 Pita 5:3) Nomu rogoci ira na tuakada matua oqo nira sereka na ivakavuvuli vakaivolatabu e rawa ni vakavinakataka nomu cakacaka vakaitalatala, e rawa ni yaga tale ga ena nomu bula.—2 Tim. 3:16, 17.
6 Sa vakarautaka vei keda o Jiova e levu sara na ‘isolisoli tamata.’ (Efeso 4:8) Kena ibalebale ni nodra itavi na qase mera qaravi iko. Era na tu vakarau mera vukei iko. E vaka sara ga o “taukeni ira” o iko. (1 Kor. 3:21-23, NW) O koya gona, kua ni tu vakasuka, vosa yani. Kerea na veivuke o gadreva.