Kato ni Taro

◼ Era na tokoni ira vakacava na itubutubu na dauveivuke (attendant) mera qarauna na luvedra ena gauna ni soqoni?

Ra dau yavavala vakalevu na gone ni sega ni matau vei ira mera dabe dede vakamalua. Ni oti na soqoni, ra dau yamasamasa ra qai dau veiciciyaki se veicemuri ena Kingdom Hall se so tale na vanua ni soqoni, ena vanua e kele kina na motoka, se na batinisala. E dina kina na vosa vakaibalebale e kaya: “Na gone sa biu wale tu me veitalia sa vakamaduataki tinana.”​—Vkai. 29:15.

Ka ni rarawa nira sa dau bale ra qai mavoa vakaca e so na tacida qase nira coqai ira na gone era veiciciyaki voli. Lai vakavurarawa wale oqo, ra lai vakaicolacolataki kina na itubutubu kei na ivavakoso ena saumi ni veiqaravi vakavuniwai kei na so tale na ka. Mera qarauni na gone mera kua ni veiciciyaki e loma ni Kingdom Hall se e tautuba ni oqo e itataqomaki vei ira vaka kina vei ira na tani.

Sa nodra itavi vakaivolatabu na itubutubu mera vakavulici ira na luvedra mera doka na noda vanua ni sokalou. (Dauv. 5:1a) Era lesi na dauveivuke ena noda soqoni vakarisito, soqo ni tabacakacaka, kei na soqo ni tikina mera raica me “rairai vinaka na ka kecega,” me “maqosa” tale ga. (1 Kor. 14:40; Kolo. 2:5, NW) Dodonu me yadra vinaka tu nodra vakasama, ni se bera ni tekivu na porokaramu, ni sa vakacagau tu, vaka kina ni oti, sega wale ga e loma ni vanua ni soqo, e tautuba tale ga. Ke veiciciyaki tiko na gone se vosalevu, me torovi koya vakamalua na dauveivuke, qai vakamacalataka vua na vuna e sega ni vinaka kina na ivalavala vaka oya. Me tukuni tale ga ena dela ni loloma vei rau na itubutubu i koya na gone na leqa e yaco kei na kena bibi vei rau me rau raica tiko na luvedrau. Ena vinaka vua na itubutubu me cakava sara kina e dua na ka.

So na gauna, sa macala tu nira na dau tagi se vakasosa na gonedramidrami se gonelalai ni sa vakacagau tiko na soqoni. O ira na dauveivuke era yaco yani rauta ni 20 na miniti ni se bera ni tekivu na soqoni e rawa nira maroroya na iotioti ni vica na iyatu idabedabe me baleti ira na itubutubu era vinakata mera dabe e kea kei na luvedra lalai. O keda na kena vo meda veitokoni ena noda vakalala na idabedabe oya ena vukudra.

Ke vakasosa tiko na gone, sa dodonu me cakava kina e dua na ka na itubutubu. Ke sega, qai vakavuleqa oya vei ira na vakarorogo, ena kerei koya vakavinaka na itubutubu na dauveivuke kevaka e rawa ni kauti luvena i tuba. Kevaka eda sureta vou e dua ina soqoni e lako vata yani kei ira na luvena, e dodonu meda dabe vata kei koya da qai soli keda meda vukei koya ke ra tagi na gone se ra veivakasosataki ena so tale na sala.

Eda marau meda raici ira na gone e duidui nodra yabaki ni bula ena Kingdom Hall da qai raica nodra itovo vinaka ena isoqosoqo ni Kalou. (1 Tim. 3:15) Ena nodra rokova na gone na ituvatuva i Jiova me baleta na sokalou, era na dokai koya kina, era na taleitaki ira tale ga na lewe ni ivavakoso.