iVola Mai na iLawalawa Dauvakatulewa
Sa da bau kalougata dina! Nida iVakadinadina i Jiova, eda sega wale ga ni kalougata nida mai kilai Jiova na Kalou bula dina duadua ga, na Dauveibuli ni lomalagi kei na vuravura, ia eda kalougata tale ga meda vakatokai ena yacana da qai qaravi koya. Sa tu tu na veivakalougatataki!—Aisea 43:12; Iper. 8:11.
Eda sa mai kila na inuinui meda na rawata kina na bula kei na itavi ni kena vunautaki na itukutuku vinaka ni Matanitu, me rawa ni so tale mera mai qaravi Jiova ra qai kila tale ga na noda inuinui. (Maciu 24:14; Roma 10:13, 14; 1 Ces. 5:8) Eda reki tale ga nida sa mai lewe ni mataveitacini levu dau veilomani qai dau veivukei ena vuravura raraba. Sa bau veivakalougatataki dina!
E veiganiti na vosa ni veisureti ena iVolatabu: “Dou qaravi Jiova e na marau; . . . Dou curu ki na nona matamata-ni-koro ni dou sa vakamolimoli tiko, kei na nona lomanibai ka vakavinavinaka: Dou vakamolimoli vua, ka vosavinakataka na yacana. Ni sa yalovinaka ko Jiova; ka sa sega ni mudu na nona yalololoma; ka sa yacova nai tabatamata kecega na nona lomadina.” (Same 100:2-5) Nida qaravi Jiova ena marau e vakaraitaka nida veiwekani voleka kei koya. E vakarawarawataka vei keda o koya meda rawata na veiwekani oya, e noda itavi dokai meda vakabulabulataka tiko ga. Ni vinaka noda veiwekani kei Jiova, eda kila ni na tu vakarau o koya me vukei keda qai vakaukauataki keda ena gauna eda leqa kina. Eda nuidei ni na vakaukauataki keda vakayalo qai dusimaki keda meda vorata na ka ni bolebole eda sotava tiko ena gauna ni ivakataotioti oqo. Se ituvaki dredre cava ga eda sotava tiko, eda rekitaka ga na noda cakacaka vakaitalatala, da qai vakavinavinakataki Jiova e veisiga, ni kaya vei keda na nona Vosa, ni sa dau ‘nanumi keda’ o koya.—1 Pita 5:7.
E vakalougatataki keda vakalevu o Jiova ena yabaki sa oti. Ena Soqo ni Tikina na “Muria na Vosa ni Kalou,” eda marau nida mai duavata kei na vica vata na udolu na tacida vakayalo, ena noda lagasere da qai kania vata na magiti vakayalo ena teveli i Jiova. Ena noda Vulivola ni iVavakoso, eda marautaka na kena vaqaqacotaki na noda vakabauta nida a vulica vata kina na ivola Nanuma Matua na Parofisai i Taniela! Kena ilutua, eda marautaka vakalevu na noda taura na imatai ni ivola vou ni Parofisai i Aisea—Me Vakararamataka na Kawatamata! ‘Sa vuabale na meda bilo.’—Same 23:5.
Dua na ka rekitaki nida kila ni vica vata na milioni na mataveitacini eda qaravi Jiova vata tiko ena duavata! E veivakauqeti dina nida wilika na iwiliwili vou levu duadua ni veika e rawati ena cakacaka vakaitalatala! Eda marau ni vica vata na milioni era a tiko ena iVakananumi ni mate ni noda Turaga—dina ga ni dredre na ituvaki ni vuravura. Nida raica na yalava e vuravura raraba, e macala ni “sa vakalewe na yabaki.” (Luke 10:2) Ena yabaki sa oti, na ivakatautauvata ni vuli iVolatabu era toso mera papitaiso ena veimacawa era le 5,555. Ni levu na tatamusuki ena so na vanua me vakatauvatani kei na so tale, eda marautaka vata kece na ka e cakava tiko o Jiova. Eda vakadinadinataka na nona veivakalougatataki ena nodra sasaga ena duavata na nona dauveiqaravi.
E vakavureki tale ga na taravaki ni Kingdom Hall vovou! Eda marau nida raica na nodra tokona mai vu ni lomadra na cakacaka oqo na mataveitacini mai na veivanua era se qai vakatorocaketaki tiko. Sa ra tara oti e vica vata na drau na Kingdom Hall vovou ena nona veivuke na Kingdom Hall Construction Group, na ilala oqo era sa vakavulici vinaka ena tarataravaki. Era toki na mataveitacini oqo mai na dua na ivavakoso ina dua tale ena nodra vanua ga mera liutaka na taravaki ni Kingdom Hall. Ni vica vata na udolu na Kingdom Hall e se vo tu me tara, e kerei kina e levu na bolecakacaka ena veivanua oqo mera mai veivuke. Ke o tiko ena dua na vanua vaka oya, o rawa ni veivuke? Era marautaka dina na mataveitacini mera soqoni ena nodra Kingdom Hall ga vakataki ira! Era qai vakavinavinakataka vakalevu na nodra veitokoni vakailavo na mataveitacini e vuravura raraba, rawa kina me tara na nodra Kingdom Hall!
Na itukutuku ni kena vakadonui vakalawa na noda cakacaka e vakamarautaki keda. Ia, ena levu na vanua era tu tale ga kina o ira na tamata kilai era saga mera tarova na nona sokaloutaki o Jiova. Nida sotava na ituvaki oqo, eda nuidei ni sega ni wilika o Jiova na kedra le levu na dau veitusaqati, se ra vakalolomataki vakaca na nona tamata ni na vukei ira dina o koya. (2 Vei. 14:11) Oni vakavinavinakataki ra mataveitacini ena nomuni tudei tiko ga ena sokalou dina.
Vaqaqacotaka tiko ga na nomuni vakabauta qai vakararavi vakatabakidua ina veidusimaki i Jiova ni oni vakayacora tiko ena reki na nomuni itavi vakarisito. (Vkai. 3:5, 6) Meda kua ni yalolailai, se mani vakacava sara na levu ni ka e cakava na meca. Nanuma na veivakayaloqaqataki i Ilaisa vua na nona dauveiqaravi ni a taqaya tu: “Kakua ni rere: ni ra sa lewe vuqa era sa tiko kei kedaru, ka lewe lailai era sa tiko kei ira.” (2 Tui 6:15-17) Edaidai, era tu vakarau na mataivalu vakalomalagi i Jiova mera taqomaka na sokalou savasava me vaka ena gauna i Ilaisa. Eda vakanamata tu ena nuidei ina gauna se bera mai. E lewa na ka kece o Jiova. Era sega ni tu rawa e matana na veimatanitu. Sa lumuti Luvena me veiliutaki. “Era sa kalougata [se, “marau,” NW] ko ira kecega sa vakararavi vei koya.”—Same 2:1-6, 12.
Yalovinaka ni qai nanuma tiko ni keitou dau vakasamataki kemuni sara vakalevu na mataveitacini. Sa neitou masu ni oni na “tu dei ka vinaka sara ka vakasinaiti tu e na ka kece sa loma ni Kalou.”—Kolo. 4:12.
Tacimuni,
iLawalawa Dauvakatulewa ni iVakadinadina i Jiova