O na Sauma Vakacava?

1. Na cava meda muria kina na ivakaraitaki i Jisu ke tarogi keda e dua?

¹ Me yacova mai nikua, era se kurabuitaka ga e levu na iwalewale maqosa ni nona sauma na taro o Jisu. Nida tarogi tale ga ena veimataqali taro ena cakacaka vakavunau, eda na saga tale ga meda vakatotomuri Jisu.​​—⁠1 Pita 2:​21.

2. Ena laulau vakacava nomu saunitaro?

² Vakarorogo Taumada: E dau vakasamataka o Jisu na ivakarau ni nodra rai na tarogi koya. Ena so na gauna ena vinakati meda taro me rawa nida kila kina na nodra nanuma na tarogi keda. Ni dua e taroga, “O vakabauti Jisu?” ena rairai via kila na vuna eda sega ni solevutaka kina na Kirisimasi. Ke da vakasamataka na inaki ni nona taro ena laulau na noda ivakamacala.​​—⁠Luke 10:​25-​37.

3. Na idusidusi cava eda rawa ni vakayagataka meda sauma kina vakaivolatabu na taro?

³ Vakayagataka na iVolatabu: Ena vinaka mo dau vakayagataka na iVolatabu ena nomu sauma na taro. (2 Tim. 3:​16, 17; Iper. 4:​12) Na ivola na Reasoning kei na ivola “Usutu Vakaivolatabu me Veivosakitaki” e tiko ena New World Translation of the Holy Scriptures, e yaga sara vakalevu ni vakarautaka na isaunitaro dodonu. Ke sega mada ga ni lauti koya e taro na veidusimaki vakaivolatabu, o na saga mo vakamacalataka vakamaqosa vua na ivakavuvuli vakaivolatabu. Vakauqeti koya me vakasamataka vakatitobu na dina ni ka e vakamacalataki ena iVolatabu. Ke da vakatotomuri Jisu, ena vaka na “moli koula e na kato siliva” na noda isaunitaro​​—⁠ena dokai, veilauti, qai yaga dina.​​—⁠Vkai. 25:⁠11.

4. Na gauna cava soti ena vinaka kina meda yalana na ka eda tukuna?

⁴ Meda Sauma Beka na Taro Kece? Ke da sega ni kila na isau ni dua na taro, kua ni madua na tukuna: “Au sega ni kila, ia au rawa ni vakekeli, au na mai tukuna tale vei kemuni na kena isau.” Na yalomalumalumu kei na veikauaitaki va qori ena uqeti koya na itaukeinivale me sureti iko mo lesu tale yani. Ke o siqema ni vaqara veiba, vakatotomuri Jisu ena nomu yalana na ka o tukuna. (Luke 20:​1-8) Ke o sotava tale ga e dua e sega ni kauaitaka na veika dina o tukuna qai via veiba, tinia ena veidokai na veivosaki qai vaqarai ira tale eso na via rogoca na ka o tukuna.​​—⁠Maciu 7:⁠6.

5. Na ivakaraitaki cava i Jisu meda vakatotomuria ena noda sauma na taro?

⁵ E kila o Jisu ni bibi nona nuitaki Jiova me qai vakayacora vinaka kina nona ilesilesi me “dautukuna na ka dina,” e okati kina nona sauma nodra taro na vinakata dina na kena isau. (Joni 18:37) E dua dina na ka dokai meda vakatotomuri Jisu ena noda sauma nodra taro o ira na “vakarau tu me vinakata na bula tawa mudu”!​​—⁠Caka. 13:⁠48.