Ka me Nanumi ena Soqo ni Tikina

◼ Porokaramu ni Soqo: Ena qai tukuni tale yani na gauna ena tekivu qai oti kina na soqo ena siga yadua. Ni sa rogo na ivakatagi, e dodonu meda sa dabe kece me rawa ni tekivu vinaka na porokaramu.

◼ iDabedabe: Me maroroi ga na nodra idabedabe o ira eda vodo vata ena motoka se o ira eda tiko vata e vale.

◼ iVakasigalevu: Yalovinaka kauta ga mai na kemu ivakasigalevu, kua ni biuta na vanua ni soqo mo lai vaqara na kemu ivakasigalevu. Ena vinaka me vakayagataki na katoniwaililiwa lalai e rawa ni biu toka ga ena ruku ni idabedabe. E sega ni vakatarai ena vanua ni soqo na bola ni kakana lelevu e dau vakayagataki ena vakatakakana, na bilo se itawatawa ni kakana lase se iloilo, na yaqona ni valagi kei na yaqona ni Viti.

◼ Cau: Eda rawa ni vakaraitaka na noda vakavinavinaka ena noda dau cau ena Kingdom Hall se nida tiko ena soqo ni tikina. Ke vakayagataki na jeke ena cau ina soqo ni tikina, me qai volai kina na “Jehovah’s Witnesses of Fiji.”

◼ Vakacalaka kei na Leqa Tubukoso: Ke mani yaco e dua na vakacalaka ena soqo ni tikina, sa kerei moni tukutuku vua e dua na dauveivukei e tu voleka, ena qai raici iratou sara vakatotolo na Tabana ni Veiqaravi Taumada. Ena gole mai e dua e kenadau me dikeva na leqa kei na veiqaravi ena rawa ni caka.

◼ Fomu (S-43)-FN): Me vakayagataki na fomu Kerekere me Lai Sikovi (S-43 FN), nida vunau tawalokuci vua e dua na tataleitaki ena soqo ni tikina. Mera kauta tiko yani na dautukutuku ina soqo ni tikina e dua se rua na fomu qo. Ena tiko tale ga na fomu qo ena Tabana ni iVola. Na fomu e sa vakaleweni oti me soli ina Tabana ni iVola se soli vua na vunivola ni ivavakoso o lewena.​—⁠Raica na Noda Cakacaka Vakaitalatala, Feperueri 2005, t. 6.

◼ Valenikana kei na Otela: Me vakarokorokotaki na yaca i Jiova ena noda itovo nida tiko ena valenikana se otela ena gauna ni soqo ni tikina.

[Kato ena tabana e 3]

O sa Vakarau tu ina Soqo ni Kana Magiti Vakayalo?

¹ E levu na ka e dau caka ni vakarautaki e dua na soqo ni kana magiti. E oka kina na voli ni kakana, vakasaqari ena kena iwalewale me taleitaki kina, maqosataki tale ga na kena lai vakarautaki ena vanua ni kana. Na vanua mada ga ni soqo ena vinakati me tuvanaki vakamatau. O ira tale ga na vulagi ni soqo e vinakati mera vakavakarau, vakabibi ke balavu na nodra ilakolako ina vanua ni soqo. Io, e levu dina na ka me caka. Ia eda sega ni kauaitaka ya nida vakasamataka na kakana totoka eda na lai marautaka kei ira na noda itokani kei na noda vuvale. Sa da vakanamata tale tu qo na tamata i Jiova e veiyasai vuravura ina dua na soqo ni kana magiti vakayalo​​—⁠na Soqo ni Tikina e kena usutu, “Yadra Tiko!” Levu sara na ka sa vakayacori ena vakarautaki ni porokaramu kei na so tale na ka me baleta na soqo eda sureti kece kina. Ia ena yaga wale ga vei keda na soqo ke da tiko kina. E bibi gona meda vakavakarau vinaka kece.​​—⁠Vkai. 21:⁠5.

² So Tale na Ka me Caka: O sa vakadeitaka ni o na tiko ena siga tolutolu ni soqo? Ke gadrevi mo drau veivosakitaka kei nomu boso ni cakacaka, tukuna vua ni o na tiko ena siga tolutolu ni soqo. O sa vakadeitaka nomu ilakolako ina vanua ni soqo kei na vanua o na vakaicili kina? Ke ra gadreva na veivuke na itabaqase, o ira na malumalumu se o ira tale na so, mera raica na qase ni ivavakoso me vakayacori na ka era gadreva.​​—⁠Jere. 23:4; Kala. 6:​10.

³ Saga mo yaco totolo ena vanua ni soqo e veisiga, mo sa dabe rawa toka ni bera ni tekivu. Raica rawa na porokaramu ena vica na miniti ni se bera ni tekivu na soqo. Ni o cakava qori, o sa vakarautaka tiko na lomamu ina itukutuku ena talaucaki mai. (Esera 7:​10) Ni tukuna o jeameni sa na tekivu na ivakatagi, vakarogoca sara, nanamaki tale ga ina kena tekivutaki na soqo ena sere kei na masu.

⁴ Era na vakadeitaka na itubutubu mera vakarorogo vinaka na luvedra ena porokaramu ke ra dabe vakavuvale. (Vkru. 31:12) Eda uqeti kece meda cega noda iVolatabu, da vakamuria ni wiliki. O na vakatudaliga matua ke o vakavola na ka o rogoca. O na sega tale ga ni guilecava na veitikina bibi ena ivunau. Me kua na veitalanoa sega na betena se na veilakoyaki vakaveitalia ni vakacagau tiko na porokaramu. Ke o vakatalevoni, me kua ni vakawelei iko se vakasosataki ira na dabe tikivi iko. Ni oti na soqo ena siga yadua, veivosakitaka kei ira eso tale na ka o vulica ena porokaramu.

⁵ E sega ni vakilai e vuravura na duavata kei na veilomani vakaveitacini e dau laurai ena noda soqo ni tikina. (Same 133:​1-3; Mari. 10:​29, 30) Mo vakaliuliu gona ni vakabula vei ira na dabe tikivi iko, veitalanoa tale ga kei ira ena gauna ni vakasigalevu. O na rawa ni cakava ga qori ke o kauta yani na kakana mamada ga, o tiko tale ga ena vanua ni soqo, sega ni o lai vaqara vakasigalevu e valenikana. Kua sara ni vakawalena na gauna eso o rawa ni veivakayaloqaqataki kina, me vaka na gauna ni vakasigalevu.​​—⁠Roma 1:​11, 12.

⁶ iSulusulu: E tiko na vuna a vakarota kina o Jiova mera cula na Isireli ena nodra bele ni isulu na iukuuku, e dua na wa pelu. (Tiko 15:​37-​41) Qori mera kua kina ni guilecava ni digitaki ira o Jiova mera qaravi koya. Na rakorako kei na kilikili tale ga ni noda isulusulu ena soqo ni tikina e vakaduiduitaki keda mai na kena e takalevu tu e vuravura. E rawa sara ga ni vunau na noda isulusulu vei ira na vakararai tu, ena gauna mada ga eda lai vakayakavi kina e valenikana ni oti na porokaramu. E bibi gona meda vakasamataka sara vakavinaka na isulu eda tokara.

⁷ Vunau: Ke o lalawa vakailiu, o na rawa ni vunau ena gauna ni soqo. Kena ivakaraitaki, erau gole i valenikana kei watina e dua na tacida ni oti na porokaramu. A dusia na nona lapel card qai taroga e dua na weita (waiter): “O sa bau raici ira e levu era tokara tu qo?” A vakaio na weita, a via kila tale ga na ibalebale ni ka era tokara tu. Ratou mani veitalanoa sara, a sureti koya tale ga na tacida ina soqo ni tikina.

⁸ Era na vakaitavi na tacida ena ivunau, veitarotarogi, kei na vakatasuasua. Ia e iTaukei ni soqo ni kana magiti vakayalo e dau vakarautaki e veiyabaki, na Tamada vakalomalagi o Jiova. (Aisea 65:​13, 14) Noda tiko ena siga tolutolu ni soqo kei na noda vakayagataka vinaka na kakana vakayalo kece e vakarautaki kina, e vakaraitaka nida doka na nona veisureti na itaukei ni soqo. Vakacava o vakadeitaka ni o na sega ni calata na soqo ni kana magiti vakayalo qo?

[Questions]

1. Na cava soti e dau vakarautaki me baleta e dua na soqo ni kana magiti?

2. Na cava meda cakava me rawa nida tiko ena siga tolutolu ni soqo?

3. Na cava eso na ka me nanumi ni bera ni tekivu na porokaramu e veisiga?

4. Ena yaga vakacava vei keda vakavuvale na porokaramu?

5. Na cava e dua na ka e dau laurai ena noda soqo ni tikina, na cava meda cakava me rawa nida veivakayaloqaqataki kina?

6. Na cava meda nanuma tiko me baleta na noda isulusulu?

7. Eda na rawa ni vunau vakacava ena gauna ni soqo ni tikina?

8. Eda na vakaraitaka vakacava nida doka na iTaukei ni soqo, o Jiova?