‘Me Serau na Nomuni Cina’
1. Na cava e bibi meda wasea?
1 Ni kida na mataka me yacova ni karobo na vanua, e vakalagilagi na Kalou o Jiova ena totoka ni rarama. Ia e dua tale na mataqali rarama e uqeti ira kina na nona imuri o Jisu mera taukena—oya na “rarama e veivakabulai.” (Joni 8:12) E isolisoli talei i Jiova na rarama vakayalo qori qai salavata mai kei na itavi bibi. A vakavulica o Jisu: “Me serau vaka kina na nomuni cina, mera raica na tamata,” ena yaga qori vei ira tale eso. (Maciu 5:16) Ni butobuto tu vakayalo na vuravura qo, sa qai bibi ga ena gauna qo me wasei na rarama vakayalo! E rawa vakacava ni serau na noda rarama me vakataki Jisu?
2. A vakaraitaka vakacava o Jisu ni bibi me wasei na rarama vakayalo?
2 Cakacaka Vakavunau: A vakayagataka o Jisu na nona gauna, nona igu kei na veika e taukena me vakatakila kina na rarama ni ka dina vei ira na lewenivanua ena nodra itikotiko, vanua ni veivoli, veiulunivanua—se na vanua cava ga era tu kina. E kila ni na yaga tawamudu na veivakararamataki ni ka dina vakayalo. (Joni 12:46) Mera kila tale e levu na rarama qori, a vakavulici iratou kina na nona tisaipeli o Jisu me ratou “rarama kei vuravura.” (Maciu 5:14) A serau na nodra rarama nira caka vinaka vei ira tale eso ra qai wasea na ka dina vakayalo.
3. Eda na vakaraitaka vakacava nida marautaka mai vu ni lomada na rarama ni ka dina?
3 Era raica vakabibi na tamata ni Kalou na kena vinakati mera “bula tiko me vaka na luve ni rarama,” era vunau tale ga ena vanua cava ga era tu kina na tamata. (Efeso 5:8) Nida wilika e matanalevu na iVolatabu se so tale na ivola vakaivolatabu ena gauna ni vakacegu e koronivuli se vanua ni cakacaka, e rawa ni tekivu kina na veivosaki ena iVolatabu. A cakava qori e dua na tacida goneyalewa e koronivuli, mani tauyavutaka kina e dua na vuli iVolatabu, e solia tale ga e 12 na ivola vei ira na nona lewenikalasi!
4. Na cava e okati kina ena ‘serau ni noda rarama’ na noda itovo vinaka?
4 iTovo Vinaka: Na serau ni noda rarama e okati tale ga kina na noda itovo e veisiga. (Efeso 5:9) E dau laurai levu na noda itovo na lotu vaKarisito e vanua ni cakacaka, koronivuli, se so tale na vanua era tu kina na tamata, qai wasei rawa kina na ka dina ena iVolatabu. (1 Pita 2:12) Kena ivakaraitaki, ni raica na nona itovo vinaka e dua na gonetagane yabaki lima na nona qasenivuli a kacivi rau sara na nona itubutubu. A kaya: “Se qai vakadua meu raica e dua na gone e kila vinaka na ka e dodonu kei na ka e cala!” Io, na cakacaka vakaitalatala kei na noda itovo vinaka ena vagolei ira mai eso tale ina “rarama e veivakabulai” qai vakalagilagi kina na Kalou.