O Rawa ni Vunau ena Sigatabu?
1. Na cava eda vulica ena ka e cakava mai Filipai o Paula kei ratou na nona itokani?
1 Ena Siga ni Vakacecegu era vakacegu tu kina e levu na Jiu e Filipai, e sikova yani na siti qori o Paula kei ratou na nona itokani ena dua na nodratou ilakolako vakaulotu. E donu vinaka ke ratou cegu ena vunau ena siga oya, ena rairai sega tale ga ni dua ena vakalewai ratou. Ia eratou kila nira dau gole yani na Jiu ina taudaku ni siti mera masu, eratou mani vakayagataka na gauna oya me ratou vunau kina vei ira. Sa wacava na nona marau o Paula kei ratou na nona itokani ni vakarorogo o Litia ratou qai papitaiso vakavuvale! (Caka. 16:13-15) Nikua, e gauna vinaka tale ga ni vunau na Sigatabu ni levu era dau vakacegu kina.
2. Na veika dredre cava era vosota na tamata i Jiova me kua ni saqati kina na vunau ena Sigatabu?
2 Sasaga me Baleta na Vunau ena Sigatabu: Era uqeti ena 1927 na tamata i Jiova mera saga mera bau vakaitavi ena cakacaka vakaitalatala ena Sigatabu. E totolo sara na kena saqati qori. Era vesu e levu e Merika nira beca na lawa ni Sigatabu, era veivakasosani ra qai volivolitaki vakailoa. Ia era sega ni soro na tamata i Jiova. Ena veiyabaki ni 1930, era dau sota na dautukutuku ena ivavakoso voleka ra qai “wasewasei vakailawalawa” mera vunau ena dua na yalava. Nira vesu ena so na gauna na dautukutuku, era dau sega ni tarova rawa na vakailesilesi na nodra cakacaka nira sa rui le levu. O marautaka na nodra sasaga na tacida qori me kua ni saqati kina na noda vunau ena Sigatabu?
3. Na cava e siga vinaka kina ni cakacaka vakaitalatala na Sigatabu?
3 Siga Vinaka ni Vunau: E levu era dau tiko e vale ena Sigatabu nira sega ni cakacaka. Qori e gauna ni nodra vakacegu. Eso na daulotu era na via veivosakitaka ena siga qori na veika me baleta na Kalou. Ke da dau soqoni ena Sigatabu, e macala ga nida na tokara na isulu eda rawa ni dara tale ga ena cakacaka vakaitalatala, e rawa gona nida lalawataka meda vunau ni bera na soqoni se ni oti. Ke gadrevi, o rawa ni kauta toka e dua na kakana mamada.
4. Ena yaga vakacava na noda saga meda bau vakaitavi ena cakacaka vakaitalatala ena Sigatabu?
4 Ke da saga mada ga meda vakaitavi ena cakacaka vakaitalatala ena Sigatabu, e se tiko ga na gauna meda vakacegu kina. Eda na lomavakacegu, eda na marau tale ga nida vakaitavi ena veiqaravi tabu. (Vkai. 19:23) De dua eda na sotava e dua e vakataki Litia, qori ena vakamarautaki keda tale ga!