iVola Mai na iLawalawa Dauvakatulewa

Vei Kemuni na Taci Keitou Lomani:

Keitou marau ni volavola yani vei kemuni na taci keitou vakayalo oni yalodina voli ena nomuni qaravi Jiova, sa sivia qo e vitu na milioni na keda iwiliwili. Nida sota kei na tacida mai na dua tale na yasa i vuravura, e vakavolekati keda na noda veilomani. (Joni 13:34, 35) Qori tale ga na ka eda na vakila nida wilika na italanoa veivakauqeti ni nodra vakabauta kei na yalodina na tacida e veiyasa i vuravura e volai ena Yearbook ni yabaki qo.

Ni laurai na ripote mai na veiyasa i vuravura, e levu vei kemuni oni qacoya tiko na Sokalou Vakavuvale. Ke oni vakaluveni lalai, oni sa na kila toka eso na iwalewale vovou ni veivakavulici mera taleitaka kina na luvemuni na vuli. (Efeso 6:4) Era veivolekati tale ga na veiwatini nira vulica vata na iVolatabu. (Efeso 5:28-33) Se da mani cakava yadua se vakavuvale, eda sa na vakila tiko ena gauna qo na yaga ni ituvatuva qori meda vulica kina vakatitobu na Vosa ni Kalou.—Josua 1:8, 9.

Keitou nanumi kemuni vakalevu na vakaleqai ena leqa tubukoso ena dua na gauna lekaleka sa oti. Oni vakavinavinakataki ke oni dau tu vakarau moni veivuke ena cakacaka ni vakacoko ena gauna ni leqa tubukoso. (Caka. 11:28-30; Kala. 6:9, 10) Kena ikuri, eso vei kemuni oni dau vakaliuliu moni vukei ira na tacimuni ena ivavakoso ni oni raica nira gadreva na veivuke vakayago. Oni vakataki Tokasa e volaitukutukutaki ena iVolatabu, oni “dau cakacaka qai dau soli ka.” (Caka. 9:36) Moni nuidei ni kila vinaka tu o Jiova na veika oni cakava, ena saumi kemuni kina.—Maciu 6:3, 4.

Eso vei kemuni oni tu ena vanua era saqata kina na nomuni dodonu o ira era vakatanitaka na lawa mera ‘vakayacora kina na ka ca ena lawa.’ (Same 94:20-22) Ia oni yaloqaqa ga, oni vosota qai nuitaki Jiova me nomuni idrodro, ni oni kila sa parofisaitaka tu o Jisu ni na yaco na veivakacacani va qori. (Joni 15:19, 20) Moni nuidei ni keitou dau cavuti kemuni ena neitou masu ni oni saga tiko ga “moni vakamacalataka nomuni inuinui vei ira kece era taroga.”—1 Pita 3:13-15.

E sega ni cegu na nona uqeta o Setani na itovo torosobu kei na itovo dukadukali, ia keitou vakacaucautaki kemuni na le milioni vakacaca oni saga me savasava tiko ga na nomuni itovo e veiyabaki. Sa qai torosobu ga na ivalavala ena vuravura qo, ia oni “vakaukauataki tiko ga ena nona cecere na Turaga kei na nona qaqa.” (Efeso 6:10) Ni oni “vakaiyaragi ena iyaragi kece ni Kalou,” oni vorata rawa kina na “ivadi ni Tevoro.” (Efeso 6:11, 12) Nanuma tiko ni rawa ni sauma o Jiova na veibeitaki i Setani ena nomuni ivakaraitaki!—Vkai. 27:11.

Keitou marautaka sara ga nira tiko e 19,374,737 ena iVakananumi ni nona mate na Turaga ena 2011. A rawa tale ga na iwiliwili levu qori ena nomuni ciqoma na veisureti moni painia veivuke ena Epereli ni yabaki sa oti. Era rogoca rawa kina e milioni e veiyasa i vuravura na noda duavata ni vakalagilagi Jiova na nona iVakadinadina yalodina! (Roma 10:18) Ke o dua vei ira na 2,657,377 era painia veivuke ena vula oya se o saga mo vakalevutaka na nomu cakacaka vakaitalatala, oni vakamarautaka dina na iLawalawa Dauvakatulewa ena nomuni soli kemuni vakarawarawa kei na nomuni gugumatua.—Same 110:3; Kolo. 3:23.

Ena yabaki sa oti, era le 263,131 na tacida vou era yalataka na nodra bula vei Jiova. Keitou vakavinavinakataki Jiova kina, oni vakavinavinakataki tale ga ena nomuni veisureti tiko ga vei ira eso tale ena nomuni kaya: “‘Mai!’ Me kaya tale ga o koya yadua e rogoca: ‘Mai!’ Me lako mai o koya yadua e karamaca; me mai gunuva wale na wai ni bula o koya yadua e vinakata.” (Vkta. 22:17) Nida vakasamataka na veika eda se qai rogoca ga ena soqo ni tikina ni 2011 me baleta na Matanitu ni Kalou sa tauyavu oti, sa qai gu ga na lomada meda tukuna, ‘Me yaco mai na Matanitu ni Kalou!’ Ni uqeti keda na nona tukuna o Jisu “au na lako totolo yani,” eda duavata kei na yapositolo o Joni ena noda tukuna mai vu ni lomada: “Emeni! Ni lako mai, Turaga Jisu.”—Vkta. 22:20.

Nida yadrava tiko na veika vakasakiti sa vakarau yaco qori, moni nuidei ni keitou lomani kemuni yadua na taci keitou lomani, oni vakaraitaka tiko ni ‘dina qai vakavotukana’ na nomuni lomani Jiova!—1 Joni 3:18.

Tacimuni,

iLawalawa Dauvakatulewa ni iVakadinadina i Jiova