Na Veivakalougatataki Maivei Jiova sa ia na Veivakavutuniyautaki
1 E vakaraitaka o Jisu na ka e dodonu me bibi duadua vua na lotu vaKarisito. (Maciu 6:33) Noda vakaliuca na Matanitu ni Kalou eda na vakalougatataki kina ena veigauna se bera mai. Nida vakayagataka na noda gauna, kaukaua kei na noda iyau ena vakaliuci ni Matanitu ni Kalou, eda sa binia tiko kina na noda “iyau mai lomalagi” ena sega ni oti rawa. (Maciu 6:20, 21) Ke mani vakilai na leqa vakailavo, ena sega ni yali na keda irogorogo vinaka eda bucina kei Jiova.
2 Nida dikeva na veivanua e qarava na noda valenivolavola ni tabana, eda vakadinadinataka kina na veivakalougatataki i Jiova. E rawati e dua na tubu vakasakiti ena loma ga ni lima na yabaki sa oti. (Aisea 60:22) Na cava mo cakava mo vakalougatataki kina vakalevu?
3 Cakacaka Vakapainia: E sa qai torosobu ga na ituvaki ni veika vakailavo, ia e tubu tiko ga na kedra iwiliwili na painia. Ena lima ga na yabaki sa oti qo, e vakaruataki na iwiliwili ni painia tudei e Viti kei Kiribati. Vakacava mo kerea nona veivuke e dua na painia gugumatua se na ivakatawa ni tabacakacaka ena ka mo cakava mo rawa ni painia? Ena tadola e levu tale na itavi lavotaki ke o sa painia tudei rawa; me vaka na nomu sureti ena Vuli ni Painia, se veiqaravi vakalekaleka vakapainia Lavotaki. Ni toso na gauna ena ganiti iko eso tale na tabana ni vuli vakalou me vaka na Koronivuli ni Vuli iVolatabu ni Tagane Dawai, Koronivuli ni Vuli iVolatabu ni Veiwatini kei na Koronivuli o Kiliati.
4 Tara Vale ni Soqoni: Ena loma ni va na yabaki sa oti, a tara rawa e ciwa na Vale ni Soqoni vou qai vakavinakataki tale e rua e sa tiko rawa. Era kaya na tacida era soli ira mera veivuke ena cakacaka qo, ni qo e dua na ka marautaki duadua mera bau cakava. Era vulica kina e levu na kila ni tara vale kei na ivakarau ni cakacaka vata. Vakacava mo kerea e dua na fomu ni Kingdom Hall Volunteer vei ratou na qase ni nomu ivavakoso?
5 Veiqaravi e Peceli: Ena so na gauna, era dau sureti eso mera veiqaravi e Peceli kei na Tabana ni Vakadewa e Kiribati kei Tuvalu. Era na tauri e liu na painia gugumatua mera qarava na itavi qori. Kuria qori, na ituvatuva vakayalo kei na veivakavulici e Peceli ena uqeta e dua me tubu vakayalo qai rawa ni vakayagataki sara vakavinaka ena isoqosoqo i Jiova. Vakacava mo drau veitalanoataka mada kei na ivakatawa ni tabacakacaka na veiqaravi qori?
6 Vanua e Sega ni Lesi: Ni oti e 23 na yabaki, a lesu i nona yanuyanu e dua na tacida yalewa painia e Kiribati, qai tomani koya tale ga na nona itokani painia. E tarai koya dina na nodra vakarorogo vinaka na lewenikoro. Vakacava, e rawa ni dou vakayagataka vakavuvale nomudou gauna ni gade mo dou sikova eso na yalava e sega ni lesi ena dua se vica na macawa? Tovolea mo veitalanoa kei ratou na qase ni nomu ivavakoso ke o via vakaitavi ena cakacaka qo.
7 Veiqaravi ena Vanua e Gadrevi Kina na Cakacaka: A vakavulici keda o Jisu meda masuta me levu tale mai na tamata cakacaka ena tatamusuki vakayalo qo. Vakacava o dou rawa ni soli kemudou vakavuvale ina cakacaka qo? (Maciu 9:37,38) O rawa ni bula rawarawa mo lako ina vanua e gadrevi vakalevu kina na veivuke? Vakacava mo veitalanoa kei na ivakatawa ni tabacakacaka mo kila na vanua ena nomudou tabacakacaka e gadrevi vakalevu kina na veivuke?
8 Duatani tale na vosa: Ni sovaraki oti na yalo tabu ena Penitiko 33 S.K., e vukei ira na mataveitacini mera vosataka e dua tale na vosa me rawa ni tete kina na itukutuku vinaka. Nikua tale ga, e solia nona yalo tabu o Jiova vei ira na vulica vagumatua tiko e duatani tale na vosa me rawa nira vunau kina vei ira eso tale. Ena lima na yabaki sa oti, e tauyavu rawa e va na ivavakoso kei na rua na iwasewase lailai ena vosa vakaIdia. E tauyavu e Suva e dua na ivavakoso levu vakaRotuma, tauyavu tale ga na iwasewase ena vosa vagalu kei na vosa vakaJaina. E lewe levu era sa vulica tiko e Tuvalu na vosa vagalu mera vunau kina vei ira na didivara. Vakacava o rawa ni o vulica e duatani tale na vosa me vakatetei kina na itukutuku vinaka?
9 Saga mo Vakalougatataki: Eda kila ni vinakata sara ga o Jiova me sa vakatotolotaki na cakacaka e Viti, Kiribati, Tuvalu kei Nauru. Na kaukaua ga ni yalona tabu e uqeti ira na nona tamata mera soli ira. O ira sara ga qori era vakadinadinataka na vosa i Jisu: “E marau vakalevu o koya e solia na ka, vakalailai o koya e taura na ka.” (Caka. 20:35) Ena gadrevi meda na vakuai keda. Vakacava eda rawa ni solia noda igu me rawa nida vakila na veivakalougatataki i Jiova? (Vkte. 32:24-26) Na cava o na cakava? Meda kaya mada ga ena nuidei: “Koi au oqo; mo ni talai au.” (Aisea 6:8) Ke da cakava qori, eda na tamata vutuniyau duadua e vuravura.