Vakatotomuria na Parofita o Joeli
1. Eda na vakatotomuria vakacava na yalomalumalumu i Joeli nida vunau?
1 O cei mada na parofita o Joeli? E tukuna o Joeli ni o koya e “luve i Pecueli.” (Joeli 1:1) E dau vakabibitaka ga na parofita yalomalumalumu qo na itukutuku i Jiova, e sega ni vakabibitaka nona itavi ni dua na italai. Nida vakaitavi tale ga ena cakacaka vakaitalatala, meda vakabibitaki Jiova ga kei na nona Vosa sega nida qara rogo se meda vakacaucautaki. (1 Kor. 9:16; 2 Kor. 3:5) Ena uqeti keda tale ga na itukutuku eda kacivaka. Na tikina cava ena parofisai i Joeli e rawa ni uqeti keda nikua meda gugumatua, me tiko tale ga na noda inuinui?
2. Ni sa voleka na siga i Jiova, na cava e dodonu me uqeti keda meda cakava?
2 “Sa Voleka na Siga i Jiova.” (Joeli 1:15): A volai qori ena vica vata na udolu na yabaki sa oti, ia eda bula donuya na gauna ena qai vakayacori vakaoti kina. Na kena torosobu tiko ga na ituvaki kei vuravura, na nodra wele kei na nodra veivakalialiai na tiko ena yalava, e vakadinadinataka nida sa bula tu ena iotioti ni veisiga ni ituvaki ca qo. (2 Tim. 3:1-5; 2 Pita 3:3, 4) Eda na vakaliuca ena noda bula na cakacaka vakaitalatala, nida sa kila tiko ni sa voleka sara na icavacava.—2 Pita 3:11, 12.
3. Na cava e sa qai bibi ga kina na cakacaka vakaitalatala nida sa volekata na veivakararawataki levu?
3 “Ko Jiova ena Nodrai Drodro na Nona Tamata.” (Joeli 3:16): Na yavavala e cavuti tiko ena tikinivolatabu qori, e rawa ni vakaibalebaletaki ga ena gauna e vakatau lewa kina o Jiova ena veivakararawataki levu. E veivakacegui na noda kila ni o Jiova ena vakabulai ira na nona tamata yalodina ena gauna ya. (Vkta. 7:9, 14) Nida vakaitavi ena cakacaka vakavunau da qai vakadinadinataka na veitokoni kei na nona veivakaukauataki o Jiova, qori ena vaqaqacotaka noda vakabauta kei na noda vosovoso qai vakarautaki keda ina veivakararawataki levu sa roro tiko mai.
4. Na cava eda marautaka da qai nuidei nida vakanamata ena veigauna se bera mai?
4 Era tukuna eso ni vakadomobula na itukutuku i Joeli, ia e solia vei ira na tamata ni Kalou na inuinui ni vakabulai. (Joeli 2:32) Meda vakanamata mada ga ena gauna se bera mai ena nuidei da qai gugumatua ni kacivaka na itukutuku vinaka ni Matanitu ni Kalou ena noda muria na Joeli 2:23: “Dou marau, ka rekitaki Jiova na nomudou Kalou.”