Vakatotomuria na iVakaraitaki i Osea
1. Na taro cava o rairai dau taroga?
1 ‘Na cava au na bolea meu vakuai au kina ena vuku i Jiova?’ De dua o dau taroga qori ni o vakasamataka vakatitobu na levu ni nona yalololoma kei na nona vinaka. (Same 103:2-4; 116:12) E yalorawarawa o Osea me vakayacora na veika e vakarota vua o Jiova, dina ni gadrevi me vakuai koya ena so na ka. Eda na vakatotomuri Osea vakacava?
2. Eda na vakatotomuria vakacava na ivakaraitaki vinaka i Osea ena nona gumatua ena vunau?
2 Vunau ena Veigauna Ca: Na itukutuku a kacivaka o Osea e vakatabakidua sara ga ina tini na yavusa e Isireli, qo na vanua sa voleka ni kawaboko kina na sokalou dina. O Tui Jeropoami II e cakava na veika ca ena mata i Jiova qai tomana na kena sokaloutaki na luve ni bulumakau matakau a vakaduria o Jeropoami I. (2 Tui 14:23, 24) O ira na tui era veiliutaki tarava era vakaleqa tale ga na bula vakayalo ena tini na yavusa kei Isireli me yacova nira sa vakarusai ena 740 B.S.K. A takalevu na sokalou lasu, ia e yalodina tiko ga o Osea ena nona veiqaravi vakaparofita me rauta ni 59 na yabaki. Vakacava eda rawa tale ga ni gumatua meda vunau e veiyabaki, dina nida tusaqati se nira sega ni kauai e levu?—2 Tim. 4:2.
3. E laurai vakacava na yalololoma i Jiova ena ivakarau ni bula i Osea?
3 Vakasamataka na Yalololoma i Jiova: A vakaroti Osea o Jiova me vakawatitaka e dua na “yalewa dautagane.” (Osea 1:2) A bukete na watina o Komera, e dua kina na luvena tagane, e muri a qai rua na luvena mai tuba. Nona yalorawarawa o Osea me vosoti watina, e vakaraitaka na levu ni nona lomani ira na Isireli murilomadra o Jiova nira veivutuni. (Osea 3:1; Roma 9:22-26) Vakacava eda rawa ni yalorawarawa meda kua ni nanumi keda ga, me vakatakilai kina na yalololoma i Jiova vei ira na matatamata kece?—1 Kor. 9:19-23.
4. Na cava eso na ka eda rawa ni vakuai keda kina ena vuku i Jiova?
4 Eso na dauveiqaravi i Jiova era vakuai ira mai na cakacaka saulevu me levu kina nodra gauna ena cakacaka vakaitalatala. Eso era sega ni via vakawati se vakaluveni nira via vakaliuca na veika me baleta na Matanitu ni Kalou. Nida vakasamataka na veika e sotava o Osea, eda na rairai kaya, ‘Au na sega tu ga ni rawata na ka e cakava o koya.’ Ia nida vakavinavinakataka vakalevu na yalololoma i Jiova da qai nuitaka na yalona tabu me vakaukauataki keda, ena rairai vakayagataki keda o koya ena sala eda sega ni tadra vakadua, me vakataki Osea.—Maciu 19:26; Fpai. 2:13.