Vesu ena Vuku ni Nodra Vakabauta—Ukraine

E voleka ni 30 na yabaki nodra vakila tiko na iVakadinadina i Jiova e Ukraine na yaga ni nodra dodonu ena lawa me baleta na cakacaka ni veiqaravi raraba. Qori e rawa kina vei ira mera cakava eso tale na tabana ni veiqaravi raraba, qai dei tiko ga ena nodra vakabauta.

Ia na tekivu ni ivalu e Ukraine ena ika24 ni Feperueri 2022, e laurai ni sega ni dua na lawa me baleta na veiqaravi raraba vei ira na vakasaurarataki. Era lai beitaki kina e vica vata na drau na tacida. Na ituvaki qori e vakalecalecavi kina na nodra vakabauta, kei na kena dokai na nodra dodonu yadua. E sega ni salavata kina kei na vakatagedegede ni dodonu ni lewenivanua kei na Yavu ni Vakavulewa e Ukraine. E tukuni kina: “Ke veisaqasaqa na ka vakaivalu kei na nona vakabauta e dua na lewenivanua, e dodonu me sosomitaka na cakacaka ni veiqaravi raraba (cakacaka e sega ni okati kina na vala).”

Me yacova mai na ika18 ni Julai 2025, ratou vesu e lima na tacida tagane ena vuku ni nodratou vakabauta, qai totogitaki me 60 na vula. Kuria ya, ratou sa wawa veilewai tiko e rua tale na tacida tagane.

Kauai na iSoqosoqo e Veiyasa i Vuravura

Eratou kauai tiko eso na vakailesilesi ni UN Special Rapporteur me baleta na kena sega ni vakarautaki na cakacaka ni veiqaravi raraba e Ukraine. Ena ika8 ni Noveba 2023, ratou veivosaki kei na matanitu o Ukraine, ratou kaya: “Keitou kauai vakalevu ena nodra beitaki tiko na sega ni via curu ena mataivalu ena vuku ni nodra vakabauta, wili kina o ira na valataka na nodra dodonu.”

Veitaravi ni Gauna

1. Julai 18, 2025

   Vesu e vitu na tacida.

2. Feperueri 24, 2022

   Biu na lawa ni mataivalu, qai tekivu na veivakasaurarataki.

3. June 23, 2015

   Tokona na Mataveilewai Cecere e Ukraine na veivakasaurarataki ni mataivalu ena kisi nei Vitaliy Shalaiko.

4. Tiseba 1991

   Vakadonui na Lawa ni Veiqaravi Raraba (Cakacaka Sega ni Okati Kina na Vala.)

5. Feperueri 28, 1991

   Vakadonui vakalawa na iVakadinadina i Jiova e Ukraine.