Na Rai ni iVolatabu

Na Vakabauta Dina—E Vakacava Sara Mada?

“KEVAKA SA SEGA NA VAKABAUTA SA KA DREDRE SARA ME DA VINAKA VUA NA KALOU NI KO IRA KECE GA ERA VIA TOROVA NA KALOU E DODONU ME RA VAKABAUTA NI SA BULA TIKO KO KOYA, KA NI SA DAU SAUMI IRA TALE GA ERA VAKASAQARAI KOYA.”​—IPERIU 11:6, VV.

NA CAVA sara mada na vakabauta? E so era kaya ni ka vakalotu na kena vakabauti ni tiko na Kalou, ia e sega ga na kena ivakadinadina ni bula dina tiko o koya. Na dauvolaitukutuku ni Mereke o H. L. Mencken e vakamacalataka vaka oqo na vakabauta, na “nuitaki na kena yaco na ka e dredre me yaco.” Oqo beka na vakabauta dina e tukuna na iVolatabu? E rui bibi meda kila vinaka se cava sara mada na vakabauta, baleta ni volai toka mai cake, ‘kevaka sa sega na vakabauta, sa dredre sara meda vinaka vua na Kalou.’

E kaya na iVolatabu: “Na vakabauta na noda kila deivaki ni na yaco dina na ka eda vakanuinuitaka.” (Iperiu 11:1, The New Testament in the Language of Today) E yavutaki na vakabauta ena kilaka dodonu, na veika dina ena yavutaki kina vakavinaka na vakatulewa. Sega ni vinakati meda vakabauta wale ga, ia e bibi na vuna eda vakabauta kina.

Me kena ivakaraitaki mada: O na kaya beka me baleti koya e dua na nomu itokani: “Au vakabauti koya. Au kila ni na vakayacora na ka e tukuna. Ena vukei au ke dua noqu leqa.” Ia o na sega ni kaya vaka oya me baleta e dua o se qai kilai koya ga ena loma ni dua se rua na siga, se vakacava? O na vakabauta ga e dua sa vakadinadinataki koya vakavica vata. E dodonu me vaka tale ga oqori na vakabauta vakalotu, e rawa kina na vakanuinui e vakadinati ni yavutaki ena ivakadinadina ena sega ni vakatitiqataki.

Vakabauta Dina se Vakanuinui Ina Bilo Cicila?

Levu na ka nikua e vakatokai me vakabauta, ia e sega ni vakabauta dina​—e totolo ga na kena vakabauti, e dina ni sega na kena yavu, e sega tale ga ni tiko na vuna vinaka. Vakavuqa me vu ga mai ena gauna e vusolo tu kina na lomada, se vu mai na rere vakalialia. Na vakabauta vaka oqo e sega ni yavutaki vinaka, baleta ni sega na kena yavu dei.

Na mataqali vakabauta vaka oqo ena rawa ni vakavuna me lai vakilakila kina e dua na ka ena yaco, ena sega sara ni duavata kei na dina ena iVolatabu. Na iVolatabu e vakarota me qarauni na mataqali vakabauta e sega na kena yavu: “O koya sa yalowai sa vakabauta na vosa kecega: ia na tamata yalomatua sa daulewa vakavinaka na nonai lakolako.” (Vosa Vakaibalebale 14:15) E vola na yapositolo o Paula: “Vakatovolea na ka kecega; taura matua na ka e vinaka.” (1 Cesalonaika 5:21) Sega ni tokona na iVolatabu na vakabauta e sega na kena yavu. E tokona ga na vakabauta e tiko na kena yavu.

Na noda vakaduiduitaka na vakabauta dina kei na kena e sega na kena yavu e rui bibi dina. Dina ni rawa vua e dua me daulotu, ia ena sega ga ni kena ibalebale ni sa tiko vua na vakabauta dina. E kaya o Paula: “Ni sa sega vei ira kecega na vakabauta.” (2 Cesalonaika 3:2) Ia e so e tiko vei ira na vakabauta e yavutaki ena iVolatabu, e tara nodra bula.

Na Vakabauta Dina e Qalini Rau Vata na Tamata Kei na Kalou

Na vakabauta e vaka na sinucodo ni nuidei kei na veivakabauti e qalini rau vata na tamata kei na Kalou. Na vakabauta vaka oqo e cakacakataki; e sega nida sucu vata mai. O na bucina vakacava na vakabauta dina oqo? E vakamacalataka na iVolatabu: “Sa yaco na vakabauta e na vuku ni kena rogoci na i tukutuku, ka sa yaco mai na i tukutuku e na kena vunautaki na Karisito.”​—Roma 10:17, VV.

O koya gona, e vinakati mo vagalalataki iko mo rawa ni kilai koya na Kalou kei na veika e vakatavuvulitaka na Luvena, o Jisu Karisito. Na kilaka oqo e vinakati kina na sasaga. (Vosa Vakaibalebale 2:1-9) E vinakati mo gumatua mo kila se cava e tukuna na iVolatabu mo rawa ni qai vakadinata na kena dina.

Ia, na vakabauta dina e sega ni kena tu ga vei keda na kilaka, se meda vakabauta ni dina e dua na ka. E okati tale ga kina na lomada​—na vanua e vu tiko mai kina noda vakatulewa. E kaya na Roma 10:10: “Ni sa vakadinata [se, “vakabauta,” NW] na tamata e na vu ni yalona.” (Neitou na matanivola kala.) Na cava e kena ibalebale oqo? Ni o vakananuma na veika vakalou, qai saga mo taleitaka, o sa vakalaiva na vosa ni iVolatabu me tara sara na lomamu. Dau tubu qai kaukaua na vakabauta ni sa vakamuai iko na vosa ni yalayala ni Kalou, ni o sa raica tale ga na ivakadinadina ni nona veivakalougatataki.​—2 Cesalonaika 1:3.

Sa dua na iyau talei na vakabauta dina! E yaga vei keda nida sotava na veika dredre, ena noda nuitaka ni na dusimaki keda na Kalou kei na nona vinakata me vakacegui keda ena veika eda gadreva. Kena ikuri, ni o koya na Luve ni Kalou, o Jisu Karisito, e dusia e dua na sala ena sega ni oti rawa kina na yaga ni vakabauta: “Ni sa lomani ira na kai vuravura vakaoqo na Kalou, me solia kina na Luvena e dua bauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawa mudu.” (Joni 3:16, neitou na matanivola kala.) Na bula tawamudu​—sa dua na iloloma talei me soli vei ira era vakabauta!

Na vakabauti ni vosa ni yalayala ni Kalou me vakalougatataki ira nona dauveiqaravi e solia tale e dua na bula vou. Ena Iperiu 11:6, e cavuti kina ni vakabauta dina e okati kina noda vakadinata ni rawa vua na Kalou me vakalougatataki ira “era sa dauvakasaqarai koya.” Sa qai macala ni vakabauta dina e sega ni mataqali vakabauta e sega na kena yavu, e sega ni kena vakabauti wale ga ni bula tiko na Kalou. E okati kina na noda ciqoma ni rawa vua na Kalou me vakalougatataki ira era vakasaqarai koya vagumatua. O vinakata dina mo kila na Kalou? Ke vaka kina e vinakati me tiko vei iko na kilaka dodonu e tiko ena nona Vosa, na iVolatabu, ena qai vakalougatataki na nomu vakabauta.​—Kolosa 1:9, 10.

[iTaba ni Credit Line ena tabana e 30]

Drawings of Albrecht Dürer/Dover Publications, Inc.