Na Vuli e Veivakabulai

“Na iVolatabu [na] idusidusi vinaka duadua ni bula.”​—Thomas Tiplady, 1924.

E SEGA ni vosa wale me tukuni ni vuli e yavutaki ena iVolatabu e rawa ni veisautaka na bula. E vakainaki kina na bula, e solia tale ga na inuinui vei ira na galili kei ira era lomaleqa tu. Dua na marama itubutubu ledua ena vanua o Namibia e vola ina valenitabana ni iVakadinadina i Jiova mai Sauca Aferika:

“Au sa yabaki 29, au a wilika na ivola Questions Young People Ask​—Answers That Work ena loma ni rua ga na siga. E tara sara ga na lomaqu me vaka niu sa rui galili dina. E mate ena dua na vakacalaka e gaunisala o noqu itau, e biuti au tu mai kei na rua na gone. Keitou sotava tiko e dua na bula dredre sara. Sa dau tubu mai ena noqu vakasama ena so na gauna ni na rairai vinaka cake meu vakamatei rau na gone oti meu qai vakamatei au. Ia na ivola oqo e qai veisautaka na noqu vakasama. Yalovinaka mo ni vukei au meu vuli iVolatabu sega ni saumi.”

Na iVolatabu e dua na ivoladusidusi e rawa ni vukei keda ena veibasoga ni noda bula kece​—ena veimaliwai vakavuvale, vaka cakacaka vata, vaka kina ena noda veimaliwai raraba kei ira na tamata. (Same 19:7; 2 Timoci 3:16) E momona ni dusimaka na ivalavala ni noda cakava na ka vinaka kei na noda levea na ka ca. E dua na ivola e tara sara ga na uto ni noda bula. Ni o sa wilika, o na kunea ni sinai tu kina na itukutuku e baleti ira na tamata era a bula dina. O na rawa ni vakadinadinataka na vuna e vakainaki kina na nodra bula e so ra qai marautaka, kei na nodra rarawataka ra qai vakaloloma tu e so tale. Sa na makare sara ga kina vei iko se na cava soti na veika yaga, vaka kina na veika era sega ni yaga.

Na Vuli e Veivakabulai Ena Gauna Oqo

E vakabibitaki ena iVolatabu na yaga ni vuku. E kaya: “Sa ka levu duaduaga na vuku; mo rawata mada na vuku.” (Vosa Vakaibalebale 4:7) E vakaraitaka tale ga vakadodonu ni dau lekati na vuku, e qai veivakasalataki: “Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata.”​—Jemesa 1:5.

E solia vakalevu vakacava na noda Dauveibuli, na Kalou o Jiova, na vuku? E vakayacora ena vuku ni nona Vosa na iVolatabu, e uqeti keda o koya meda wilika. E veisureti na Kalou: “Na luvequ, kevaka ko na vakabauta na noqu vosa, ka vunia na noqu vunau me nomu; mo vakatu daligamu kina ki na vuku . . . , ko na qai kila na rerevaki Jiova, ka kunea na Kalou mo kilai koya. Ni sa solia na vuku ko Jiova.” (Vosa Vakaibalebale 2:1, 2, 5, 6) Nida muria na ivakasala ena Vosa ni Kalou eda qai vakadinadinataka na kena yaga, eda sa na qai vakila ni umani koto kina na vuku vakalou.

Me kena ivakaraitaki na valuti ni bula dravudravua. E uqeta na iVolatabu na cakacaka vagumatua, ia e saqata na ivakarau ni bula e vakasabusabutaki kina na ka e taukeni. E laurai kina ni vakatavako, na gunuvi vakasivia ni yaqona ni valagi kei na yaqona ni viti, e veicoqacoqa kei na ivakavuvuli vakaivolatabu.​—Vosa Vakaibalebale 6:6-11; 10:26; 23:19-21; 2 Korinica 7:1.

Vakaevei na vakayacoka ni nodra dau veivakamuai na noda ilala? E kaya na iVolatabu: “Ena vuku mai ko koya sa malele vata kei ira na vuku: ia ko koya era veitokani vata kei na lialia ena rusa.” (Vosa Vakaibalebale 13:20) O sa bau vakadinadinataka ni veivakamuai ni vakailala e vakayacoka vei ira na tamata​—gone vaka kina na qase —ina daumateni, vakayagataki ni wainimate gaga, kei na ivalavala vakasisila? Io, ke da dau vakailala kei ira era dau cakava na veika oqo, eda na qai vakataki ira, me vaka ga na ka e kaya na iVolatabu: “Sa vakacala nai valavala vinaka na dautiko vata kei ira era sa ca.”​—1 Korinica 15:33.

O keda kece eda via marau. Eda na rawata vakacava oya? O kila tiko ni kaya na iVolatabu ni sega ni vu wale ga ni marau na iyau eda taukena, ia na rai dodonu ga vaka kina na veimaliwai se veiwekani, vakabibi na veiwekani vinaka kei na Kalou? (1 Timoci 6:6-10) O Jisu Karisito, ena nona iVunau rogo levu ena Ulunivanua, e kaya baleti ira era marau dina nira “kauaitaka na nodra gagadre vakayalo,” “yalomalua,” “via gunuva na ivalavala dodonu,” “dau loloma,” “yalosavasava,” ra qai “dau veisaututaki.”​—Maciu 5:1-9, NW.

Ni o vakananuma vakatitobu na ivakavuvuli ni iVolatabu, o na vakila na sala me na dusimaka kina na noda bula. Ni ivurevure ni ivakasala, e sega ni vakatauvatani rawa na iVolatabu kei na dua tale na ka. E yaga tu ga na kena ivakavuvuli​—e sega ni ka ni vakasama wale ga, ena sega vakadua ni veivakaleqai. Era vakadinadinataka na kena yaga o ira era muria na kena ivakasala.

Na Vuli e Veivakabulai

Ia, me ikuri ni kena yaga vei keda ena gauna oqo, e solia na iVolatabu na inuinui ni bula ena veigauna mai muri. E vakamacalataka na veisau vakaitamera ni veivakasavasavataki e vuravura ni na vukici me dua na itikotiko totoka me nodra o ira era qarava na Kalou. Dikeva mada na itukutuku rogorogo vinaka oqo ni veigauna mai muri: “Raica, sa tiko na vale ni Kalou, sa tiko vei ira na tamata! E na tiko vata kei ira ko koya ka ra sa na nona tamata. Na Kalou vaka i koya e na tiko vata kei ira ka na nodra Kalou ko koya. E na tavoya tani na wai ni mata kece ga mai na matadra ko koya, ka sa na sega tale na mate; sa na sega tale ga na rarawa se na tagi se na vutugu, ni ra sa takali tani na veika makawa.”​—Vakatakila 21:3, 4, VV; Vosa Vakaibalebale 2:21, 22.

Vakasamataka mada: E sa na sega tale na gone era tautauvimate, sa na oti vakadua na waloloi, sa na oti vakadua na veimate ca era dau veivakaleqai qai dau vakamalumalumutaka na yago, sa na oti vakadua na momosi! Na wainimata ni lomaleqa, ni rarawa, ni lolosi era sa na takali vakadua, nira sa na vakaoti vakadua na veika e dau vakavuna na veituvaki leqataki kece oqori. Ni sa na vakarusai ira vakadua na tamata ca na mataivalu agilosi ni Kalou, sa na sega ni bula tale tiko na daubutako, na daulaba, na tamata lasulasu, vaka kina o ira na dau veivakarerei. Era sa na taukena ga na nodra dui vale na tamata, era na marautaka tale ga na bula veisaututaki dina.​—Aisea 25:8, 9; 33:24; 65:17-25.

E rogo vinaka li oya? O via tomana nomu vulica na kena vakayagataki ena noda bula na ivakavuvuli vakaivolatabu me na rawa ni yaga vei iko ena gauna oqo kei na veigauna mai muri? Ke vaka kina mo qai veitaratara kei ira na iVakadinadina i Jiova, nira na marautaka mera okati iko kei na nomu vuvale ena ituvatuva ni “vuli e veivakabulai” era vakayacora tiko ena veivanua kece e vuravura.