Ra Taroga na iTabagone . . .

Ena Rogoca Beka na Kalou na Noqu Masu?

“Au dau masulaka vei Jiova na ka kece ga baleta ni keirau veitokani, au kila tale ga ni na vukei au ke dua noqu leqa.”​—Andrea.

SEGA tale ni vakatitiqataka o Andrea ni dau rogo masu na Kalou. Ia e sega ni itabagone kece era nuidei vaka oya. E so era sega ni via torova na Kalou nira nanuma nira sega ni veivolekati kei koya. De ra nanuma ni sega sara ga ni kauaitaki ira na Kalou, ena sega kina na betena mera masu vua.

Ena qai rawa ga ni vinaka na noda masu kevaka e caka na cava? Na kena isau rawarawa ga, meda vakavolekati keda sara vua na Kalou me noda itokani. A masuta na daunisame: “Era na vakararavi talega vei kemuni ko ira era sa kila na yacamuni.” (Same 9:10) Vakacava o iko? O sa kilai koya vakavinaka na Kalou mo na masuti koya kina ena nuidei? Kua mada ni tosoya nomu wiliwili, tovolea mo sauma na taro era tiko oqori ena kato e kena usutu “O Kilai Koya Dina na Kalou?” Raica mada se vica o rawa ni sauma.

O KILAI KOYA DINA NA KALOU? Kena isau e tiko ena taqana e 27

1. O cei na yaca ni Kalou, na cava e kena ibalebale?

2. Na cava na va na ka e kilai tani kina na Kalou me vaka e volai ena iVolatabu?

3. Na cava na ivakaraitaki uasivi duadua ni nona lomana na kawatamata na Kalou?

4. Na cava meda cakava meda veitokani kina kei na Kalou?

5. Nida masu, me vakacava na ivalavala ni noda masu?

Rawa beka ni o sauma sara ga oqo e vica na taro, dina ga ni o se bera ni wilika na lewe kece ni ivakamacala? Kevaka e rawa, ia o kilai koya cake na Kalou mai vei ira e levu tale. Ena dua tale na yasana, de dua o na raica ni gadrevi mo vakavinakataka na nomu veikilai kei koya, mo kilai koya vakavoleka sara. (Joni 17:3) Ni o vakasamataka tiko oya, raica mada oqo e vica na ka e vakatakila vei keda na iVolatabu me baleti koya “sa daurogoca na masu.”​—Same 65:2.

Drau Rawa ni Veivolekati Sara Kei na Kalou

Na imatai mada ni ka e dusimaki keda kina na iVolatabu oya ni Kalou e sega ni dua ena vulagi tu ga vei iko. E bula dina o koya qai tiko na yacana, o Jiova. (Same 83:18) Ena vosa vakaiperiu, na yaca oqori e kena ibalebale “Sa Vakavuna me Yaco.” Se mani cava e nona inaki, ena vakavuna ga o koya me yaco oqori. Ena sega ni cakava rawa oqori na igu wale ga! Ni o sa masu gona, mo kila tiko ni o sega ni vosa tiko ina dua na igu wale ga, se o vosa tiko ina cagi. O vosa sara tiko ga vua e dua e bula dina, e rogoci iko, ena cakava tale ga e dua na ka ena ka o masuta.​—Efeso 3:20.

E kaya kina o Daiana, e dua na goneyalewa: “Au kila ni na rogoci au o Jiova se gauna cava ga au masu kina vua.” Ena tiko vei iko na rai oqo kevaka wale ga o vakabauta ni bula dina na Kalou! E kaya na iVolatabu ni “o koya sa torova na Kalou e dodonu me vakabauta ni sa bula ko koya.”​—Iperiu 11:6.

iVurevure ni Vuku Kei na Kaukaua

Ena vukei keda dina na Kalou baleta ni rui vakatubuqoroqoro na nona kaukaua. E tawavakaiyalayala na kaukaua oya. Na kena ivakadinadina ga na vakaitamera kei na vereverea ni veika buli e tu oqo e vuravura kei na lomalagi. E kaya na iVolatabu ni o Jiova e kila vinaka na yaca ni kalokalo kece​—dina ga nira bilioni vakabilioni ra qai tawawiliki rawa! Kena ikuri, na kaukaua kece era tiko ena veikalokalo oqori e taka ga mai vei koya. (Aisea 40:25, 26) Sega li ni veivakurabuitaki oya? Ena vakatubuqoroqoro beka na veika oqori, ia e kaya na iVolatabu ni veika oqori era se “nonai valavala vakatikina” ga!​—Jope 26:14.

Vakasamataka tale ga na vuku tawavakaiyalayala i Jiova. E kaya na iVolatabu ni “ka titobu” na nona nanuma. (Same 92:5) E kilai keda cake vakavinaka o koya ni a buli keda ga. (Same 100:3) Ni “Kalou e sega ni tubu ka sega ni mudu,” e tawavakaiyalayala kina na ka e kila. (Same 90:1, 2) E sega ni dua na ka me sega ni kila.​—Aisea 40:13, 14.

E dau vakayagataka sara mada vakacava o Jiova na kaukaua levu kei na vuku e tu vua? E kaya na 2 Veigauna 16:9: “Sa veiraiyaki na mata i Jiova e vuravura taucoko, me totaki ira vakaidina sa dodonu na lomadra vua.” Se mani leqa vakacava o sotava, e rawa ni walia oqori na Kalou se vukei iko mo vosota. E nanuma lesu o Kayla, e dua na goneyalewa: “Wale tiko ga oqo, ni keitou sotava vakavuvale e dua na ka dredre, au a masu vei Jiova, ia au vakabauta ni vukei keitou o koya me keitou vosota rawa na gauna dredre oya. Ke sega, ke keitou sega ni vosota rawa.” Ni o torova na Kalou, o sa torovi koya tiko na ivurevure ni vuku. Sega tale ni dua na ka e uasivia na nomu cakava oqori!

Kalou Lewadodonu Qai Dau Loloma

Ia o kila ga vakacava ni via vukei iko na Kalou? Baleta ni loma i Jiova me vakatakilai koya vei keda, sega ena nona kaukaua vakaiyanaqa, se na nona vuku levu, se na nona dau lewadodonu mada ga, ia ena nona loloma ga, na ka e kilai tani duadua kina. E kaya na 1 Joni 4:8 ni “sa loloma na Kalou.” Ia na loloma levu sara ga oya e yavu meda nuidei kina ni na rogoci na noda masu. Na ivakaraitaki uasivi duadua ni nona loloma na nona solia na Luvena me isoro ni veivoli meda na rawata kina na bula tawamudu.​—Joni 3:16; 1 Joni 4:9, 10.

Ni dau loloma na Kalou, o na sega sara ga ni leqataka ni na vakalecalecavi iko se vakalolomataki iko. E kaya na Vakarua 32:4 “ni sa dodonu na nonai valavala kecega.” O kila ni na vakatudaliga na Kalou ina nomu kerekere baleta ni lomani iko. Eda nuidei kina meda vakatakila vua na ka e dui tu ena noda vakasama kei na lomada.​—Filipai 4:6, 7.

Me Nomu iTokani na Kalou

E sureti keda o Jiova meda vosa vua. E sega ni via vakavulagitaki koya vei keda. Nida raica na veitabagauna sa sivi, sa dau sureta e so mera nona itokani. O ira na donu vua na Kalou, era veitokani kei koya era wili kina na tagane, na yalewa, gone kei na qase. So vei ira oqori o Eparama, o Tui Tevita, kei Meri, na tina i Jisu.​—Aisea 41:8; Luke 1:26-38; Cakacaka 13:22.

O iko tale ga e rawa ni drau veitokani kei Jiova. Ia e sega ni kena ibalebale oqo mo sa raici koya na Kalou me vaka tu e dua o qai kaciva ga ni o sa vinakata e dua na ka se ni sa dua na nomu leqa. Sega ni tukuni meda sa vakaliuca tu ga na ka e baleti keda ena noda masu. Ke da via veitokani dina kei na Kalou, e bibi meda kauaitaka na lomana​—sega ni lomada ga​—oti oqori, meda qai cakava sara na loma ni Kalou. (Maciu 7:21) A vakavulici ira gona nona tisaipeli o Jisu mera vakaliuca ena nodra masu na veika e bibi vua na Kalou. A kaya: “Mo dou qai masu vakaoqo: Tama i keimami mai lomalagi, Me vakarokorokotaki na yacamuni. Me yaco na nomuni lewa. Me caka na lomamuni e vuravura me vaka sa caka mai lomalagi.” (Maciu 6:9, 10) Nida masu, e dodonu tale ga meda dau vakacaucautaka na Kalou da qai vakavinavinaka vua!—Same 56:12; 150:6.

Ia meda kua ni nanuma ni sega ni yaga meda masu baleta ni lailai sara se sega soti ni bibi na ka eda gadreva se leqataka. “E sega ni dredre na noqu dau talaucaka na lomaqu vua na Kalou,” e kaya o Siti, “ia so na gauna, au nanuma ni sega ni yaga meu vakasosani koya na Kalou ena veika e sega wale na betedra.” Ke dau vaka oqo na lomamu ena so na gauna, tovolea mo vakasamataka na ka a vakatavuvulitaka o Jisu vei ira na nona tisaipeli: “E sega li ni i sau wale ga ni lima na siparo e rua na sede? Ia e sega ni dua bulu na siparo e bau guilecavi e na mata ni Kalou. . . . Dou kakua kina ni rere, ni dou sa bibi cake vua na Kalou mai vei ira na siparo e vuqa.” (Luke 12:6, 7, VV) Veivakacegui dina na vosa oqo, se vakaevei?

O sa na raica rawa e ke ni levu ga ni nomu kilai Jiova, na levu tale ga ni nomu via torovi koya ena masu, vaka kina na nomu nuidei ni rawa ni vukei iko o koya, ia ena vukei iko sara ga. O koya gona, me vakacava na lomamu ni o sa masu vua na Kalou? E dodonu mo masu vua ena yalo vakarokoroko, yalomalumalumu, mo qai kua ni nanumi iko ga. O nanuma beka ni na rogoci iko e dua na vakailesilesi levu vakamatanitu ke o kerekere tu ga yani vakadokadoka o qai sega ni veirokovi? Mo kua gona ni kurabui ni namaka tale ga o Jiova mo dokai koya kei na nona ivakaro kevaka o vinakata me rogoci na nomu masu.​—Vosa Vakaibalebale 15:29.

Sa ra vulica e vica vata na udolu na itabagone era doka na Kalou na ka mera cakava mera sovaraka yani kina vua na lomadra. (Same 62:8) “Ni dau sauma na noqu masu o Jiova,” e kaya o Vereti, “e uqeti au oya baleta niu kila ni se noqu itokani tiko ga o koya.” Vakacava o iko? E rawa ni vaka tale ga oqori na nomu veitokani kei na Kalou? Oqo na nodrau vosa e rua na itabagone lotu Vakarisito:

Raijeli: “Au kila ni sala ga me keirau veivolekati kina kei Jiova oya meu vakatitobutaka na noqu vulica na nona Vosa, ia au saga tiko qo meu vakamatauna me dau va ya na noqu gadreva na vuli.”​—1 Pita 2:2.

Deini: “Noqu nanuma ni o na volekati Jiova vakalevu ke o vakaogai iko vakalevu ena nomu veiqaravi vua.”​—Jemesa 4:8.

O sa bau tu mo vakasamataka se cava sara mada na yaga ni masu? E kaya e dua na itabagone lotu Vakarisito: “Au na qai vakila ga niu voleka vua na Kalou kevaka e vosa mai vei au se me vakauta mai vei au e dua na itukutuku.” Ni sega ni dau vosa sara mai o Jiova me sauma na noda masu, na cava ga na yaga ni masu vei keda? Ena qai veivosakitaki na tikina oqo ena dua tale na itabataba e muri.

[Kato ena tabana e 27]

iSaunitaro era tarogi mai na taqana e 25

1. O Jiova. Kena ibalebale, “Sa Vakavuna me Yaco.”

2. Loloma, kaukaua, lewadodonu, kei na vuku.

3. A tala mai na Luvena e duabau ga a vakatubura me mai mate ena vukuda.

4. Meda kua ni kauaitaka ga na veika e baleti keda, ia meda kauaitaka se cava e loma ni Kalou da qai vakayacora sara.

5. E dodonu meda dau yalomalumalumu, dau vakarokoroko, da qai kua ni nanumi keda ga

[iYaloyalo ena tabana e 26]

O na kilai koya cake vakavinaka na Kalou mai na nomu vulica na iVolatabu kei na nomu vakadikeva na veika buli