E Dodonu me Dei na iVau ni Vakamau

KE DINA na itinitini ni vuqa na iyaloyalo e saravi, e kena ibalebale ni dua na ka namaki na vakawati. Rau sa dau qai sota na gonetagane kei na goneyalewa, rau vakamau sara me rau bula marau ena vo ni nodrau gauna. Sa na tini e kea na italanoa ena iyaloyalo.

Ia mai na ka dina e sotavi ena noda bula, na vakamau e sega ni itinitini ni ka, e itekitekivu ni dua na ivau vou ni bula. E nuitaki ni na dina kina na Dauvunau 7:8, e kaya ni “vinaka nai otioti ni ka, ka ca na kenai vakatekivu.”

Me Dei na iVau

Ena gadrevi na rai yawa. E dodonu me yavutaki vinaka na vakawati me rawa ni dei, me solia tale ga na lomavakacegu. Ke sega, ena lailai na lomaocaoca ni vakarautaki ni soqo ni vakamau, sa na qai sega ni taqei rawa na kena ena sotavi ni oti oya. Ni vakamau e dua na lotu Vakarisito me kua ni vaka oqo na nona nanuma: ‘Ke sega ni mana, au na veisere.’ Me raica na vakamau me dua na ivau dei.

A vakamatatataka o Jisu ni dodonu me dei na vakawati, ena nona a sauma tiko na vakatataro me baleta na kena dodonu se cala na veisere. A kaya: “Dou a sega beka ni wilika, ko koya [na Kalou] sa buli rau e nai vakatekivu sa bulia ga na tagane kei na yalewa, a sa kaya, E na vuku ni ka oqo ena biuti tamana kei na tinana na tagane, ka kabita na watina: a rau na lewe dua? O koya oqo erau sa sega kina ni lewe rua tiko, erau sa lewe dua ga: ia na ka sa vauca vata na Kalou, me kakua ni tawasea rua na tamata.”​—Maciu 19:4-6.

Ni Oti na Siga ni Vakamau

Vua e dua na lotu Vakarisito, na imatai ni ka bibi duadua ena nona bula, oya na nona yalataki koya vua na Kalou, e kena ikarua ga na nona vakamau. Na nona yalataki koya e dua e vauci tawamudu kina vua na Dauveibuli, qai vakadinadinataka oqo e matanalevu ena nona papitaiso. Na vakamau e ivakaraitaki e matanalevu ni nodrau veidinadinati e lewe rua​—me tawamudu. O koya gona, ena sega ni dodonu vua e dua me yalataki koya vua na Kalou, se me vauci ena ivau ni vakawati ke se lomalomarua tiko. Sa dodonu kina vua e via vakawati me dikeva mada na vakabauta vakalotu i koya e lomana tiko me watina, na nona isausau, nona rai kei na ivakarau ni yalona.

Ni caka na vakavakarau ina vakamau, e bibi me salavata kei na yalovinaka, yalo ni veitokoni kei na veinanumi. Sa na qai vinakati vakalevu sara na veitovo oqo ni oti na siga lavaki me rawa ni vinaka kina na bula vakawati. E dina ni rau na veilomani sara na vakamau vou, ia, ena nodrau bula ena veisiga ni oti oya me rau kua ni guilecava ni loloma e “sega ni dau qara na ka me nona ga.” “E na sega ni oti rawa na loloma,” ke rau bulataka ena veigauna kece. (1 Korinica 13:5, 8, VV) Ni sa tiko rawa na loloma, sa na rawarawa na kena vuataki na vo ni vua ni yalo tabu tale e so me vaka na vosota vakadede, na cakacaka loloma, na yalovinaka, na yalodina, na yalomalumalumu, kei na lewai koya vaka i koya. Oqo na veitovo ena gadrevi me vinaka kina na bula vakawati.​—Kalatia 5:22, 23, VV.

Na tikina bibi, oya na kena sagai me vuataki tiko ga na veitovo qoroi oqo ni oti na siga ni vakamau. Ia na sala duadua ga ena rawa kina, oqo: Mo lomani koya o vakamautaka, tu vakarau mo na cakava e so na veiveisau.

A kaya o Jisu ni ivakaro levu duadua oya na noda lomani Jiova, qai kena ikarua, “Mo lomana na kai nomu me vaka ko lomani iko.” (Maciu 22:39) O koya gona, vua e dua e vakawati, na kainona voleka duadua na kena isa, ni sega tale ni dua na veiwekani e vuravura oqo e veivolekati sara me tauvata kei na nodrau vauci vata ena vakawati e lewe rua.

Ia me kua ni nanumi ni sa na lai duavata na nodrau nanuma baleta wale ga ni rau sa lewe dua. Ni nodrau wili me rau lewe dua sa macala tu ga ni sega ni kena ibalebale me sa na tautauvata kina na nodrau vakasama. O koya gona, me rawa ni vu ni marau vei rau na nodrau veivakacegui ena vinakati me tiko tale ga ena kedrau maliwa na ka e rua oqo​—me rau yalovata, rau duavata ena nodrau inakinaki. Ena vuqa na gauna, ena gadrevi e ke na veiveisau, ni oqo wale ga na sala e rawa ni vinaka kina na nodrau bula vakawati. Ia o cei vei rau me cakava na veiveisau oqo? O tagane, se o yalewa?

Dau Loloma, Dau Veivakarokorokotaki

E vakarota na Vosa ni Kalou: “Dou veiuasiviti e na veivakarokorokotaki.” (Roma 12:10) Ke rawa, veisautaka e so na ka ena nomu bula o kila ni dodonu me veisautaki, mo kua ni qai waraka ga me kerei iko kina o kemu isa. Ni dua e dau qai yavala ga ni sa oti na nona kerei vakavica vata, ena seavu wale kina na vinaka ni ka e cakava. O koya gona, e dodonu vei rau yadua na veiwatini me rau bucina me rau dau vakaliuliu ena nodrau veirokovi.

Me kena ivakaraitaki, era vakaroti na tagane vakawati mera ‘dau dokai ira na yalewa me vaka nira sa ka malumalumu cake, me kakua kina ni dua na ka e vakalatilati ina nomuni masu.’ (1 Pita 3:7, VV) Ke sega ni dokai watina yalewa na tagane, ena lai vakayacoka sara mada ga ina nona masu vua na Kalou. Ia na cava e vakaibalebaletaki ina nona dokai watina yalewa na tagane? Oya ena nona dau kauaitaki koya ena veigauna kece, rogoca na nona nanuma, laiva me dau digitaka e liu na ka ena vuqa na gauna. Me cakava tale ga vaka kina o yalewa vakawati, me dokai watina ena nona saga me dau veitokoni.​—Vakatekivu 21:12; Vosa Vakaibalebale 31:10-31.

E kaya na Vosa ni Kalou: “E kilikili kei ira na tagane me ra lomani ira vakakina na watidra, me vaka na yagodra dina. O koya sa lomana na watina sa lomani koya vakai koya. Ni sa sega e dua sa cata na yagona dina; ia sa vakania ka maroroya, me vaka sa ia talega ko Karisito ki nai soqosoqo lewe ni lotu.” A vakacava sara mada na titobu ni nona lomani ira na nona imuri na Karisito? A tu vakarau me mate ena vukudra. E kaya tale na iVolatabu vei ira na tagane vakawati: “Mo dou dui lomana yadua na watina me vakataki koya.” (Efeso 5:28-33) Ena yasana kadua, e kaya na Vosa ni Kalou vei ira na marama vakawati ni dodonu “me ra lomani ira na watidra, . . . me ra dautalairawarawa vei ira . . . , me kakua kina ni vosavakacacataki na vosa ni Kalou.”​—Taito 2:4, 5.

Dau Veiciqomi

Nida sucu ivalavala ca, sa macala nida na dau cakacala. (Roma 3:23; 5:12; 1 Joni 1:8-10) Ia e vinaka me kua ni wewenigusuda tu ga na cala e caka oya, da muria na ivakasala vakaivolatabu oqo: “Na ka me liu oqo mo dou dauveilomani vakalevu vakai kemudou; ni na ubia nai valavala ca e vuqa na loloma.” (1 Pita 4:8) E vinaka meda dau guilecava na cala lalai. Ke so sara mada ga na cala lelevu eda nanuma ni caka vei keda, ena vinaka meda guilecava tale ga. E kaya oqo na Kolosa 3:12-14: “Dou qai vakaisulu . . . , e na yalo dauloloma, e na yalovinaka, e na yalomalumalumu, e na yalomalua, e na dauvosota vakadede: dou veivosoti vakai kemudou, ka kakua ni veicudruvi, kevaka sa dua na ka sa rarawa kina e dua; me vaka sa sega ni cudruvi kemudou na Karisito, mo dou vaka talega kina. Ia me liu e na ka kecega oqo na dauloloma, o koya sai vau vinaka sara.”

Me vakavica na noda vosota na cala lalai, se malumalumu i keda isa? A vaka oqo na nona tarogi Jisu o Pita: “Turaga me i valavala ca vakavica vei au na wekaqu ka me’u vosoti koya tiko mada ga? Me vakavitu? Sa kaya vua ko Jisu, Au sega ni kaya vei iko me vakavitu wale ga, me vakavitusagavulu na vitu.” (Maciu 18:21, 22, VV) Ke a tukuna oqo o Jisu me baleti ira na sega ni tiko ena lomanibai ni vakawati, sa qai wacava na veivosoti ena gadrevi ena kedrau maliwa na veiwatini!

E dina sa kavoro vakayauyau na bula vakawati ena vica na yabaki wale tiko ga oqo, ia ena sega ni vaqeavutaki rawa, ni ituvatuva oqo a tauyavutaka na Kalou, qai ka kece e lako vata kei na nona veivakalougatataki e “sa ka vinaka sara.” (Vakatekivu 1:31) Ena sega ni rawa ni madra. E rawa tale ga ni vinaka vakaoti na bula vakawati, vakabibi vei ira na doka ra muria na nona ivakaro na Kalou. Ia na ka ni bolebole oqo: Erau na dina tiko beka ga na lewe rua erau vauci vata oqo ina nodrau vosa ni yalayala ena siga ni vakamau, me rau veilomani, rau veivakamareqeti? Sa macala ga ni sega ni ka rawarawa, ena vinakati e ke na sasaga me rau na rawata kina. Ia e sega ni tukuni rawa na kena yaga!

[Kato ena tabana e 28]

VEISERE KEI NA VEIBIU

Na Kalou a tauyavutaka na vakawati me dua na ivau dei. Ia e tiko beka na yavu vakaivolatabu e rawa kina vua e dua me sereki watina​—me rawa ni dolava na sala me vakawati tale? Me baleta na vakasama oqo a kaya kina o Jisu: “Au sa kaya vei kemudou, o koya sa veisere kei na watina, kevaka e sega ni vuna na dautagane, ka la’ki veiwatini kei na dua tale, sa dauyalewa.” (Maciu 19:9, VV) Na nona dautagane se dauyalewa e dua vei rau na veiwatini e yavu duadua ga ni veisere ena rawa kina vua e sega ni cala me vakawati tale.

Me kuria oqo, e dina ni uqeti ira na vakawati na iVolatabu ena 1 Korinica 7:10-16 mera tiko vata ga, ia ena so na ituvaki, e vakatara na veibiu. Ni sa sega ni mana na nodra saga vakaukaua e so mera vakavinakataka na nodra bula vakawati, era sa nanuma kina ni sa na kena iwali ga na veibiu. Na yavu cava vakaivolatabu e rawa kina vua e dua me taura na ikalawa oya?

E dua, ke cata matua o watina me qarava na nona vuvale. Ni vakawati e dua na tagane, sa nona icolacola me qarava na watina yalewa kei ira na isolisoli. Ke cata matua e dua na tagane vakawati na qarava na nona vuvale “sa cakitaka na vakabauta ka sa ca vakalevu cake mai vua e dua ka sega ni vakabauta.” (1 Timoci 5:8, VV) Ena sega ni cala e ke na veibiu.

E dua tale, ke sa rui voravora na nona itovo. O koya gona, ke dua na tagane vakawati sa rui voravora na nona itovo vua na watina yalewa, sa rawa vua e vakalolomataki tiko me veibiu. (Kalatia 5:19-​21; Taito 1:7) “Na tamata . . . sa vinakata nai valavala kaukauwa, sa cati koya na [Kalou].”​—Same 11:5.

E dua tale na yavu e rawa kina na veibiu, oya ke sa vakaleqai vakaca na nona bula vakayalo o koya e vakabauta me sega kina ni rawa vua me sokaloutaka na Kalou. Ke sa taratarasui na veitusaqati, sa sega ni rawa na sokalou dina, qai ririkotaki na nona bula vakayalo, e so era vakabauta era sa vakatulewataka mera sa veibiu.a​—Maciu 22:37; Cakacaka 5:27-32.

O koya gona, ke yavu ni veibiu na tolu na ka sa cavuti oti, mani yaco sara kina na veisere, erau sega ni lalaga o irau na veisere oqo me rau lai dui vakawati tale. Ni kaya na iVolatabu na yavu duadua ga e lalaga kina e dua me vakawati tale, oya na “dautagane” se “dauyalewa.”​—Maciu 5:32.

[iVakamacala e ra]

[iYaloyalo ena tabana e 27]

Me raici na vakamau me dua na ivau dei

[iYaloyalo ena tabana e 28]

E kaya o Jisu meda veivosoti ‘vakavitusagavulukavitu’