Na Masu e Rogoca na Kalou

NIRA vakabauta dei na vosa i Jisu Karisito oqo, e levu na lotu Vakarisito era masuta na Kalou me vukei ira ena nodra leqa kei na lomaocaoca, nira vakadeitaka ni lomani ira qai kauaitaki ira tale ga. Ia e so era rarawataka na nodra waraka na isau ni nodra masu. O dau vakila beka ni sega na betena ni o masu? E dau rogoca beka na Kalou na nomu masu?

Ni sega ni saumi na noda masu, e sega ni kena ibalebale ni sega ni rogoca na Kalou. E vakadeitaka vei keda na iVolatabu: “Sa wanonovi ira na tamata yalododonu na mata ni Turaga, Ka sa qara tu na daligana ki na nodra masu.” (1 Pita 3:12) E rogoca gona na Kalou o Jiova na nodra masu na yalododonu, se ra cavuta vakadomoilevu se ra tukuna lo ga e lomadra. (Jeremaia 17:10) E dikeva tale ga na yaloda kei na noda vakanananu nida masu, qai so na gauna o koya mada ga e masu e rawa ni lecava na ituvaki dina ni yalona.​—Roma 8:26, 27.

Ia, sa virikotori tu na ituvatuva me muri me rogoca kina na Kalou na noda masu. Taumada, me vakamuai vakatabakidua vua na Kalou​—sega ni vei Jisu, se ina dua na “sanita,” se vua na matakau. (Lako Yani 20:4, 5) Me cabori na masu ena yaca ni Luve ni Kalou, o Jisu Karisito. (Joni 14:6) Kena ibalebale ni na ciqoma o Jisu na noda masu me qai gusuda vua na Kalou? E sega. Na noda masuti Jiova ena yaca i Jisu e vakatakilakilataki keda ni sega wale ga nida tisaipeli i Karisito, eda vakadinata tale ga ni vuku ni nona isoro eda torova rawa kina na Kalou.​—Iperiu 4:14-16.

Dodonu tale ga me cabori ena vakabauta na masu. Dusia kina na yapositolo o Paula: “Kevaka sa sega na vakabauta, sa dredre sara me da vinakati: o koya sa torova na Kalou e dodonu me vakabauta ni sa bula ko koya, ni sa saumi ira talega era sa dauvakasaqarai koya.” (Iperiu 11:6) E kila vakacava e dua ni vaka oya na nona vakabauta? Sauma na dauvola iVolatabu o Jemesa: “Ka’u na vakatakila vei iko na noqu vakabauta e na noqu cakacaka.” (Jemesa 2:18) Io, e laurai na vakabauta ena cakacaka, e vakaraitaka gona na rua na ka oqo nida lomana na Kalou, eda via vakamarautaki koya.

Dodonu tale ga mera kua ni ceguoca ena masu o ira na qarava na Kalou. Matata oqo ena vosa i Jisu ena Luke 11:9, 10, e ikau toka ni noda ulutaga levu. Ke dua e kerea ga vakadua na ka e lomana tiko, sega li ni vakaraitaka ni sega soti ni bibi vua?

Yalayala ni Kalou

Ke da mani masu vakawasoma se vagumatua, eda se bula donuya tu na “gauna cacamatua, [qai] lewalewai dredre.” (2 Timoci 3:1, NW) O koya gona, e dina ni a kaya o Jisu nira na tamata mamarau na nona imuri, ia a sega ni kaya ni na maravu vakaoti na nodra bula. (Maciu 5:3-11, NW) A kaya ga ni rawa nira na marau na nona tisaipeli, dina nira na sotava na rarawa, via kana, via gunu, kei na veivakacacani.

Na marau gona a cavuta o Jisu e sega ni vakatau ena vinaka se ca ni ituvaki eda na sotava. Ia eda na vakila na vakacegu ni lomada e vu mai na noda qarava na Kalou. Kena ibalebale, ni codrocodroa mada ga na bula se rawa ga nida na bau marau.​—2 Korinica 12:7-10.

Vukei Meda Tutaka na Noda Leqa Yadua

E yaga beka meda masulaka na leqa e tara na noda bula yadua me vaka na qarai ni dua na keda ikasa e veiganiti, bula vakavuvale, tauvimate se sega ni cakacaka? Io, e dina ni sega ni yalataka na Kalou ni na cakacaka veivakurabui ena vukuda, ia ena solia vei keda na vuku meda tutaka rawa kina na veika oqo. A vola o Jemesa me baleta na veivakatovolei: “Kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ka na soli ga vua.” (Jemesa 1:5) Ena sobura gona na yalona tabu o Jiova me dusimaki keda, me vukei keda meda kila da qai taurivaka na ivakavuvuli ni iVolatabu ena noda vakatulewa.

Macala ni sega ni na vakatulewa vei keda na yalo ni Kalou ena ka meda cakava. Ena gadrevi e ke na noda sasaga yadua. Kena ivakaraitaki, ke dua na noda leqa, eda sa vakekeli beka meda kila vinaka e so tale na vakasama e vauca? Nida cakava oqo eda vakaraitaka vua na Kalou nida vakabauti koya. (Jemesa 2:18) Eda sega ni oca beka na saga tiko me wali na noda leqa, da qai kerea wasoma na veidusimaki ni Kalou? (Maciu 7:7, 8) Eda sa vakadikeva vinaka na ivakavuvuli kece vakaivolatabu e vauca na ituvaki eda sotava tiko? Na Vosa ni Kalou e rawa ni ‘vakarautaki keda ina ivalavala vinaka kece ga.’​—2 Timoci 3:16, 17.

Sa macala ni rawa vua na Kalou me curu takoso ina bula ni kawatamata me vakaotia kece na leqa, ia e solia tu vei keda na galala ni vakatulewa. Ka ni rarawa ni levu era vakayagataka na galala oqo mera vakaleqai ira kina na tani. O koya gona, e so na leqa eda dau masulaka sa na qai oti ga ena vuravura vou ni Kalou. (Cakacaka 17:30, 31) De so sara ga na ituvaki eda sotava ena noda itikotiko, me vaka na basulawa se ivalu; se vauca na noda saga tiko meda vosota na dredre era vakavuna na dauveitusaqati. (1 Pita 4:⁠4) Meda ciqoma tale ga ni so na ituvaki ena vuravura butobuto oqo sa na sega ga ni vinaka rawa.

Ia se mani vakacava na ituvaki e sotavi, e macala ga ni lomani ira na qaravi koya na Kalou, e via vukei ira. Ena gauna sa na sega tale kina ni dua me qatia na veiliutaki ni nona Matanitu e vuravura, sa na qai kauta laivi kece na leqa torosobu ni vuravura oqo. (Vakatakila 21:3, 4) Me yacova gona na gauna oya, meda kua ni soro na kerea tiko na nona veidusimaki meda tutaka rawa kina na leqa e yaco ena noda bula. Ke da vakayacora oqo, eda kila deivaki ni o Jiova ena dina ina nona yalayala ena iVolatabu, ena Aisea 41:10: “Kakua ni ko rere; ni’u sa tiko vata kei iko: kakua ni ko taqaya; ni’u sa nomu Kalou: ka’u na vakaukauwataki iko; io, ka’u na vukei iko; io, ka’u na tokoni iko e na ligaqu i matau sa daudina.”