Na Rai ni iVolatabu

Sa Kena iWali Beka ga na Veisere?

E KIDAVAKI ira tiko na yaco yani e dua na italatala mai Peritania. Duri tu e matana e dua na tagane kei na dua na yalewa, era tiko tale ga e so na nodrau itokani voleka kei na luvedra. E nodrau siga ni vakamau beka oqo? E sega! Era mai vakadinadinataka tiko ga na nodrau veisere. E liu se dau caka ga na lotu ni vakamau, ia ni sa takalevu na veisere ena gauna oqo era nanuma kina e so na matalotu mera cakava tale ga na lotu ni veisere!

O vakasamataka tiko mo sereki watimu? Ke vaka kina, o na bula marau cake beka kina? E tu beka e so na ka yaga o rawa ni cakava mo drau marau kina vakaveiwatini?

“A Rau na Lewe Dua Ga”

Ni rau a vakawati na imatai ni tagane kei na yalewa, e tukuna na Kalou ni o koya na tagane ena “kabita na watina: a rau na lewe dua ga.” (Vakatekivu 2:24) O koya gona, e nakita na Kalou me tudei na ivau ni vakawati. Oya na vuna e qai kaya kina o Jisu ni yavu ga vakaivolatabu ni veisere na “dautagane [“veidauci,” NW],” me na rawa ni vakawati tale kina e dua.​—Maciu 19:3-9.a

Oqo e dusia tiko ga na bibi ni veidinadinati ena bula vakawati. Ia vakacava ke bibi sara na leqa o sotava tiko ena nomu vakawati?

E Ka Vakayalomatua Beka na Veisere?

E vakarautaka o Jisu e dua na ivakavuvuli e uqeti keda meda vakasama sara vakavinaka ni bera nida vakatulewataka e dua na ka. E kaya: “Sa dau vakadinadinataki na vuku e na we ni nona cakacaka.” (Maciu 11:19, VV) Na cava beka e vakaraitaka na levu ni veisere nikua e sega tu na kena yavu vinaka?

“E dau vakatubutaki na kena tukuni ni yaga vakalevu na veisere, ia e sega ni vaka kina,” e kaya o Linda Waite, e dua na parofesa mai na University of Chicago, e liutaka e dua na ilawalawa vuku era vakadikeva tiko na bula vakawati e sega ni mamarau. E duavata ena tikina oqo o Parofesa Michael Argyle mai na Oxford University. Ni oti e 11 na yabaki na nona vakadikeva tiko na nodra isaunitaro e vica na udolu na tamata, e kunea ni ilawalawa era “sega ni dau marau vakalevu o ira na veisere se veibiu.” Na cava na vuna?

E dina ni na vakaotia na veisere e so na leqa, ia ena yasana adua ena vakavuna tale e so na leqa mosimosi qai sega ni rawarawa mo walia. E kune ena vakadidike e dau caka ni veisere e sega ni dau walia sara na yalolailai se na yalorarawa.

Kevaka mada ga e sega ni “totoka vakaoti na nomu bula vakawati,” ke o vosota tiko o na raica na kena vinaka na nomu kabiti watimu tiko ga. E levu era nakita dei mera cakava oqo era marau vakalevu. E kaya o Parofesa Waite: “Levu na leqa era basika mai ena bula vakawati, ia era dau yali yani ni toso na gauna, ra qai marau kina vakalevu na veiwatini.” E vakaraitaka sara mada ga e dua na vakadidike ni le 8 mai na le 10 era “sega sara ga ni marau” ena nodra bula vakawati, ia nira sega ni veisere, era “marau sara vakalevu” ni oti tale e lima na yabaki. E macala gona ni kevaka mada ga e tarabi na leqa era sotava tiko na veiwatini, me kua ga ni totolo nodrau nanuma me rau veisere.

E So na Veivuke Yaga

O ira era nanuma tiko mera veisere ena vinaka mera tei taroga mada se tiko vei ira na rai donu me baleta na bula vakawati. Na tabana ni vakauitukutuku e boroya tu e dua na iyaloyalo ni veidomoni e rui sivia tale, me tekivu ena dua na vakamau levu qai tini ena nodrau sa qai mai bula marau tu yani na veiwatini. Ia, na kena dina, ni sa oti na soqo ni vakamau, sa qai tubu mai na yalolailai baleta ni sega ni yaco na ka a nuitaki tu me na yaco. E dau vakavuna gona na leqa na yalolailai vaka oqori. Sa sega ni vinaka na nodrau veimaliwai ni rau rarawa voli ga. Sa seavu yani na kamikamica ni veidomoni sa qai se mai na cudru kei na veisevaki. Nira sotava na ituvaki oqo e so, era nanuma kina ni sa kena iwali ga na veisere.​—Vosa Vakaibalebale 13:12.

Kua sara ni vakalaiva na mosi ni yalomu me vakaleqa na nomu rai, veimaliwai ga kei ira era dei ena nodra bula vakawati. Era uqeti na lotu Vakarisito mera “ia na veivakacegui . . . , ka veivakatataki cake.” (1 Cesalonaika 5:11) Io, o ira na leqa tu na nodra bula vakawati era gadreva na veivakauqeti mai vei ira nodra itokani ena vakabauta.

Na Yaga ni iTovo Vakalou

E vakasalataka na yapositolo o Paula: “Mo ni vakaisulu e na dauloloma, e na yalovinaka e na yalomalumalumu, e na yalomalua kei na dauvosota vakadede.” (Kolosa 3:12, VV) Na itovo vakalou ena rawa ni vukei ira na veiwatini mera duavata tiko ga ena gauna mada ga e drakidrakita tu kina na bula.

Me kena ivakaraitaki, e vola o Paula: “Dou veivosoti vakai kemudou, ka kakua ni veicudruvi, kevaka sa dua na ka sa rarawa kina e dua.” (Kolosa 3:13) E kaya o Christopher Peterson, na vuniwai ni vakasama mai na University of Michigan: “Na veivosoti e isema vinaka duadua ni marau.”

Na yalovinaka, veikaroni, kei na dauveivosoti, e vaqaqacotaka na loloma, “o koya sai vau vinaka sara.” (Kolosa 3:14) Sega ni vakabekataki ni a kaukaua sara tu ga na nomudrau veidomoni ena dua na gauna. Ke sa seavu yani, o rawa beka ni vakaukauataka tale? Se mani dredre vakacava na leqa o sotava tiko, kua ni yalolailai. E tiko na inuinui. Nomu kabiti watimu kei na nomu bulataka na ivakavuvuli vakaivolatabu ena rawa ni o vakila kina na marau e sega ni vakatauvatani rawa. Io, nomu cakava oqori o na vakamarautaki Jiova na Kalou, o koya a tauyavutaka na bula vakawati.​—Vosa Vakaibalebale 15:20.

[iVakamacala e ra]