Na Rai ni iVolatabu

Na Cava na iValavala Ca Taumada?

E BIBI meda kila na isau ni taro oqo. Ena vuku ni cava? Baleta na nodrau talaidredre o Atama kei Ivi vua na Kalou e tara na bula ni tamata kece me yacova sara mai na noda gauna oqo. E kaya na iVolatabu: “Sa curu ki vuravura nai valavala ca e na vuku ni tamata e lewe dua, kei na mate e na vuku ni valavala ca; a sa yaco vakakina na mate ki na tamata kecega, ni sa cala na tamata kecega.” (Roma 5:12) Ia, e rawa vakacava me lai tini vakaca na kena tauri kei na kena laukana e dua na vuanikau?

Ena gauna a buli rau kina o Atama kei Ivi na Kalou, a biuti rau ena dua na were totoka e sautu ena kakana bulabula kei na kau vuata. E dua ga na vunikau a vakatabui vei rau—“na kau sa kilai kina na ka vinaka kei na ka ca.” Ni tu vei Atama kei Ivi na galala ni digidigi, a rawa ni rau vakatulewataka me rau talairawarawa vua na Kalou se me rau talaidredre. Ia, a vakaroti o Atama ni na “mate vakaidina e na siga . . . sa kana kina [mai na kau e kilai kina na ka vinaka kei na ka ca].”—Vakatekivu 1:29; 2:17.

Sega ni Dredre na Vakatatabu

E sega ni dredre na vakatatabu oqo baleta ni a rawa vei Atama kei Ivi me rau kana mai na vo ni kau e tu ena were. (Vakatekivu 2:16) Kena ikuri, na vakatatabu oqo e vakaraitaka ni sega ni beci rau na Kalou. Kevaka me vakatabui rau na Kalou mai na itovo vakasisila me vaka na veiyacovi kei na manumanu, se na laba, de ra na kaya e so ni tiko vei rau na tamata uasivi na gagadre ca. Ia, na gagadre ni via kana a sega sara ga ni dua na kena ca.

E vakaibalebaletaka beka na veiyacovi na vuanikau vakatabui, me vaka era vakabauta tu e so? Na iVolatabu e sega ni tokona na vakabauta oqo. Dua na vuna, oya ni gauna a cavuta kina na vakatatabu oya na Kalou, a se tiko taudua ga o Atama, qai dua toka na gauna nona tiko taudua. (Vakatekivu 2:23) Kena ikarua, a tukuna na Kalou vei Atama kei Ivi me rau “vakaluveni, ka tubu me lewe vuqa, ka vakatawai vuravura.” (Vakatekivu 1:28) Macala tu ga ni na sega ni vakaroti rau me rau beca nona lawa, oti oya ni rau sa cakava sa qai totogitaki rau me rau mate! (1 Joni 4:8) Kena ikatolu, a kania e liu na vuanikau o Ivi, oti sa qai solia vei Atama. (Vakatekivu 3:6) E matata gona ni vuanikau a sega ni vakaibalebaletaka na veiyacovi.

Rau Via Lewai Rau Ga

Na kau e kilai kina na ka vinaka kei na ka ca a dua dina na vunikau. Ia, na vunikau oqo e vakatakarakarataka na dodonu ni Kalou me iLiuliu me lewa se cava e vinaka se ca vei keda na tamata. Koya gona nona taura o Ivi na vuanikau e sega ni yala ga ena nona butakoca na ka e nona na Kalou, e vakaraitaka tale ga ni sega ni via vakarorogo ena lewa ni Kalou. Ni oti nona lasutaki Ivi o Setani ena nona kaya ni “na sega dina ni mate” kevaka rau a kania kei watina na vuanikau, dikeva mada na ka e tukuna tarava: “Ni sa kila na Kalou e na siga drau na kana kina ena qai yadra dina na matamudrau; ia drau na vaka na Kalou, ni drau na kila na ka vinaka kei na ka ca.”—Vakatekivu 3:4, 5.

Ia, ena gauna rau a kania na vuanikau o Atama kei Ivi, rau a sega ni vaka na Kalou me rau kila na ka vinaka kei na ka ca. Mani kaya o Ivi vua na Kalou: “Sa vosa vaqaseqase vei au [“vakacalai au,” NW] na gata.” (Vakatekivu 3:13) Ia, meda kua ni guilecava ni kila vinaka tiko o Ivi na ivakaro ni Kalou, ni a tokaruataka mada ga vua na gata, na waqawaqa i Setani. (Vakatakila 12:9) O koya gona, a nakita sara ga o koya na nona talaidredre. (Vakatekivu 3:1-3) Ena yasana kadua, a sega ni vakacalai o Atama. (1 Timoci 2:14, NW) A dodonu me yalodina vei koya na Dauveibuli, ia a mani vakarorogo vei watina qai muri koya ena nona via lewai koya ga.—Vakatekivu 3:6, 17.

Rau a vakacacana vakadua o Atama kei Ivi na nodrau veiwekani kei Jiova ena gauna rau vakaraitaka kina ni rau sa via lewai rau ga. A lai vakavuna sara me takava na veitiki ni yagodrau na ivalavala ca. E dina ni rau a bula tiko me vica vata na drau na yabaki, ia rau a tekivu mate “e na siga” rau a valavala ca kina, me vaka ga na tabanikau ni musuki mai na vunikau. (Vakatekivu 5:5) Kena ikuri, rau sa tekivu vakila ena imatai ni gauna na lomaleqa. Rau raica ni rau luvawale, rau qai via vunitaki rau mai vua na Kalou. (Vakatekivu 3:7, 8) Erau vakila tale ga na rere kei na madua. Na nodrau ivalavala ca e vakavuna me leqa na lomadrau baleta ni beitaki rau na nodrau lewaeloma ena cala rau a cakava.

Me dina ina nona vosa kei na nona ivakatagedegede savasava na Kalou, a dodonu vinaka nona vakatauitotogi me rau mate o Atama kei Ivi, qai vakatalai rau tani mai na were o Iteni. (Vakatekivu 3:19, 23, 24) O koya gona, sa mai yali na Parataisi, na bula marau, kei na bula tawamudu, sa basika sara na ivalavala ca, na rarawa kei na mate. Sa tu ena dua na ituvaki ca sara na kawatamata! Ia, ni oti ga nona totogitaki rau na veiwatini, a yalataka sara na Kalou ni na vakaotia na veika ca e vu mai na nodrau ivalavala ca. Nona cakava oqo ena sega ni veisaqasaqa kei na nona ivakatagedegede dodonu.

A nakita o Jiova mera sereki mai na ivalavala ca kei na mate na kawa i Atama kei Ivi. E vakayacora oqo ni vakayagataka na Luvena, o Jisu Karisito. (Vakatekivu 3:15; Maciu 20:28; Kalatia 3:16) Ena vuku i Jisu, ena vakaotia na Kalou na ivalavala ca kei na kena revurevu, qai vukica tale ga na vuravura oqo me parataisi, me vaka na nona inaki taumada.​—Luke 23:43; Joni 3:16.

O BAU VAQAQA BEKA?

◼ Eda kila vakacava ni vuanikau vakatabui e sega ni vakaibalebaletaka na veiyacovi?—Vakatekivu 1:28.

◼ Na cava e dusia na kena laukana na vuanikau vakatabui?—Vakatekivu 3:4, 5.

◼ Na ituvatuva cava sa vakarautaka na Kalou me vakaotia na revurevu ni ivalavala ca?—Maciu 20:28.

[Tikina bibi ena tabana e 17]

Na vuanikau vakatabui e sega ni vakaibalebaletaka na veiyacovi

[iYaloyalo ena tabana e 16, 17]

A vinakata o Ivi me vaka na Kalou, oya me vakatulewataka vakataki koya na ka vinaka kei na ka ca