Na Rai ni iVolatabu

O Rawa Beka ni Vukei Ira na Mate?

‘Mai na ivakatekivu sa ra dau masumasu na lewenilotu me baleti ira na mate me rawa nira vakasavasavataki kina ra qai raica na serau ni Kalou.’ ​—“iVoladusidusi ni Lotu Katolika.”

ERA dau kauai na matatamata kece ena kedra ituvaki na mate. Rairai o a vakila na lolosi kei na galili ni mate e dua o dau lomana. O na via kila beka se era na lai bula tiko ga, era lai rarawa tiko se kune vakacegu, se rawa beka ni o cakava e dua na ka mo vukei ira na mate.

Era vakabauta e vuqa na tamata lotu nira rawa ni vukei ira na sa takali. Me kena ivakaraitaki, era vakabauta na lotu Idu ni kena vakamai na yagodra na wekadra lomani ena bati ni uciwai na Ganges, qai kaburaki na kena dravusa ena lomaniwai, era vakadeitaka kina ni na lai marau tawamudu na yalo i koya sa mate. Ena vanua vakaEsia, o ira na lotu Buda era dau vakama na ivakatakarakara ni motoka, na vale, isulu kei na ilavo era buli ena pepa. Era vakabauta ni veika oya ena lai vakayagataka o koya e mate ena vanua sa lako tiko kina. Mai Aferika, era dau sova na alakaolo ena yasa ni ibulubulu ena nodra nanuma ni nodra isoro oqo ena yaga vua na tamata sa mate.

Era vakavuvulitaka na lotu Katolika ni kevaka e dua na tamata e sega ni veivutunitaka na nona “ivalavala ca bibi” ena gauna e mate kina, e sa na vakuai koya mai na nona veivakadonui na Kalou. Na ituvaki oqo e “vakatokai me o ‘eli.’” Ena yasana kadua, e vakavuvulitaka ni dua e vakadonui koya na Kalou ena nuitaka me na rawata na “marau levu” vata kei na Kalou mai lomalagi, ia ena gadrevi mada vua me na vakasavasavataki e liu. Ena vinakati me na lako i puregatorio me na lai vosota kina na “bukawaqa ni veivakasavasavataki,” oqo na itotogi ni cala e rawa ni vosoti. Ia, ni sa tiko e puregatorio ena vukei ena nodra masulaki koya na lewenilotu kei na nodra Misa. Na veiqaravi vaka oqo era dau sauma na nona itokani kei na weka i koya sa mate.

E dau kena ivalavala ga meda solia na noda vinaka kece meda vakaceguya na nodra rarawa o ira na wekada. Ke rawa nida vukei ira, ena sega li ni rawa vua na Kalou me vakamatatataka vei keda na sala eda rawa ni cakava kina oqori? Meda raica sara mada se cava e vakavuvulitaka na iVolatabu me baleta nodra vukei na sa mate.

Na Kedra iTuvaki na Mate

Na itovo kece e vakamacalataki mai cake era yavutaki ena vakabauta ni tawamate rawa na yalo, oya ni na bula tiko ga e dua na ka e tiko vua na tamata dina ga sa mate na yagona. Oqori beka na ka e vakavuvulitaka na iVolatabu? “Sa kila ko ira sa bula ni ra na mate,” e kaya na iVolatabu, “ia ko ira na mate era sa sega ni kila e dua na ka, a sa sega tale na kedrai voli; ni sa yali sara na kedrai vakananumi. Ia na nodra loloma, kei na nodra veicati, kei na nodra vuvu, sa qai yali; a sa sega tale na nodra ivotavota e na dua na ka sa caka e ruku ni mata-ni-siga. A ka kecega sa vakaitavi kina na ligamu, mo kitaka ga e nomui gu; ni sa sega na cakacaka, se na vakasama, se na kila ka, se na vuku, e nai bulubulu, o koya ko sa lako tiko kina.”—Dauvunau 9:5, 6, 10.

Me baleta na nona vakila e dua na ka na tamata sa mate, e vola kina na daunisame: “Sa lako tani na nonai cegu, a sa suka ko koya ki na kena qele; e na siga dina ko ya sa oti na ka e vakanananu kina.”—Same 146:4.

E dodonu vakavinaka qai matata na itukutuku e kune ena iVolatabu. Na cava mada na nomu nanuma? Ena rawa beka vua e dua na tama dauloloma me vakararawataki iratou na luvena baleta wale ga ni ratou sucu ivalavala ca? (Vakatekivu 8:21) Sega sara. Na cava ga me na qai cakava kina oqori na Tamada vakalomalagi? E vakacala o Jiova nira muria e so na Isireli makawa na nodra ivakarau na lotu butobuto ena nodra dau vakamai luvedra me nodra isoro vei ira na veikalou lasu. Na ivakarau vakasisila oqo e vakatoka o Jiova me ‘ka e a sega ni vakarota, qai sega ni tubu mai lomana.’—Jeremaia 7:31.

Na isau ni ivalavala ca ni tamata na mate, sega ni lai vakararawataki tu ena dua tale na vanua. “Sa kenai sau ni valavala ca na mate,” e tukuni ena iVolatabu, qai “sereki mai nai valavala ca ko koya sa mate tu.”​—Roma 5:12; 6:7, 23.

Era sega ni rarawa voli o ira na mate. Na kena veibasai ga, e vaka ga era mocelutu no, ra sega ni vakila e dua na ka—na marau se cava tale. E sega ni vakabekataki tale ni nodra sasaga kece na tamata mera vukei ira na mate e sega ni salasalavata kei na ivakavuvuli vakaivolatabu.

Na Cava na Nodra iNuinui na Mate?

E sega ni kena ibalebale oqori ni o ira na wekamu lomani era sa mate era sa na mate tu ga vakadua. Me kena veibasai ga, e tiko tale e dua na ka e vinaka cake sara me baleti ira.

Ni se bera na nona vakabulai Lasarusa tale na nona itokani, a kaya o Jisu ni na lai “vakayadrati koya.” (Joni 11:11) E qai vakamacalataka tale ena dua na gauna nira “na rogoca . . . na domona ko ira kece ka ra tu e na i bulubulu [“nanumi,” NW], ka ra na lako cake mai kina.” (Joni 5:28, 29, VV) O ira na vakaturi era sa na sereki mai na nodra ivalavala ca e liu. Sa ra na sega gona ni vakararawataki ena vuku ni ivalavala ca era a cakava ena gauna era a bula tu kina. Ena soli vei ira na gauna mera na vulica kina na nodra na marautaka na bula ena ituvaki e sega ni vakamelei rawa. Sa dua dina na inuinui uasivi!

Ke o taleitaka na inuinui uasivi oya, kua ni tu vakasuka mo vakadeitaka na dina ni veika e yalataki oqo. Era na marau na iVakadinadina i Jiova mera na vukei iko ena tikina oqo.

O BAU VAQAQA BEKA?

◼ Era vakila beka e dua na ka o ira na sa mate?​—Same 146:4; Dauvunau 9:5, 6, 10.

◼ Ena vakalaiva beka na Kalou mera vakararawataki na mate ena nodra kama mai eli?​—Jeremaia 7:31.

◼ E tiko beka na nodra inuinui na mate?​—Joni 5:28, 29, VV.