Nodra Susugi na iTabagone—Na Yaga ni Vuku
“Keirau dau saga ena neirau vinaka kece me keirau dusimaki rau vakavinaka na luvei keirau, ia levu na gauna e vaka me keirau sa vosa tu ga. E so na gauna keirau sa leqataka de na vakavuna me rau yalodatuvu, rau qai sega ni yalodei me rau cakava rawa e dua na ka. E dredre gona me keirau saga me kua ni sivia tale se lailai sara na veivakadodonutaki keirau cakava.”—George kei Lauren, Ositerelia.
ESEGA ni rawarawa na nodra susugi na itabagone. E sega wale ga ni gadrevi mera kauai na itubutubu ena veisau e sa yaco ena nodra bula na gone kei na ka mera cakava kina, ia era na rairai rarawataka tale ga nira sa qase tiko mai na luvedra. “Au rarawa niu vakasamataka ni ratou sa na biubiu mai vale ena dua na siga o ratou na luvequ,” e kaya o Frank, e dua na tama e Ositerelia. “E dredre meu ciqoma niu sa sega ni lewa na nodratou bula.”
E tokona na rai qori o Lia, a vakamacalataki ena rua na ulutaga sa oti. E kaya: “Au dau guilecava ni sa voleka ni tamatabula na luvequ, baleta niu se raici koya tiko ga me noqu gonetagane lailai. E vaka sara ga e se qai biubiu enanoa me lai vuli ena imatai ni gauna!”
Sa ra sega ni gonelailai o ira na itabagone, ia e so e dau dredre nira ciqoma qori. Era tuberi tiko mera tamatabula nuitaki, e nodra itavi gona na itubutubu mera vakavulici ira, mera tokoni ira tale ga. Ia, vaka ga rau vakadinadinataka o George kei Lauren, e rawa sara ga vei ira na itubutubu mera vakavuna nodra yalodatuvu na gone, se nodra yalodei mera cakava rawa e so na ka. Na cava mera cakava na itubutubu me veiganiti nodra veivakadodonutaki? E tiko ena iVolatabu na ivakasala yaga. (Aisea 48:17, 18) Meda raica mada e so na ivakaraitaki.
Bibi na Veivosaki
E vakasalataki ira na lotu vaKarisito na iVolatabu mera “kusarawa yadua me vakarorogo,” ra qai “berabera ga ni vosa.” (Jemesa 1:19) Dina ni yaga meda muria na ivakasala qori nida veimaliwai kei ira na gone kece, ia e bibi meda dau vakarorogo nida veimaliwai kei ira na itabagone. De dua, ena ka ni sasaga toka qori.
“A gadrevi meu vakavinakataka na ivakarau ni noqu veivosaki kei na noqu vakarorogo ni rau sa cauravou na luvequtagane,” e kaya o Peter, e dua na tama e Peritania. “Ni rau se lalai, keirau dau tukuna vei rau na ka me rau cakava, rau qai muria. Ia qo ni rau sa qase cake, keirau sa dau vakamacala vei rau me rau kila na vuna me caka kina e dua na ka, na ka kece e okati ena dua na ituvaki, qai vakalaiva me rau vakalewa se vakasamataka ga vakataki rau na ka me caka, me wali kina na leqa. Io, keirau saga me keirau uqeta na lomadrau.”—2 Timoci 3:14.
E bibi sara ga na vakarorogo ke yaco na veileqaleqati. (Vosa Vakaibalebale 17:27) A vakadinata qori o Danielle, e Peritania. E kaya: “Au sega ni taleitaka na nona dau sauma lesu na noqu vosa e dua na luvequyalewa niu tukuna vua me cakava e dua na ka. Ia tukuna o koya niu dau vosataki koya tu ga, qai sivia tale noqu talai koya. Keirau qai walia na leqa qori ena neirau veivosaki kei na neirau veirogorogoci. A vakamacalataka o koya na sala au dau vosa kina vua kei na ka e vakila kina, au qai tukuna vua na lomaqu kei na noqu rai.”
A raica o Danielle ni yaga na nona ‘kusa me vakarorogo’ baleta ni liaca kina na vuna e dau sauma kina na vosa o luvenayalewa. E kaya: “Au sa saga ena gauna qo meu yalovosovoso vei luvequ, au qai dau vosa ga vua ena gauna au sega ni cudru kina.” E tomana, “Sa qai vinaka tiko mai na neirau veimaliwai.”
E kaya na Vosa Vakaibalebale 18:13: “O koya sa vosa e na ka ni sa bera ni rogoca, sa ka lialia vua ka sa ka me madua kina.” A vakadinata qori o Greg, e dua na tama e Ositerelia. E kaya, “Ena so na gauna, keirau veileqaleqati kei rau na gone baleta ni dau totolo na neirau vosataki rau, keirau sega ni dau vakarogoci rau me keirau kila kina na lomadrau. Kevaka mada ga keirau sega ni duavata kei na nodrau rai, keirau sa mai kila ni bibi me keirau rogoca rawa na ka erau nanuma ni bera ni keirau veivakadodonutaki se veivakasalataki.”
Me Vakacava na Levu ni Galala e Soli?
De dua na ulutaga levu e dau vakavuleqa ena nodra veimaliwai na itubutubu kei ira na luvedra oya na nodra vinakata na itabagone mera lewai ira ga. Me vakacava na levu ni galala e soli vei ira? E kaya e dua na tama, “Keu solia vakalailai na galala vei luvequyalewa, ena taura tale vakasivia o koya.”
Sega ni vakabekataki ni na yaco ga na leqa ke sega ni yalani na galala e soli vei ira na itabagone. Sa rauta me veivakasalataki na iVolatabu “na gone sa biu wale tu me veitalia sa vakamaduataki tinana.” (Vosa Vakaibalebale 29:15) E ganiti ira kece na gone na idusidusi dei, qai gadrevi mera yalololoma na itubutubu nira raica me muri na nodra lewa, me kua tale ga ni veiveisau na lewa qori. (Efeso 6:4) Ena gauna vata qori, e dodonu me soli vei ira na itabagone e so na galala me vakarautaki ira mera vakatulewa vakavuku ena gauna era tamatabula kina.
Kena ivakaraitaki, vakasamataka mada na nomu vulica mo lako. Ni o se gonedramidrami, o dau keveti. Ni toso na gauna, o sa qasi, o tekivu taubale sara. Ia nona yavala va qori e dua na gonelailai e rawa ni vakaleqai koya tale. Oya na vuna rau a vakaraici iko vinaka tiko na nomu itubutubu ena gauna kece qori, rau rairai cakava tale ga e so na bai se itataqomaki ena so na vanua ririkotaki, me vaka na ikabakaba. Ia, rau vakatara mo bau veitosoyaki toka ena so na vanua. O tini vulica kina mo taubale vakavinaka, dina ni o lutu vakavica.
Qo ena via tautauvata kei na nodra rawata na itabagone mera lewai ira ga. Eliu ena vaka ga nira keveti tiko, oya nira na vakatulewa tiko ena vukudra na nodra itubutubu. Toso na gauna, ena vakatarai mera qasi, qo ke ra vakaraitaka nira sa yalomatua toka. Era na vakalaivi mera cakava ga vakataki ira e so na digidigi. Ena gauna kece qori, ena tiko ga na itataqomaki, mera kua kina ni vakaleqai. Nira yalomatua cake na itabagone, era na vakatarai mera “taubale” ga vakataki ira, mera vakatulewa ena levu na ka e vauca nodra bula. Nira sa tamatabula, era na qai ‘colata ga na nodra icolacola.’—Kalatia 6:5.
Vuli ena iVakaraitaki Vakaivolatabu
A solia vei Jisu o rau nona itubutubu e so na galala ni se bera ni yabaki 13, ia a sega ni vakaveitaliataka na galala qori. A “talairawarawa vei rau” nona itubutubu, qai “tubu cake ko Jisu e na vuku kei na yagona talega, a sa vinakati koya vakalevu cake tikoga na Kalou kei ira talega na tamata.”—Luke 2:51, 52.
Ke o itubutubu, mo vuli mai na ivakaraitaki qori qai solia vei ira na luvemu e so na galala ke sa vakadinadinataki ena ka era cakava nira na vakayagataka vakavuku. Vuli ena ka era tukuna e so na itubutubu me baleta na ituvaki qori.
“Ena dua na gauna au dau siova vakalevu na ka rau cakava na luvequ. E muri, au sa dusimaki rau ga ena so na ivakavuvuli, me rau qai vakatulewa ga vakataki rau me salavata kei na ka rau vulica. Ni oti ya, au raica ni rau sa dau vakasamataka sara vakavinaka na nodrau vakatulewa.”—Soo Hyun, Korea.
“Keirau dau lomaleqataka kei watiqu na nodratou vakayagataka na gone na galala e soli vei iratou, ia keirau se laiva ga meratou vakayagataka vakavinaka na gone na galala a soli vei iratou.”—Daria, Brazil.
“Au vulica ni bibi meu dau vakacaucautaki luvequ ni yalomatuataka na galala e soli vua me lewa kina e so na ka e vauca nona bula. Au dau cakava tale ga na ka au vakaroti koya kina me cakava. Kena ivakaraitaki, au dau tukuna vua na vanua au lako kina kei na ka au cakava. Au dau kaya tale ga vua keu na bera tiko yani.”—Anna, Itali.
“E vale, keirau dau vakabibitaka vei rau na cauravou ni rau sega ni sucukaya na galala me rau lewa ga vakataki rau na veika e vauca nodrau bula, ia e dodonu me rau vakaraitaka ni rau tamata nuitaki, ni rau na vakayagataka vakavuku na galala e soli vei rau.”—Peter, Peritania.
Mera Vakila na Ca ni Nodra Lewa Ca
E kaya na iVolatabu: “Sa kilikili kaya na tamata me vakataqara vua nai vua ni sa cauravou tiko ko koya.” (Lele i Jeremaia 3:27) Dua na sala vinaka me colata kina e dua na itabagone na nona ivua, me kua ni drotaka na leqa se nona itavi, oya me vakila kina na dina ni vosa: “Na ka kecega sa kaburaka na tamata ena tamusuka talega.”—Kalatia 6:7.
E so na itubutubu era dau taqomaki luvedra mera kua ni vakila na ca ni nodra lewa ca, kena irairai nira cakava qori ena inaki vinaka. Kaya mada ke dinau o cauravou baleta ni vakayagataki ilavo vakalialia. Na cava ena vulica o koya ke rau sauma nona dinau o Tamana kei Tinana? Ena yasana adua, na cava ena vulica ke rau dusimaki koya nona itubutubu ena ituvatuva me muria me sauma kina vakataki koya na nona dinau ?
E sega ni yaga na nodra dau taqomaki ira na gone na itubutubu mera kua kina ni vuli mai na leqa e yaco ena vuku ni nodra vakatulewa cala. Ena sega ni vakarautaki ira mera tamatabula nuitaki, ia e vakaraitaka ga vei ira ni na dau tu ga e dua me vueti ira nira leqa, walia na ituvaki ca e dau yaco, bokoca tale ga na nodra cala. E vinaka cake mera tamusuka na ka sara ga era kaburaka, ra qai vulica na sala mera walia kina na leqa. Qori e dua na usutu bibi ni nodra ‘vakavulica na lomadra me rawa kina nira vakaduiduitaka na vinaka mai na ca.’—Iperiu 5:14, VV.
“E Veisau Qai Tubu Tiko Ga”
Sega ni vakabekataki ni dredre na nodra itavi na itubutubu e cauravou se goneyalewa na luvedra. Ena so na gauna, era na rairai tagi nira saga tiko mera tuberi luvedra “ena ivakavuvuli kei na ivakarau ni vakasama i Jiova.”—Efeso 6:4, NW.
Na veisusugi e yaga e sega ni baleta na nodra lewai na gone, ia e baleta ga na nodra tuberi kei na nodra vakavulici ena itovo vinaka. (Vakarua 6:6-9) Vakacava, ena dredre beka qori? Io ena dredre. “Eda susuga tiko e dua e veisau qai tubu tiko ga,” e kaya o Greg, sa vakamacalataki oti ena ulutaga qo. “Kena ibalebale qo ni dodonu meda saga tiko ga meda kila na tamata vou qori, da veisautaka tale ga na noda ivakarau me ganiti koya.”
Tovolea mo bulataka na ivakavuvuli vakaivolatabu e vakamacalataki ena ulutaga qo. Me kua ni sivia tale na ka o namaka vei ira na luvemu. Ia mo dau ivakaraitaki vinaka tu ga vei ira. E kaya na iVolatabu: “Vakatavulica na gone e na sala e dodonu me lako kina: ia ni sa qase mai, ena sega ni lako tani maikina.”—Vosa Vakaibalebale 22:6.
[Tikina bibi ena tabana e 7]
Noda rawata na ivakatagedegede meda lewa ga kina na veika me baleta noda bula e vaka noda vulilako—ena taura toka na gauna
[Tikina bibi ena tabana e 8]
A soli vei Jisu e so na galala ni se bera ni yabaki 13
[Kato ena tabana e 7]
“Vakadeitaka na Nomu Lewa”
Ke sega ni taleitaka o luvemu e so na ka o sa lewa, e sega ni kena ibalebale ya mo sa kua ni yalana e so na ka e cakava. Mo nanuma tiko nira se yalowai ena levu na ka na luvemu, era gadreva gona na veidusimaki.—Vosa Vakaibalebale 22:15.
A vola o John Rosemond ena ivola na New Parent Power!: “E dau rawarawa mera nuiqawaqawa na itubutubu ena veiveisau e yaco ena bula i luvedra, ra tini solia kina vei ira e levu na galala era na sega ni vakayagataka vakavinaka, baleta nira sega ni via veileti kei ira. Ia e yaga cake mera cakava na kena veibasai. Qori sara ga na gauna mo vakadeitaka nomu lewa, e sega ni gauna mo sorova kina. E vinaka mera kila na gone ni se ganiti ira tiko ga mera dusimaki, veitalia sara ke ra sega ni taleitaka qori.”
[Kato ena tabana e 9]
Na Kena Soli na Galala
Ena levu na gauna, e dau sivia tale na galala era vinakata na itabagone. Ena yasana adua, e sa rui lailai tale na galala era solia e so na itubutubu vei ira na luvedra. Ia e dodonu me veirauti na galala e soli. O na kila vakacava ke sa veirauti? De dua ena vinaka mo vakasamataka mada na ka era volai toka qori. E sa vakaraitaka beka o luvemu ni vakayagataka tiko vakavinaka na galala e soli vua ena so na ka era volai toka qori?
□ Nona ilala
□ Nona isulusulu
□ Vakayagataki ilavo
□ Lesu i vale ena kena gauna
□ Vakayacora vinaka na itavi e vale
□ Vakaotia vinaka nona tasi mai koronivuli
□ Kere veivosoti ni cala
□ So tale ․․․․․․․․․․․․․․․․․․․․․․․․․․․․․․․․․․․․․․․․
Ke vakaraitaka tiko o luvemu ni yalomatua ena veika e volai toka qori, vakacava mo vakasamataka e so tale na galala o rawa ni solia vua?
[iYaloyalo ena tabana e 7]
Mo dau rogoca rawa na nanuma i luvemu ni bera ni o veivakadodonutaki se veivakasalataki
[iYaloyalo ena tabana e 8]
E bibi vei ira na itubutubu mera vakavulici luvedra mera tamata nuitaki