Kaukaua Sara na Nodra Loloma Mai na Cagilaba!
Na gauna e ravuta kina na Gulf Coast e Mereke na cagilaba o Katrina kei Rita ena 2005, dua na ka na nodrau vakacaca ra qai mate kina e levu. E udolu tale ga na iVakadinadina i Jiova a vakacacani nodra itikotiko.
E sega ni bera nodra yavala na komiti ni vakacoko ena veidusimaki ni valenivolavola ni tabana ni iVakadinadina i Jiova e Mereke. A vakarautaki e Louisiana e 13 na vanua ni vakacoko me dusimaki kina na cakacaka, e 9 na vanua me maroroi kina na iyaya ni vakacoko, kei na 4 na vanua ni vakatawa waiwai. E 80,000 na kilomita vakarivirivi na levu taucoko ni vanua ena vinakati me qaravi. Rauta ni 17,000 na iVakadinadina era bolecakacaka mai na veivanua e Mereke, ra qai mai veivuke ena tabana ni leqa tubukoso kei na tara vale e 13 tale na vanua. E laurai ga ni kaukaua cake sara na loloma vaKarisito mai na veika e vakavuna na leqa tubukoso.—1 Korinica 13:1-8.
Era vakavinakataka na bolecakacaka qori e sivia na 5,600 na vale ni mataveitacini kei na 90 na Kingdom Hall, qori na nodra vanua ni soqoni na iVakadinadina i Jiova. Voleka ni vale kece era a vakacacani ra okati tiko ena iwiliwili qo. Me salavata ga kei na Kalatia 6:10, era uqeti kina na lotu vaKarisito mera dau “caka vinaka vei ira na tamata kecega,” era qaravi tale ga kina e vica na sega ni iVakadinadina i Jiova.
O IRA na veiqaravi ena cakacaka ni vakacoko era vakuai ira ena so na ka; ia era vakalougatataki kina vakalevu. Wilika mada na ka eratou kaya e vitu na iVakadinadina e duidui na tabana ratou a liutaka ena gauna ni vakacoko qori.
“Gauna Guiguilecavi Dredre”
Robert: Dua na gauna guiguilecavi dredre dina noqu veiqaravi ena komiti ni vakacoko. Au yabaki 67, qai qase duadua vei ira. Au cakacaka vata kei na dua na ilawalawa levu era bolecakacaka, era se itabagone, ra qai kaukaua tale ga vakayalo. Sa bau veivauqeti dina nodra vakuai ira mera vakaraitaka kina nodra lomani Jiova kei ira na wekadra lotu vaKarisito!
Vakasakiti tale ga na nona veitokoni o Veronica na watiqu. Me rawa kina ni keirau veivuke ina cakacaka qo, e tokoni au ena noqu vakatulewataka meu biuta na cakacaka saumi au a marautaka voli ena sivia na 40 na yabaki. Ena gauna qo keirau dau sasamaki tiko ena valenivolavola ni so na kabani, me vakadua ena veimacawa. Keirau sa kila sara na bula ga ena sede lailai, qai marautaki na bula rawarawa. Neirau cakacaka vata kei ira na via vakamarautaki Jiova, keirau sa qai raica kina vakatitobu na ibalebale ni noda vakaliuca na Matanitu ni Kalou. (Maciu 6:33) Keirau raica wasoma nona dau kauaitaki ira vinaka na nona tamata o Jiova.
Frank: Au ovasia ni tabana e qarava na kakana ena vanua ni vakacoko ena korolevu o Baton Rouge. Mera kana vinaka na bolecakacaka keimami dau cakacaka ena 10 ina 12 na aua ena veisiga, vakavitu ena dua na macawa. Levu dina na veivakalougatataki, okati kina noda raica votu na qaqaco ni veilomani vaKarisito.
Levu era bolecakacaka ena vanua ni vakasaqa me dua na macawa, era vinakata mera lesu tale mai, so tale era volavola mai se qiri mai mera vakavinavinakataka na itavi dokai era qarava ena nodra mai veivuke tu. E uqeti au sara ga kei na watiqu o Veronica na nodra vakuai ira na mataveitacini.
Se na Voto ni Ligaqu
Gregory: Au volitaka kei na watiqu o Kathy na neirau vale e Las Vegas, mai Nevada. Keirau qai volia e dua na lori lailai e vakavaleqiqi me keirau na tiko kina. Na neirau bula rawarawa ga va qori, a rawa kina ni keirau veiqaravi ena cakacaka ni vakacoko e Louisiana me sivia na rua na yabaki. Ni vakatauvatani kei na veigauna sa sivi, keirau vakadinadinataka ena imatai ni gauna na dina ni Malakai 3:10: “Vakatovolei au mada kina, sa kaya ko Jiova ni lewe vuqa, se’u na dolava, se segai, na katuba ni lomalagi, ka sovaraka vei kemudou na ka ni veivakalougatataki, me na sautu dina sara.”
Keirau dau marau ni tukuni, “Vinaka na vakuai kemudrau!” Keirau a via veiqaravi kei Kathy ena valenivolavola ni tabana e Mereke ena tolusagavulu na yabaki sa oti, ia keirau vakaluveni tu. Uqeti keirau na cakacaka ni vakacoko me keirau vakarabailevutaka na neirau veiqaravi vua na Kalou. Dua tale na itavi marautaki neirau cakacaka vakavoleka kei ira na itokani iVakadinadina, so era kenadau ena cakacaka. Kena ivakaraitaki, e dua vei ira na mai veivuke tiko e valenikuro e kenadau ena vakasaqa ni a dau cakacaka tu ena dua valenikana kilai, dua tale a dau vakasaqara na kedrau e rua na peresitedi ni Mereke.
E uqeti ira e levu na bolecakacaka na nodra vakaitavi ena cakacaka ni vakacoko. E se sara ga na votona e dua e yabaki 57 ni vakamacalataka nona qaravi ira na vakacacani ena cagilaba. E so mada ga na iVakadinadina era a sega ni yaco rawa yani ena vanua qori era vu ni veivakayaloqaqataki. Kena ivakaraitaki, rau a vakaliliga cake e dua na drotini e rua na bolecakacaka erau veiqaravi tiko ena tabana e dau savata na duka ena lalaga. Na drotini qori era a saini kece kina na lewe ni tolu na ivavakoso ena vanua rau tiko kina e Nebraska, ra bau wili tale ga kina na gone.
‘Laurai na Nona Kauaitaki Ira na Rarawa tu na Kalou’
Wendell: Ni oti ga e dua na siga nona vakacaca o Katrina, a lesi au na valenivolavola ni tabana e Mereke meu lai cakacakataka na levu ni ka e vakacacani ena Kingdom Hall kei na nodra vale na iVakadinadina i Jiova e Louisiana vaka kina e Mississippi. Tekivu sara ga kina noqu ilesilesi kei na noqu cakacaka ena veiqaravi qori. Keirau vakaitikotiko kei watiqu o Janine me 32 na yabaki ena dua na vanua e gadrevi kina vakalevu na dautukutuku ni Matanitu, au qai raica votu nona kauaitaki ira nona tamata o Jiova. Keirau sa qai raica qo na rabailevu ni nona veikauaitaki na Kalou.
A itavi dokai dina na noqu a jeameni ena komiti ni vakacoko e Baton Rouge. E ka ni bolebole toka, ia au lomavakacegu dina. Ena gauna ni vakacoko qori keitou dau vakila vakalevu na komiti na nona walia na Kalou na leqa e basika, nona veidusimaki, kei na nona kauaitaki ira na rarawa tu me vakataka ga na Tama Kaukaua dauyalololoma.
Era taroga e levu, “E rawa vakacava ni drau se veiqaravi tiko ga vakaveiwatini ena cakacaka ni vakacoko qo, dina ni sa oti e rua na yabaki?” Sega dina ni ka rawarawa. Levu na veiveisau ena neirau bula. Ia na kena vinaka ga ni keirau vakila na yaga ni kena ‘rawarawa’ tiko ga na ‘mata.’—Maciu 6:22.
E lailai na cegu ena imatai ni gauna keirau vakaitavi kina kei na so tale na ilawalawa mera vaqarai o ira na vakacacani e New Orleans. Sa qai vakadredretaka sara nodra yadrava tu na vanua qori na mataivalu ena vuku ni so na itovo voravora e vakayacori tu e gaunisala kei na basulawa. Ena rawarawa sara ni tuburi keda na yalolailai ena levu ni cakacaka e tu me colati.
Keimami sotavi ira e udolu vakacaca na iVakadinadina i Jiova e vakacacani na nodra itikotiko. Keimami masu vata kei ira, keimami vakaukauataki ira tale ga. Ena veivuke i Jiova e tekivutaki kina na cakacaka. Ena so na gauna, e vaka sara ga e wasei rua tu na noqu bula ena rua na yabaki au tiko kina e ke.
Levu na gauna niu vakila sara tu ga na wawale kei na momosi ni yago, sa ra yaco tale yani e so na bolecakacaka vou—so ra mai cakacaka tiko me vica vata na vula, so tale era dede sara. E solia tale vei au e dua na igu levu ni cakacaka na noqu marautaki ira na lomasoli mera mai veivukei, okati kina e levu na itabagone.
E dau vakacegui keimami o Jiova. Kena ivakaraitaki, ni keimami se qai yaco sara ga yani era babale tu na vunikau ena sivia na 1,000 na nodra vale na mataveitacini. Ia ni sega tu na iyaya kei ira na kenadau mera kauta laivi na vunikau qori, keitou mani masulaka na leqa qo na komiti. Na siga ga e tarava, a lai veivuke yani e dua na tacida tagane e vakalori qai tiko vua na iyaya keitou vinakata me tosoi kina na cakacaka. Dua tale na gauna a saumi na neitou masu ena loma ni 15 ga na miniti, dua tale ga na gauna, keitou se qai masulaka tiko e dua na iyaya ia sa vakau tiko mai ni bera mada ga na vakaemeni! Macala ga ni o Jiova e “daurogoca na masu.”—Same 65:2.
“Marautaka Niu iVakadinadina i Jiova”
Matthew: Ni oti ga na siga a ravuravu kina o Katrina, au tuvanaka sara na kena vakau e 15 na tani kakana e cautaki, wai kei na so tale na ka e gadrevi tu vakalevu ena vanua era vakacacani. Era vakaraitaka dina na tamata i Jiova na nodra dau solika!
Me yaga vakalevu na neirau veiqaravi, au toki kina kei na watiqu o Darline ena dua na itikotiko e rua ga na aua na kena yawa mai na vanua e vakacacani. Keirau a cakacaka vagauna vua e dua na tacida ena vanua qori, rawa gona ni levu na gauna keirau veiqaravi kina ena cakacaka ni vakacoko. Dua tale na tacida a vakarautaka na vale me keirau tiko kina. Au marau dina niu mai lewena tu na isoqosoqo ni mataveitacini dauveilomani qo, au qai marau niu dua na iVakadinadina i Jiova.
Ted: Ni oti toka ga na cagilaba o Katrina, keirau bolecakacaka sara ni vakacoko kei na watiqu o Debbie. Ena loma ni vica ga na siga au kunea e dua na valeqiqi makawa, e 9 na mita na kena balavu qai mamada vinaka ga me tui ena neirau lori, a musuki veimama tale ga kena isau—e rauta vinaka na ilavo keirau sa wasewasea tu, e saumi kina na ka keirau a masulaka tiko. Na valeqiqi qo keirau tiko kina me sivia e yabaki rua.
Na gauna keirau a vakacegu toka kina mai na cakacaka ni vakacoko qori, keirau volitaka na neirau vale kei na levu na neirau iyaya, rawa tale ga ni keirau vakaitavi ena so tale na cakacaka e New Orleans, au mani lesi sara meu kodineita ni cakacaka. Na ka bibi keirau vakadinadinataka ena neirau veiqaravi qo na nona ‘Kalou dauveivakacegui’ o Jiova vei ira na nona dauveiqaravi. Sega wale ga ni vakacacani na nodra vale kei na Kingdom Hall nira sa tokitaki ena gauna ni vakacoko, sa sega tale ga na nodra ivavakoso kei na yalava ra dau vunautaka kina na itukutuku vinaka.—2 Korinica 1:3.
‘Uqeti Keimami Dina na Nodra Vakabauta’
Justin: Era sureti na bolecakacaka ena Okotova 2005 mera lai veivukei ena vanua ni vakacoko ena Gulf Coast. Au vakalewe fomu sara kei watiqu o Tiffany, keirau qai sureti ena Feperueri 2006 me keirau veivuke vei ira na tuki kava ni delavuvu ena vanua ni vakacoko ena korolevu o Kenner, volekati New Orleans.
Keimami na cakacaka ena dua na vale e veisiga, keirau veikilai tale ga kei ira na tacida e kea, e uqeti keirau dina na nodra vakabauta kei na nodra nuitaka na Kalou. Keirau dau vakasamataka tale ga ena veisiga ni ka wale na kena nuitaki na iyau. Sega ni vakatauvatani rawa na marau eda raica ena veika e uqeti ira kina nona tamata o Jiova mera cakava rawa, ra qai veivukei tale ga vei ira na mataveitacini.
[Kato/iYaloyalo ena tabana e 18]
Veiqaravi ena Vanua ni Vakacoko
Era tekivu ena rauta na 4:30 na kaloko ena veimataka o ira na vakasaqa e valenikuro ena vanua ni vakacoko. Ni bera na katalau era na soqoni mada ena vanua ni kana ena 7:00 na kaloko, me veivosakitaki kina na tikinivolatabu ena siga me tini na miniti. Ena rairai kidavaki ira tale ga na yaco vou yani o jeameni, qai tukuna e dua na itukutuku veivauqeti e se qai yaco ga.
Oti ra qai masu, ra katalau vakavinaka ni bera nira tekivu cakacaka. So era na tiko ga ena vanua ni vakacoko qori, mera cakacaka ena ofisi, vanua ni sava isulu se valenikuro. Ena vakarautaki tale ga e kea na kedra ivakasigalevu na tacida era lesi ina veivanua mera lai veivukei kina, ia ena dua mai nodra dui timi ena mai kauta na kedra.
Era na vulica e dua na ulutaga ni vuli iVolatabu ena Vale ni Vakatawa ena veiyakavi ni Moniti. E tabaka na mekesini qori na iVakadinadina i Jiova. E veivakaukauataki vakayalo na vuli va qori—era vosota kina ena marau, qai donu tiko ga na nodra rai me baleta na nodra cakacaka.—Maciu 4:4; 5:3.
[Kato ena tabana e 19]
“A Cala na Noqu Rai Baleti Kemuni”
A vakabira tu e dua na marama mai New Orleans ena nona matanikatuba na ivakatakilakila: “Sega ni Vakatarai e ke na iVakadinadina i Jiova.” Ia, dua na siga era mai vakavinakataka e dua na ilala bolecakacaka na vale a vakacacani ena cagilaba, e toka veibasai ga ena tai kadua ni gaunisala. E dau raica ena veisiga na nodra cakacaka ena marau kei na matadredredre. A via kila na veika era cakava tiko, mani lako sara vei ira. Nona kila nira iVakadinadina i Jiova, e kaya ni a sega mada ga ni dua mai na nona lotu e bau qiriti koya yani ni oti na cagilaba. “Macala ga ni a cala na noqu rai baleti kemuni,” e kaya. Na cava e yaco? E biuta laivi na ivakatakilakila, qai tukuna vei ira na iVakadinadina mera sikovi koya yani.
[iYaloyalo ena tabana e 16]
Robert kei Veronica
[iYaloyalo ena tabana e 16]
Frank kei Veronica
[iYaloyalo ena tabana e 17]
Gregory kei Kathy
[iYaloyalo ena tabana e 17]
Wendell kei Janine
[iYaloyalo ena tabana e 18]
Matthew kei Darline
[iYaloyalo ena tabana e 18]
Ted kei Debbie
[iYaloyalo ena tabana e 18]
Justin kei Tiffany