Na Cava na iNaki ni Noda Bula?
Na cava na ibalebale ni bula?
E DAU tarogi vakalevu na taro qo, ia e levu era qai taroga tale: Sa kena inaki beka ga me 70 se 80 na yabaki ni noda bula, oti da mate sara, qai sega na ka eda vakanamata tu kina?—Same 90:9, 10.
Kena irairai nida dau vakasamataka vakalevu na taro qo ena gauna eda liaca kina na lekaleka ni noda bula. Sega ni kena ibalebale meda donuya sara e dua na leqa levu meda qai vakasamataka na vu ni noda bula tiko. Ni sega ni dau yaco na ka eda namaka e rawa ni votu mai kina na taro qo. So tale era taroga na taro qo nira raica lesu na ivakarau ni nodra bula.
A cakacaka vinaka tu o Dave, dua nona vale vinaka, qai taleitaka nona dau veimaliwai kei ira nona itokani. E kaya: “Au taubale tiko i vale ena dua na bogi ni oti mai e dua na pati, au qai vakasamataka ‘Sa koya beka ga qo?—Au na bula ga vakalekaleka qai mate yani? Se tiko tale beka e dua na ka?’ E lauti au na kena sega ni vakainaki tu na noqu bula ena gauna ya.”
Ena nona ivola Man’s Search for Meaning, a dikeva o Viktor Frankl ni so era vakabulai mai na veivakararawataki nei Itala era a taroga tale ga na taro qo ni oti nodra sereki mai na keba ni veivakararawataki. Nira lesu ina nodra itikotiko, ra qai kila e so ni sa mate na wekadra lomani. E vola o Frankl: “E nanuma o koya e sereki mai ni sa galala, ia e kunea ga na rarawa ni raica ni duidui sara na bula a vakanamata tu mai kina!”
Ira na Taroga na Taro Qori
Era dau taroga na veitabatamata kece na inaki ni noda bula. Na iVolatabu e tukuni ira na dau taroga voli na inaki ni nodra bula. A vakayalia o Jope nona iyau, ra mate kece na luvena ena gauna a vosota tiko kina na tauvimate mosimosi, a qai taroga: “A cava ka’u a sega kina ni mate ni’u sa qai sucu mai? A cava ka’u a sega kina ni ciba ni’u sa lako mai na kete?”—Jope 3:11.
A tautauvata tale ga na ka a vakila na parofita o Ilaija. A nanuma ni a qarava taudua tiko ga na Kalou, mani lelevaka: “I Jiova sa rui levu; ni vakaotia ga na noqu bula.” (1 Tui 19:4) Sega ni vou vei keda na rai va qo. E kaya sara ga na iVolatabu ni o Ilaija e ‘tamata vakataki keda ga.’—Jeme. 5:17.
Na Bula Vakainaki
E dau vakatauvatani na bula me vaka e dua na ilakolako. E rawa ni o tekivuna e dua na ilakolako qai sega ni vakasamataka na vanua mo lai tini kina, e vaka kina nomu bula, rawa ni toso tu ga ia o sega ni kila na kena inaki. Ke o tiko ena ituvaki qo, o rawa ni lai tini ina ituvaki e vakatoka e dua na dauvolaivola o Stephen R. Covey, me “bula osooso.” E vola “nira sega ni dau marau o ira na rawati ira, era rawaka ia era vakayalia kina na ka era qai liaca e muri ni a yaga dina ena nodra bula.”
Sega li ni na tawayaga noda vakatotolotaka noda ilakolako ke da mua cala tiko? O koya gona, ena sega ni vakainaki na noda bula nida vakatotolotaka noda “bula osooso,” da qai galili, da sega tale ga ni lomavakacegu.
Se da lewena e dua na matatamata, se duidui na yabaki ni noda bula, eda na dau via kila voli ga na vu ni noda bula. E vakavuna tiko qo e dua na gagadre e tiko kece vei keda, oya na gagadre vakayalo. Eda na sega ga ni lomavakacegu, dina nida sa tiko vinaka vakayago. Dikeva mada na ka era cakava e so mera vakaceguya kina nodra gagadre vakayalo nira qara tiko na inaki ni bula.
[Tikina bibi ena tabana e 24]
Ena sega ni vakainaki na noda bula nida vakatotolotaka noda “bula osooso,” eda na rarawa ga kina, da qai sega ni lomavakacegu
[iYaloyalo ena tabana e 23]
A taroga o Jope se cava na vuna e sucu mai kina
[iYaloyaloy ena tabana e 24]
E ‘tamata vakataki keda ga’ o Ilaija