Vakayagataka Vakavuku na iLavo

E KILAI levu na ivosavosa qo ena iVolatabu “Sa vu ni ka ca kecega nai lavo.” Na kena ibalebale ga oya: “Ni sa vu ni ka ca kecega na daulomana nai lavo.” (1 Timoci 6:10) Eso era dau vinakata vakalevu na ilavo, ra qai saga vakatabakidua na vaqara iyau. So tale era bobula ina ilavo, qai yacovi ira na leqa lelevu. Ia ke vakayagataki vakavuku na ilavo, ena yaga. E kaya na iVolatabu ni “dau walia e levu na leqa na ilavo.”​—Dauvunau 10:19, Holy Bible—Easy-to-Read Version.

E sega ni ivoladusidusi me baleta na ilavo na iVolatabu, ia era tu kina na ivakasala yaga me dusimaki keda meda vakayagataka vakavuku na ilavo. Na lima na tikina e tarava era vakatututaka na daunivakasala ena veika vakailavo qai salasalavata kei na veika e tukuni ena iVolatabu ena gauna makawa.

Maroroi iLavo. E volai tu ena iVolatabu nira dau vakavulici na Isireli ena yaga ni maroroi ilavo. E tukuni mera dau maroroya ena veiyabaki e dua na ikatini (se 10 na pasede) ni ka era rawata me soli vakatabakidua ena nodra solevu vakamatanitu. (Vakarua 14:22-27) E uqeti ira tale ga na lotu vaKarisito taumada na yapositolo o Paula mera dau biuta vakatikitiki eso na ilavo e veimacawa me nodra cau vei ira na dravudravua era vakabauta vata. (1 Korinica 16:1, 2) E levu na daunivakasala ena veika vakailavo era dau uqeta meda maroroi ilavo. E bibi gona mo cakava qori. Na gauna ga o saumi kina, biuta sara na ilavo o vinakata mo maroroya ena baqe se dua na vanua vinaka. O na sega kina ni temaki mo vakayagataka.

Wasewasea Vinaka na iLavo. Qo na sala vinaka duadua me qarauni, lewai vinaka qai maroroi kina na ilavo. Ni o wasewasea vinaka, o na kila na veika o vakayagataka kina, ena yaga tale ga ena veika o sa lalawataka tu mo cakava. Kila na levu ni ilavo o rawata, ia me kua ga ni sivia na ka o vakayagataka. Mo kila vinaka na duidui ni ka o gadreva dina, kei na ka o vinakata tu ga. Ena vuku ni vakasama qo, e uqeti ira vakayalomatua na vakarorogo tu o Jisu mera “cakacakataka na kena i sau” ni bera nira cakava e dua na ka. (Luke 14:28, VV) E vakasalataki keda na iVolatabu meda kua ni dau dinautaka na ka e sega ni yaga.​—Vosa Vakaibalebale 22:7.

Dau Lalawa Vinaka. Lalawataka vinaka na ka o kila ni na yaga ena veigauna se bera mai. Kena ivakaraitaki, ke o nanuma tiko mo volia e dua na vale se dua na rumu e dau tu ena tabavale lelevu, ena vinaka me veirauti ga na ilavo o dinautaka me saumi kina. Ena rairai va tale ga qori na nona via taqomaka na nodratou bula na nona lewenivuvale e dua na tagane vakawati. Ena cakava qo ena nona inisuataka nodratou bula, sauma tu na veiqaravi vakavuniwai, se na kena vakaleqai na yagona e dua vei ratou, se so tale na ka. Nida vakarautaka tiko na veika me baleta na noda bula ena gauna se bera mai, ena rairai okati tale ga kina na veika meda na cakava nida sa cegu mai na cakacaka saumi. E uqeti keda na Vosa Vakaibalebale 21:5 (NW) meda nanuma tiko ni “ka sa lalawataka na tamata vuku ena yaga dina.”

Vuli. Saga mo vulica e dua na cakacaka, mo qarava vinaka kina nomu bula kei na veika o vinakata. Ena yaga ena dua na gauna e liu. Me kua ni mudu na nomu vuli. E vakabibitaka na iVolatabu me tiko vei keda “na vuku dina kei na lewa vinaka,” qai uqeti keda meda vulica tiko ga na veika qori.​—Vosa Vakaibalebale 3:21, 22; Dauvunau 10:10.

Me Veiraurau. Kua ni vakasabusabutaka na ilavo. E laurai ena levu na vakadidike nira marau vakalevu o ira na dau veikauaitaki mai na nodra vakabibitaka na ilavo. Eso era sega ni lewai ira vakamatau nira sa rui kocokoco. Na cava era dau cakava? Nira sa rawata vakavinaka na veika era gadreva dina, sa ra qai saga mera vutuniyau. Ia, ke sa tu na kakana, isulu kei na vale, na cava tale ena vinakata e dua? Sa rauta me vola tale ga na dauvola iVolatabu ena itekitekivu ni ulutaga qo: “Kevaka sa tu vei keda na kakana kei nai sulu, me da lomavinaka [“lomavakacegu,” NW] kina.” (1 Timoci 6:8) Ke da lomavakacegu ena ka e tu vei keda eda na taqomaki meda kua ni kocova na ilavo, kei na leqa e salamuria mai.

Na daulomana na ilavo e dau vakavuna dina na veika ca. Ena lewai iko na ilavo ke o sega ni qaqarauni. Ia ke vakayagataki vakavuku na ilavo o na rawa ni galala mo cakava kina eso na ka e bibi cake, me vaka nomu veiwekani voleka kei ira na lewe ni nomu vuvale, nomu itokani, kei na Kalou. Ena vuravura eda bula tu kina qo, eda na dau leqataka ga na veika vakailavo. Ena dau vakavuna beka noda lomaocaoca na ilavo? Na inuinui cava e tu me baleta na kena vakaoti na bula dravudravua? Ena saumi na taro qori ena iotioti ni ulutaga veitaravi qo.