Era Uqeti na iTabagone Lotu Katolika Mera Vunau

DAUVOLAVOLA NI YADRA! MAI OSITERELIA

ENA Julai ni yabaki sa oti, era tadu yani e Serene, mai Ositerelia, na lotu Katolika mera marautaka na World Youth Day 2008 (Siga ni iTabagone e Vuravura 2008), na soqo vakalotu e vakailavotaka na lotu Katolika.

Era osota na gaunisala na vulagi, se lewenilotu Katolika mai na 170 na matanitu, era qai yalovaka tu nodra kuila. Era kaila ena marau, ra lagasere, e vakilai kina ena siti na yalo ni soqo. E udolu vakacaca era yatuni e Sydney Harbor mera raici Pope Benedict XVI, a vodo yani ena waqa ra qai muri tu yani e 12 tale na waqa rairai totoka. Rauta ni 500 na milioni era sarava na soqo qo ena tivi.

Na iotioti ni Misa a vakayacori ena rara ni veitau ose, era tiko kina e rauta ni 400,000, okati kina e 4,000 na vakailesilesi ni lotu kei na 2,000 mai na tabana ni itukutuku. E soqo vakairogorogo duadua e Ositerelia, e sivia tale na kedra iwiliwili na tiko ena Olympic Games e Serene ena yabaki 2000.

Na cava na ibalebale ni Siga ni iTabagone e Vuravura? Na cava e solevutaki kina? Na cava soti a vakayacori ena soqo qo? Na cava e dusia me baleta nodra vakabauta na itabagone ra gole yani e Serene?

“Malumalumu Tiko na Nodra Vakabauta”

E dau solevutaki ena veiyabaki na Siga ni iTabagone e Vuravura, e vakacerecerei kina nodra vakabauta na itabagone lotu Katolika. Era marautaka na lewenilotu na siga qori ena nodra dui tabacakacaka vakalotu. Ia ni oti e rua se tolu na yabaki, e dau lesi e dua na siti levu me itaukei ni soqo, ra qai sureti na itabagone lotu Katolika e veiyasai vuravura mera tiko kina. Rauta ni tini na siti lelevu mai na lima na kodinede era sa itaukei ni soqo oti, qai vica na milioni era a tiko kina.

Era tukuna na vakailesilesi vakalotu ni inaki tale ga ni Siga ni iTabagone e Vuravura oya me wali na leqa ni kena sa lailai tiko na lewenilotu. “E vakilai nira sa sega ni muria e levu na vakabauta ni lotu Katolika, kei na kena sa malumalumu tiko na nodra vakabauta,” e kaya o George Cardinal Pell, dua vei ira na iliuliu ni matabete e Ositerelia. “Na inaki ni Siga ni iTabagone e Vuravura me caka kina e dua na ka.”

E dikeva na Vatikano ni sa lutu tiko ga na iwiliwili ni bete e veiyasai vuravura. Ena veiyabaki sa sivi, e le tini vakacaca na udolu era vakacegu mai nodra itavi vakabete mera vakawati. Ena loma ni 30 na yabaki sa oti, e lutu ena sivia na 70 na pasede na kedra iwiliwili na vuli bete e Ositerelia. Ena tabacakacaka levu duadua e Ositerelia, na ivakatautauvata ni yabaki ni bula ni bete e veiqaravi tiko e yabaki 60. Qo e sivia na 20 na yabaki na ivakatautauvata ni bula ni bete era veiqaravi ena 1977.

E levu na vanua e lutu tale ga na kedra iwiliwili na lai lotu. Rauta ni 25 na pasede ni lewenivanua e Ositerelia era tukuna nira lotu Katolika, ia e 14 ga na pasede era lotu vakawasoma. E lailai mai na 10 na pasede na itabagone lotu Katolika e nanumi nira dau lai lotu. E levu na lotu Katolika era beca na ivakavuvuli ni lotu me baleta na veiyacovi, vakayagataki ni itatarovi ni vakaluveni kei na veisere. Eso era rarawataka na veika ca e yaco tiko ena lotu, me vaka nodra vaqaseni ira na gone na bete.

Na Siga ni iTabagone e Vuravura “e iotioti ni sasaga me wali kina na leqa qo,” e kaya The Sydney Morning Herald. “Era saga na liuliu ni lotu e Ositerelia kei Roma me vaqaqacotaki qai vakabulabulataki na vakabauta ni lotu Katolika vei ira na itabagone.” Na cava era cakava tiko na iliuliu ni lotu me uqeti ira kina na itabagone?

Vakaraitaki iYaya kei na Pati

Na Siga ni iTabagone e Vuravura 2008 e okati kina na vakaraitaki iyaya ni lotu, ilawalawa era veiwasei, na nodra kumuni vata na lewe vuqa ena vanua e raici me vanua tabu, kei na nodra kumukumuni vata na lewe vuqa mera solevutaka na Misa. Dina ni veiuqeti vakalevu na veika qo, ia eso era raica ni dua tale na ivakarau ni yalo e vakabulabulataka na soqo. E kaya e dua na itabagone lotu Katolika mai Mereke o Alexandra me baleta na Siga ni iTabagone e Vuravura, “Qo e dua ga na pati levu.”

Na ono na siga ni soqo qo e Serene e caka kina e 450 tale na soqo, okati kina na koniseti, vakaraitaki ni iyaloyalo, drama, vakaraitaki ni iyaya, kei na soqo ena salatu. Na ivakatagi e rogoci e okati kina na opera, Gregorian chant (sere vageregorio), na ivakatagi karakaravisa kei na rap. E levu na itabagone era lako ina koniseti e rogoci kina na ivakatagi karakaravisa.

Na veika qori era kauai kina eso na lotu Katolika. Na soqo qo “e dua ga na pati ni marau​—na macawa ni pati kei na soqo vakavuravura, e lailai na ka vakayalo kei na veika tabu e caka kina,” e kaya na bete o Peter Scott ina tabana ni itukutuku na ABC News ni Ositerelia. Ena yabaki 2000, a vola o Pope Benedict XVI, ena gauna ya a Kadinala Ratzinger tiko kina: “Na [ivakatagi] ‘Rock’ e vakabulabulataka na gagadre vakayago. Ena gauna ni koniseti e vaka me sokaloutaki na ivakatagi va qo kei ira na lagata. E veisaqasaqa qo kei na sokalou vaKarisito.”​—The Spirit of the Liturgy.

E basika kina na taro, “Ena veisautaka beka na ivakarau ni bula na Siga ni iTabagone e Vuravura?” “Ena veisautaka beka e dua na iwasewase lailai,” e kaya na bete vakacegu o Paul Collins. “Ia, e levu era na tomana tiko ga nodra ivakarau ni bula makawa,” e kaya. “Na kena caka na soqo vakatubuqoroqoro, ena sega ni kauta mai na veisau. Ena rawa na veisau ke da vakasamataka vakabibi na ka, meda lalawa vakamatau, kei na noda yalorawarawa na walia na leqa sa tu dede.”

“Dou na Qai Dautukuni Au”

Era kila vinaka tu na veika qo o ira na iliuliu ni lotu. E usutu gona ni Siga ni iTabagone e Vuravura 2008: “Dou na rawata na kaukaua ni sobuti kemudou na Yalo Tabu; dou na qai dautukuni au.”a

Era uqeti ira na lewenilotu era soqo yani o ira na bisopi mera “gumatua tale mera vakataki ira na yapositolo, ena nodra tukuna na ivakavuvuli i Karisito ena gauna qo.” E vakadreti ira tale ga o Pope Benedict XVI mera “dua na itabatamata vou ni yapositolo,” ena dua tale na gauna e uqeti ira mera vakatetea “na iTukutuku Vinaka vei nodra itokani, vuvale, kei ira kece era sota kaya.”

Na veiuqeti qo a tarai ira eso na yalodina. E kaya o Ramido, e yabaki 20 mai Mereke vua e dua na dauvolaitukutuku: “Au raica vakabibi na itavi meu dau vunau.” Ia, e tukuna o Beatrice, e dua na goneyalewa yabaki 18 mai Itali: “Era sega ni dau tukuna na itukutuku ni Kalou na itabagone ena gauna qo. E ka dredre meda vunau ena gauna qo.” E levu na lewenilotu era duavata kei na nodrau ivakamacala e rua na goneyalewa mai Texas, e Mereke, “O ira ga na dau vunau ena vanua keirau gole mai kina o ira na iVakadinadina i Jiova!”

iTabagone Era Dau Vunau

Io, era kilai na iVakadinadina i Jiova, na itabagone kei na itabaqase nira dau gumatua na vunau. Na cava era gumatua kina? “Noqu lomana na Kalou, lomani ira na tamata, kei na noqu lomana na iVolatabu,” e kaya o Sotir, e yabaki 22 mai Serene.

Ni vakacagau tiko na Siga ni iTabagone e Vuravura 2008, rauta ni 400 na itabagone iVakadinadina i Jiova e Serene, era vakaitavi ena dua na cakacaka lavotaki mera wasea na ka dina vakaivolatabu vei ira na lotu Katolika era a gole yani, ia era sega ni vakaitavi ena soqo. “Au taleitaka sara ga na vosa vei ira na itabagone lotu Katolika qo era kauaitaka na veika vakayalo,” e kaya o Travas, e yabaki 25. “E levu era taroga na taro vakaivolatabu, au qai marautaka meu sauma nodra taro.”

“Au vunau tawalokuci vei ira,” e kaya o Tarsha, e yabaki 23. “Au via kidavaki ira ena nodra gole mai Serene qai tu vakarau na rogoca nodra vakabauta.” “Ena ituvaki veiganiti, au lolomataka vei ira na vulagi na ivola Na Cava Sara Mada e Kaya na iVolatabu?” b e kaya o Frazer, e yabaki 20. “Era taleitaka kece na taura na ivola.”

E levu na vulagi era marautaka dina nodra veivosaki kei ira na itabagone iVakadinadina. O Suzanne mai Viti, a tarogi Belinda, e dua na itabagone iVakadinadina yabaki 19, se cava e vakatara kina na Kalou na rarawa. E vakatura o Belinda me rau veivosakitaka na kena isau ena ivola Kaya na iVolatabu. Ni oti nodrau veivosaki, e kaya o Suzanne: “Dau matau ga meu rogoca ni Kalou e dau cakacaka ena sala vuni. Ia, qo e saumi dina noqu taro!” Ni solia vua na ivola o Belinda, e kaya o Suzanne: “Au a saga meu nanuma na veika kece o tukuna. Au sega ni vakabauta ni o na solia vei au na ivola qo!”

E dua na marama mai na yatu Filipaini a kerei Marina, e dua na iVakadinadina yabaki 27, me tabaki koya ena dua na vale kilailevu e Serene. Rau mani veivosaki sara qai solia vua o Marina na ivola Kaya na iVolatabu. “Au a masulaka sara ga ena bogi meu kila vinaka na iVolatabu,” e kaya na marama qo. “Au kila ni na rawa ni sauma noqu masu na ivola qo!”

O Levi, e dua na iVakadinadina yabaki 27, a veivosaki kei na rua na vulagi mai Panama, e dua na marama kei na luvena goneyalewa. E toso na veivosaki ina veika vakayalo qai veivosakitaki na ivakavuvuli vakaivolatabu. Rau ciqoma na ivola Kaya na iVolatabu. E qai taroga o Levi, “Na cava drau taleitaka me baleta nomudrau gade?” E taura cake na goneyalewa na ivola Kaya na iVolatabu qai kaya, “Noqu sotavi iko.”

Io, e levu na itabagone lotu Katolika era vinakata mera kila e levu tale na ka me baleta na iVolatabu. Vakacava o iko? O via kila vinaka na iVolatabu? O rawa ni tarogi ira na iVakadinadina i Jiova mo vulica na iVolatabu, e sega ni saumi. Era na marau na vukei iko!

[iVakamacala e ra]

[Tikina bibi ena tabana e 25]

“E vakilai na leqa levu ni nodra sa sega ni muria na vakabauta ni lotu Katolika e levu, kei na kena sa malumalumu tiko ga na nodra vakabauta.”​—Na bete o George Cardinal Pell

[Kato/​iYaloyalo ena tabana e 23]

NA CAKACAKA VAKALOTU

Na Siga ni iTabagone e Vuravura 2008 a vakaraitaki kina na cakacaka vakalotu levu duadua me bau vakaraitaki e Ositerelia. E sivia ni 100 na ilawalawa ni lotu Katolika kei na isoqosoqo era uqeti ira na sivia na 50,000 na lewenilotu mera veiqaravi vakabete, sisita, se cakacaka ena veika vakalotu.

[iYaloyalo ena tabana e 22]

Era osota na salatu na vulagi lotu Katolika

[iYaloyalo ena tabana e 24]

Era vunau na iVakadinadina i Jiova vei ira na lotu Katolika era gade ena siti o Serene

[iTaba ni Credit Line ena tabana e 22]

Getty Images