Na Rai ni iVolatabu
E Cala Beka mo Veisautaka Nomu Lotu?
Na gauna a vulica kina na iVolatabu o Avtar eratou sega ni taleitaka nona vuvale, ni ratou lotu Sikh. E kaya o Avtar: “Mai noqu vanua, ni o veisautaka nomu lotu o na sega tale ni wiliki ena vanua ya. Na yaca i keimami mada ga e vakaibalebale vakalotu. Ni o veisautaka nomu lotu ena tukuni ni o sega ni taleitaka na vanua o cavutu mai kina qai sega ni doka na vuvale.”
A YACO me iVakadinadina i Jiova o Avtar. A cala beka ni veisautaka nona lotu? De dua e tautauvata na nomu rai kei na rai ni nona vuvale. O na rairai nanuma ni sega ni dodonu mo veisautaka nomu lotu baleta ni se nodra lotu mai na nomuqase kei na vanua.
E bibi dina meda doka na vuvale. E kaya na iVolatabu: “Mo vakarorogo vua drau sa veitamani dina kaya.” (Vosa Vakaibalebale 23:22) Ia e bibi sara meda kila na ka dina me baleta na Dauveibuli kei na nona inaki. (Aisea 55:6) Ena vakavatukana beka na sasaga va qo? Ke vaka kina, e bibi vakacava vei iko na sasaga qo?
Vaqara na Ka Dina
E veicoqacoqa na rai era vakavuvulitaka na veimatalotu e vuravura. Ia era sega ni dina kece. E laurai kina ni levu na tamata, me vaka e kaya na iVolatabu, era “gumatua dina sara e na nodra qarava na Kalou, ia e sega ga ni maucokona vinaka sara na nodra kila.” (Roma 10:2, VV) Ia, e kaya na yapositolo o Paula ena 1 Timoci 2:4, ni loma ni Kalou oya mera ‘mai kila sara na ivakavuvuli dina na tamata kece ga.’ Ena kunei vakacava na ivakavuvuli dina qori?
Vakasamataka mada na vuna meda dikeva kina na iVolatabu. E kaya o Paula, na dauvola iVolatabu: “Sai koya na Kalou sa vakavuna nai Vola Tabu kecega, a sa yaga oqo mei vakavuvuli.” (2 Timoci 3:16) Ni o vakasaqara tiko na ka dina, dikeva na ivakadinadina e dusia ni ka e tukuna na iVolatabu e ka dina. E sega ni vakatauvatani rawa na vuku e kunei kina, na kena volatukutukutaki vakadodonu na itukutuku makawa, kei na vakayacori ni parofisai.
E sega ni vakavulica na iVolatabu ni lotu kece e vakadonuya na Kalou. E kaya ga vei ira na dauwiliwili mera kua ni vakabauta na ka kece era rogoca, ia mera ‘vakatovolea mada se ra vu dina mai vua na Kalou se sega.’ (1 Joni 4:1) Kena ivakaraitaki, na ivakavuvuli e vu dina vakalou e dodonu me salasalavata kei na nona itovo, okati kina na itovo e kilaitani kina oya na loloma.—1 Joni 4:8.
E vakadeitaka vei keda na iVolatabu ni vinakata na Kalou meda ‘kunei koya.’ (Cakacaka 17:26, 27) E vinakata na Dauveibuli meda vakasaqara na ka dina, ena sega gona ni cala ke da cakacaka sara ga ena ivakadinadina eda kunea—ke veisau mada ga kina noda lotu. Ia na leqa cava ena yaco kina?
Veiraurau Nomu Yalodina Vei Ratou Nomu Vuvale
Nira veisautaka nodra vakabauta eso, era na rairai vakatulewataka nira na sega tale ni vakaitavi ena so na ivalavala ni sokalou ra dau cakava tu e liu se olodei. Macala ga nira na cata qori na lewenivuvale. E kila vinaka qo o Jisu. E kaya vei ira nona imuri: “Ka’u sa lako mai me tawasei rau na veitamani-tagane, kei na veitinani-yalewa, kei na veivugoni-yalewa talega.” (Maciu 10:35) E vakaibalebaletaka beka o Jisu ni ivakavuvuli ena iVolatabu e vakarautaki me vu ni veileti? Sega. E kila vinaka tu na ka ena yaco ena vuvale ni basika na rai cala vua e dua e saga me dei ena nona vakabauta vou.
Dodonu beka me levei na duidui vakavuvale? E vakavulica na iVolatabu ni dodonu vei ira na gone mera talairawarawa vei nodra itubutubu kei ira na yalewa vakawati mera vakamalumalumu vei watidra. (Efeso 5:22; 6:1) Ia e vakasalataki ira na lomana na Kalou mera “talairawarawa vua na Kalou, me kakua ga vei ira na tamata.” (Cakacaka 5:29) Koya gona, ena so na gauna, na talairawarawa vua na Kalou ena rairai vakavuna mo vakatulewataka eso na ka ena sega ni matau vei ira na lewenivuvale.
Dina ni vakamatatataka na iVolatabu na duidui ni ivakavuvuli dina kei na ivakavuvuli lasu, ia e solia tu na Kalou na digidigi vei keda yadua meda vakatulewataka na ivakavuvuli meda muria. (Vakarua 30:19, 20) Me kua ni vakasaurarataki e dua me sokalou ena sala e sega ni vinakata se vakaukauataki me digia nona vakabauta se nona vuvale. E dau vakavuna beka na kavoro ni bula vakavuvale na vuli iVolatabu? Sega. Na iVolatabu e uqeti ira na tagane vakawati kei na watidra era sega ni vakabauta vata mera duavata tiko ga vakavuvale.—1 Korinica 7:12, 13.
Valuta na Rere
O na rairai ririkotaka na ka era na cakava o ira na tiko wavoliti iko ena nomu vuli iVolatabu kei ira na iVakadinadina i Jiova. E kaya o Mariamma: “Eratou leqataka noqu vuvale niu na sega ni raica rawa e dua na watiqu vinaka me na qaravi au. Ratou mani saqata noqu vuli iVolatabu.” A nuitaki Jiova o Mariamma mani tomana tiko ga nona vuli. (Same 37:3, 4) O rawa ni cakava tale ga qori. Mo vakasamataka ga na kena yaga, kua ni leqataka sara na kena itinitini. Na itukutuku ena iVolatabu e veisautaka na ivakarau ni bula qai vakavinakataka na noda itovo. Eda vulica meda lomana noda vuvale. Ena rawa ni wali na ivakarau ca me vaka na vosa cudrucudru, ivalavala kaukaua, vakayagataki vakasivia ni alakaolo kei na wainimate gaga. (2 Korinica 7:1) E uqeta na iVolatabu na itovo vinaka me vaka na yalodina, dau dina kei na daucakacaka. (Vosa Vakaibalebale 31:10-31; Efeso 4:24, 28) Vakacava mo vulica na iVolatabu qai raica na yaga ni nomu bulataka na kena ivakavuvuli?
BAU VAKASAMATAKA?
◼ Na cava mo dikeva kina nomu vakabauta?—Vosa Vakaibalebale 23:23; 1 Timoci 2:3, 4.
◼ O na kila vakacava na ivakavuvuli dina?—2 Timoci 3:16; 1 Joni 4:1.
◼ Me tarova beka nomu vuli iVolatabu na nodratou veitusaqati nomu vuvale?—Cakacaka 5:29.
[Tikina bibi ena tabana e 27]
Na itukutuku ena iVolatabu e veisautaka noda ivakarau ni bula qai vakavinakataka noda itovo
[iYaloyalo ena tabana e 27]
Mariamma kei watina