Nodra Vukei na iTabagone

Ke uasivi tu na bula e vuravura, ena vinaka vakaoti nodra veidusimaki kei na nodra veituberi na itubutubu kece, ni na dei qai tau ena yalololoma. Era na dau vosa vei ira na luvedra, wilivola, ra kanavata, ra qai saga mera kilai ira vinaka. Ia era sega ni uasivi na itubutubu. E tukuna vakadodonu na iVolatabu: “Sai valavala ca ko ira kecega na tamata, ka ra sega ni yacova na ka e vakarokorokotaki kina na Kalou.”​—Roma 3:23.

Ke o itabagone, de o na nanuma ni ivakarau ni bula e vale e sega ni vinaka​—o na rairai dina. Ia e levu na ka o rawa ni cakava me lailai kina nomu lomaocaoca, mo marau tale ga vakalevu. Dikeva e vica na sala ena yaga kina vei iko na ivakavuvuli vakaivolatabu.

Vakatutu 1

Dau Veimaliwai, Kua ni tu Duadua

“Sa tawasei koya tani na tamata, sa qara na ka e domona, a sa veivorati kei na vuku kece.” (Vosa Vakaibalebale 18:1) Eso na itabagone e dau dredre mera veimaliwai, e rawarawa ga mera sara tivi se qito vidio game. So tale era dau tu duadua ga nira mamadua. O Elizabeth e dua na itabagone e vakadinata ni “dau mamadua,” e kaya: “Noqu mamadua e vaka sara ga noqu rerevaka e dua na ka. Au sega mada ga ni rawa ni vakaliuliu na lai vosa vei ira eso tale.”

A walia vakacava na mamadua o Elizabeth? E dua na iVakadinadina i Jiova, e tiki sara ga ni nona sokalou me tiko ena soqoni kece vaKarisito. E tukuna: “Dina niu mamadua, au dau saga meu vosa vua e dua ena gauna ni soqoni. Ke sega ni rawa qori, au na sega ni yalolailai kina. Au dau kauai ga ena ka au rawata. Au vakila ni yaga na noqu kilai ira eso tale.”

Vakacava mo vola na yacadrau e rua se tolu na mataveitacini o via kila vinaka? Me nomu isausau ena vica na macawa e tarava mo kila eso na ka me baleta e dua vei ratou. Oti, vola na ka vinaka o na via cakava vei ratou ena vula e tarava. Saga sara mo cakava.​—Cakacaka 20:35.

Ke o drovaka na leqa, qai via tu duadua ga, ena rairai vakavuna mo kauaitaki iko tale vakasivia. Ena dua tale na yasana, e veivakasalataki na iVolatabu meda ‘kua ni nanuma na ka me baleti keda ga, ia meda nanuma tale ga na nodra ka na tamata tani.’ (Filipai 2:4) Ena veiraurau nomu raica na leqa ni o muria na ivakavuvuli qori ena nomu veimaliwai, o na rawa ni walia tale ga.

Vakatutu 2

Dro Tani Mai na Veidauci

“Dro tani mai na veidauci. Na ivalavala ca kece e cakava e dua e cakava ena taudaku ni yagona, ia o koya e dau veidauci e sa valavala ca sara tiko ga e yagona.” (1 Korinica 6:18, NW) O na vorata vakacava na veitemaki ni veidauci era coko tu kina e levu na itabagone nikua?

Kena imatai, vakasamataka vinaka na ulutaga qo ni bera ni o temaki. “Na tamata yalomatua sa daulewa vakavinaka na nonai lakolako,” e tukuna e dua na vuku. (Vosa Vakaibalebale 14:15) O Mbali, e dua na goneyalewa ni Sauca Aferika, e kaya: “Niu vuli tiko ena sekeneri, a vakaraitaka vakavica e dua na cauravou ena noqu kalasi ni vinakati au. Ra uqeti au na goneyalewa ena noqu kalasi me keirau veibuku baleta ni tagane matavinaka​—e dau saumi me vakaraitaki sulu kei na iyaya (model), qai lewena na timi ni soka e koronivuli. Au kila ni tagane matavinaka, ia au sa vakatulewataka me savasava tiko ga na noqu itovo. Era nanuma noqu icaba ni sega ni ca na veiyacovi vakaveitalia. Ia au kila na ka e ca kei na ka e vinaka, au sa vakatulewataka oti na ka meu cakava ena ituvaki va qo.”

Kena ikarua, nomu masuti Jiova mo dei tiko ga ena nona ivakatagedegede savasava. O Maggie, e dua na itabagone mai Igiladi, e kaya: “E vakaukauataki au na masu ena gauna era temaki au kina eso meu veiyacovi. Au na sega ni walia rawa vakataki au na ituvaki qori. Au vakamacalataka na leqa qo vei rau noqu itubutubu kei ira noqu itokani matua.”

Vakatutu 3

Lomani Rau Nomu iTubutubu

“Dou lomavata kecega, dou ia na loloma vakai kemudou, dou veilomani me vaka na veitacini, dou yalololoma.” (1 Pita 3:8) E sega ni vakatau vei iko na nodrau veibiu se sega nomu itubutubu, se mo lewa na nodrau digia me rau cakacaka ruarua. Ia o rawa ni lewa se na tara vakacava nomudou veiwekani na vica na ituvaki qo. Dua na sala mo vakalailaitaka kina na lomaocaoca mo qai marau vakalevu, ya nomu saga mo lomani rau nomu itubutubu. Saga mo kila na dredre rau vakila voli.

A muria na ivakasala qori e dua na itabagone o Amber. E tukuna ni so na gauna na nona veiwekani kei tinana e vakavu rarawa, lomaocaoca, kei na rai cala. E tomana: “Levu sara na ka dredre e sotava o tinaqu ena nona bula. O koya duadua ga a susugi keitou na va na luvena. E vakarautaka na vale me keitou bula kina, kakana, kei na isulu. Au qoroya nona yaloqaqa, au na saga tale ga meu yaloqaqa niu sotava na ituvaki dredre.”

Ke o saga mo veinanumi, mo kila na ituvaki dredre rau sotava voli nomu itubutubu, ena donu tiko ga nomu rai me baleta na leqa o sotava tiko. Ni o cakava qori, o na kila nodrau itovo vinaka, o na muria tale ga.

iVurevure ni iVakasala Yaga

Qori e vica ga na ivakasala yaga e volai ena Vosa ni Kalou. Ni o vulica e levu tale na ka ena iVolatabu, o na vakavinavinakataka na ivakasala yaga e tu kina.a

O na vulica e levu na ka ena iVolatabu ke o veimaliwai kei ira na iVakadinadina i Jiova, o qai vulica vata kei ira na ivola qori. Ni o cakava qori o na kunea na itokani dina era na vakayaloqaqataki iko ni o sotava na ituvaki dredre, ra qai uqeti iko mo muria tiko ga na ivakasala vakaivolatabu. Sega ni ka rawarawa noda muria na ivakatagedegede vakaivolatabu. Ia nida muria ena yaga tawamudu vei keda.​—Aisea 48:17, 18.

[iVakamacala e ra]

[Kato/​iYaloyalo ena tabana e 8, 9]

Na Ka ena Yaga Vei Ira na iTabagone

Veimaliwai kei Ira na iTubutubu: A tukuna o Jiova vei ira na itubutubu e Isireli ni dodonu mera dau veivosaki kei luvedra, ‘nira tiko ena nodra vale, nira lako voli tale ga ena sala.’ (Vakarua 6:6, 7) Kena ibalebale mera dau solia nodra gauna vei luvedra. A kila o Jisu ni bibi me solia nona gauna me veimaliwai kei ira na gone. Kena ivakaraitaki, nira ‘kau mai vua eso na gonelalai, me tarai ira,’ na cava a cakava o Jisu? “A sa keveti ira, ka tabaki ira e na ligana, ka vosavakalougatataki ira.” (Marika 10:13, 16) E kotora o Jisu na ivakaraitaki vinaka mera muria na itubutubu!

Daudina, Veivosaki Vakadodonu: E tukuna na iVolatabu: “Ni sa sega na bose, sa sega ni yaco na ka e nanumi.” (Vosa Vakaibalebale 15:22) Na veivosakitaki ni veika e bibi kei luvemu ena yaga ena gauna era se gone kina. E bibi sara na veivosaki va qori nira sa itabagone ni qori na gauna era sega ni tiko kina vakalevu e vale, nira veimaliwai tu ga vakalevu kei nodra itokani e koronivuli se so tale nodra ilala. Ke sega ni veivosakitaki na veika bibi​—sega na daudina rau qai sega ni veivosaki vakadodonu na gone kei na itubutubu​—era na vaka na vulagi na gone ena lomanivuvale.

Veivunauci e Veiganiti: Na veivunauci e vakaibalebaletaki ena veivakadodonutaki kei na veivakavulici​—dina ni na rairai tau na itotogi. E tukuna na Vosa Vakaibalebale 15:5: “O koya sa lialia sa beca nai vakavuvuli i tamana: ia ko koya sa vakabauta na vunau sa yalomatua.” Ena sega ni rawa me ‘vakabauta na ivunau’ na itabagone ke sega ni vunauci. Koya gona, me dau veiraurau nodra rai na itubutubu nira veivunauci. Me kua ni kaukaua nodra lewa, nira na vakararawataki ira na luvedra, rawa ni vakavuna mera yalolailai kina. (Kolosa 3:21) Ia era sega ni via vakawelewele na itubutubu mera vakavulici luvedra ena veika bibi. Na vakawelewele ena tini ena leqa.b

[iVakamacala e ra]