Ra Taroga na iTabagone

Au Sega ni Kilai Rau Vinaka na Noqu iTtubutubu​—Cava meu cakava?

Eratou vakayakavi tiko na vuvale i Jessica kei na so nodratou vulagi. Ni vakacagau tiko, e tukuna vei tinai Jessica e dua vei iratou na vulagi qori, “Au raici koya tu ena siga ya! O Richard​—kila na nomu itau tou vuli vata ena sekeneri.”

E lutu sara ga na icula nei Jessica. Sega vakadua ni bau rogoca na italanoa kei Richard!

“Sa! Dina ya Na, oi a dua bagi nomu itau ni bera o Ta? Au sega ni kila ya!”

O VAKATAKI Jessica, ni o kidacalataka e dua na ka o se qai kila tu me baleti rau nomu itubutubu? Ke vaka kina, o na rairai vaqaqa se cava tale me baleti rau o se sega ni kila.

Eso tale beka na ka o se bera ni kila me baleti rau nomu itubutubu? Ena yaga vakacava nomu kilai rau vinaka? Cava mo cakava?

Levu na Ka Mo Kila

Na cava beka o sega tu kina ni kila eso na ka me baleti rau nomu itubutubu? De dua, dou tiko veiyawaki. “Rau sere na noqu itubutubu niu se qai yabaki walu,” e tukuna o Jacob,a sa yabaki 22 ena gauna qo. “Ni oti ya, keirau dau sota ga vakavica kei ta ena dua na yabaki. Au diva tu meu kilai koya vinaka.”

De sa vakayabaki nomu bula vata kei rau nomu itubutubu, ia rau rairai sega ni tukuna na veika kece me baleti rau. Na vuna? O keda kece, wili kina na noda itubutubu, eda na rairai madua ena so na gauna meda tukuna na cala eda a cakava. (Roma 3:​23) Era leqataka ke ra vakaraitaka nodra malumalumu, era na sega ni dokai kina se ra na doudou na gone mera murilomadra ga.

E levu tale ga na gauna rau na sega ni dau veivosakitaka na veika me baleti rau, ni dou sega ga ni dau veitalanoataka. E tukuna e dua na cauravou o Cameron, “E kurabuitaki dina nida tiko vata kei noda itubutubu me vica vata na yabaki, ia se levu ga na ka me kilai me baleti rau!” Vakacava mo vakaliuliu mo kilai rau vinaka na nomu itubutubu? Vakasamataka mada e va na sala e yaga kina.

Kena yaga #1: Rau na rairai marautaka nomu kauai. Sega ni vakabekataki ni rau na marautaka nomu via kila na veika baleti rau. O cei e kila, rau na rairai kauaitaka sara ga na nomu vinakata mo kilai rau kei na nomu lomatarotaro!​—Maciu 7:​12.

Kena yaga #2: O na kila na nodrau itovo ni rai. Kena ivakaraitaki, rau a dravudravua tu beka eliu na nomu itubutubu? O na rairai kila kina na vuna rau dau maninitaka kina na ka, dina ni o sega ni kauai vakabibi ena tikina qori.

E yaga dina nomu kila na nodrau ivakarau ni rai nomu itubutubu. E tukuna o Cody, dua na cauravou yabaki 25, “Niu kila nodrau ivakarau ni rai noqu itubutubu au dau qarauna sara na ka au tukuna.”​—Vosa Vakaibalebale 15:23.

Kena yaga #3: O na yalorawarawa mo tukuna vei rau na veika baleti iko. “E sega ni rawarawa meu tukuna vei Ta niu sa vinakata tiko e dua na tagane,” e kaya o Bridgette, yabaki 18. “Ia na gauna au talaucaka kina vua na lomaqu, dua na ka nona kauai qai talanoataka na imatai ni gauna a dodomo kina kei na levu ni nona marau. E tukuna tale ga na rarawa e vakila ni rau sa tinia nodrau veivosaki. E uqeti au sara ga qo meu yalorawarawa meu talanoataka vua na kequ ituvaki.”

Kena yaga #4: O na vuli kina. Na veika rau sa sotava mai na nomu itubutubu ena uqeti iko mo vosota eso na ituvaki dredre era ka ni bolebole tale ga. E kaya o Josua e yabaki 16, “Au via kila sara ga se rau qarava vakacava e dua na vuvale levu na noqu itubutubu, me rau vakarautaka na veika vakayago, vakayalo kei na so tale na ka e baleti keitou. Eda rawa sara ga ni vuli kina.” E tukuna na iVolatabu: “Sa tu na vuku vei ira na qase; kei na yalomatua vei ira sa vuqa na nodra siga.”​—Jope 12:12.

Vakaliuliu

Ke o via kilai rau vinaka nomu itubutubu, cava mo cakava? Raica mada eso na vakatutu qo.

Digia na ituvaki veiganiti. E sega ni tukuni me dua sara na ituvaki matau me caka kina na veivosaki. Saga mo veivosaki ena ituvaki veiganiti. E rawa ni dou qito vata, cakava vata e dua na itavi, taubale se gade vata ena dua na vanua. “Au dau veitalanoa vinaka kei rau noqu itubutubu ena gauna keitou vodo motoka kina vakabalavu ni keitou gade,” e kaya o Cody, e tukuni taumada. “Dina niu rawa ni vakarogo sere se moce tu ga, ia e yaga sara ga vakalevu noqu dau vakaliuliu ena veivosaki!”

Dau taro. Nanuma tiko: Ni basika na ituvaki veiganiti ena rairai sega ni vakamacalataka sara vakadodonu vei iko o Na na imatai ni gauna a domona kina e dua, se sega ni tukuna beka o Ta nona vakacacana nodratou motoka vakavuvale. Ia ena rawa ga ni rau tukuna ke o taroga! Me baleta eso na ka o rawa ni taroga, raica na kato ena tabana e 12.

Mo yalorawarawa. E dau tini ga ina dua tale na ulutaga se italanoa na isau ni dua na taro. O na rairai vinakata me kua ni tiva na veivosaki, ia kua ni cakava qori! Nanuma tiko ni o sega ni via kila wale ga eso na itukutuku. E nomu inaki ga mo kilai rau vinaka. Koya gona, na sala vinaka duadua e rawa ni caka kina qori, oya na nomudou veivosakitaka na ka e bibi vei rau.​—Filipai 2:4.

Mo yalomatua. “Na loma ni tamata e vaka e dua na tovure titobu, na tamata vuku ena takiva mai.” (Vosa Vakaibalebale 20:​5, Today’s English Version) E bibi na yalomatua kei na vuku mo uqeti rau kina nomu itubutubu mo dou veitalanoataka eso na ka ena dredre toka mo dou veivosakitaka. De o na via kila eso na vakatulewa cala a cakava o Ta ena gauna se gone kina vakataki iko. Ena duidui vakacava na nona vakatulewa ke lesu ina gauna ya. Ia ni bera ni o kaya tale e dua na ka, de vinaka mo taroga, “Au via taroga tiko e dua na ka . . .”

Lewa matau. Ke rau tukuna na nomu itubutubu eso na ka baleti rau, mo ‘kusarawa na vakarorogo, mo berabera ni cudru.’ (Jemesa 1:​19) Nanuma mo kua ni vosa vakaviavialevu se vakalialiai rau ena ka erau se qai tukuna ga. Na vosa me vaka na “Sa yawa! Au sega ni vakabauta ni o cakava ya!” se “Ya na vuna e dau kaukaua kina nomu vakavulici au!” ena rairai tagutuva na veivosaki. Se o lai tukuna tale vei ira eso na veika e baleti kemudou.

E Sega ni Bera!

Na vakatutu era volai toka qo e yaga ena nomu vakavinakataka nomu kilai rau nomu itubutubu ni o se tiko e vale. Ia vakacava ke dou sa veiyawaki? Na vakatutu qori ena yaga tale ga ena nomu saga mo volekati rau nomu itubutubu, se mo volekata kina e dua vei rau drau dau rairai veiyawaki. Qori a vakila o Jacob, e cavuti taumada. Dina ni sa tiko taudua, e kaya, “Au sa qai kilai Ta vinaka, au marautaka tale ga.”

Koya gona, ke o tiko e vale se o yawa mai kina, o se rawa ga ni kilai rau vinaka nomu itubutubu. Vakacava mo muria na vakatutu ena ulutaga qo.

Raica e levu tale na ulutaga ena “Young People Ask” ena Web site www.watchtower.org/​ype

[iVakamacala e ra]

ME VAKASAMATAKI

◼ Na tikina cava ena ulutaga qo o na via tarogi rau kina nomu itubutubu?

◼ O na kilai iko vinaka vakacava ena nomu kila e levu tale na ka baleti rau nomu itubutubu?

[Kato/​iYaloyalo ena tabana e 12]

Tarogi rau nomu itubutubu ena taro va qo:

VAKAWATI: O sota vakacava kei Na (se Ta)? Na cava e vakavuna nomudrau veitaleitaki? Drau a vakaitikotiko e vei ni oti nomudrau vakamau?

ISUSUSU: O a sucu i vei? O dau veivolekati kei ratou na tacimu kei na ganemu? Dau kaukaua beka nodrau veituberi na nomu itubutubu?

VULI: Na lesoni cava o taleitaka e koronivuli? Na lesoni cava o sega ni taleitaka? O cei na nomu qasenivuli taleitaki? Cava o taleitaki koya kina?

CAKACAKA SAUMI: Na cava na imatai ni nomu cakacaka? O taleitaka? Na cakacaka cava o na taleitaka mo cakava?

KA E TALEITAKA: Vanua cava o na via lako kina e vuravura? Na cakacaka cava o vinakata mo kila se vulica?

VEIKA VAKAYALO: O tuberi ena vuvale lotu vaKarisito? Ke sega, e uqeti iko vakacava na iVolatabu? Cava o vakatovolei kina ni o via muria na ivakavuvuli vakaivolatabu?

KA E VAKABIBITAKA: Na cava o nanuma me yavu dei ni veitokani vinaka? bula marau vakavuvale? bula vakawati vinaka qai mamarau? Na cava na ivakasala vinaka duadua o vakasalataki kina?

Tovolea mada qo: Digia eso na taro qo qai tovolea mo vakilakila na nodrau isaunitaro nomu itubutubu. Taro sara, veidutaitaka na nodrau isaunitaro kei na ka o nanuma ni rau na tukuna.

[iYaloyalo ena tabana e 11]

Kerei rau na nomu itubutubu me rau vakaraitaka eso na itaba se so tale na ka ena nodrau gauna. Qo e itekitekivu sara ga ni nomudou veitalanoa