Na Rai ni iVolatabu

Na Cava e Kaya na iVolatabu me Baleta Nodrau Bula Vata e Rua Erau Sega ni Vakamau?

O NA volia beka e dua na sote se vinivo ni bera ni o tovolea? E levu era na sega ni cakava qori. Ni o sa volia qai kila ni sega ni rauti iko, sa na maumau wale nomu gauna kei na ilavo.

E levu era raica va qori na vakamau. Era kaya ni vinaka cake me rau bula vata na tagane kei na yalewa ni bera ni rau veidinadinati me rau veiwatini. Era nanuma, ‘Ke sega ni lako vinaka, rau na tinia, rau qai sega ni vakaogai rau ena veika e vauca veisere ni levu na kena cakacaka qai saulevu.’

Eso era duavata kei na rai qo baleta nira raica nodra dau vakalolomataki na nodra itokani ena bula vakawati. Se ra raica na rarawa se mosimosi ni bula vakawati e sega kina na veilomani. Era nanuma kina ni ka vakavuku na nodra bula vata eliu o ira na sega ni vakamau.

Na cava na rai ni iVolatabu me baleta na tikina qo? Meda kila na kena isau, meda veivosakitaka mada eliu na ka e tukuna na Vosa ni Kalou me baleta na vakamau.

“Lewe Dua”

E raica vakabibi na iVolatabu na vakawati. E sega ni kurabuitaki qo baleta ni a tauyavutaka qai vakadonuya sara ga na ituvatuva qo na Kalou o Jiova. (Vakatekivu 2:21-​24) Ena ivakatekivu, a nakita o Jiova me rau “lewe dua” na tagane kei na yalewa ena bula vakamau. (Vakatekivu 2:24) Ni cavuta oti na tikinivolatabu qo o Jisu, e kuria: “Na ka sa vauca vata na Kalou, me kakua ni tawasea rua na tamata.”​—Maciu 19:6.

Eso na vakamau e tini ena veisere.a Ni yaco qori, e sega ni kena ibalebale ni leqa na ituvatuva ni vakamau, e baleta ga ni dua se o rau ruarua erau sega ni dina ena nodrau vosa ni bubului.

Kena ivakatautauvata: Rau taukena e dua na motoka e dua na tagane kei na dua na yalewa, ia rau sega ni maroroya me vaka e volai ena idusidusi ni kabani e bulia. Ke mani ca na motoka, ena bale vei cei? Na kabani a bulia, se o rau na volia, ni rau sega ni muria na idusidusi ni kena maroroi?

Na vakasama vata qori e vakaibalebale ena bula vakawati. Ena dredre me rau veisere na veiwatini ni rau vakavinakataka tiko na nodrau veiwekani, rau qai gumatua na muria na ivakavuvuli ena iVolatabu. Erau lomadei ni rau saga me dei nodrau veidinadinati. Ena yaco gona na bula vakawati me yavu ni nodrau veilomani vakaveiwatini.

‘Ni Kua ni Veidauci’

Eso era nanuma: ‘Vakacava me rau bula vata mada eliu? Ke rau cakava qo, rau sa doka tiko kina na ituvatuva ni bula vakawati.’

Ia, e matata na ka e tukuna na iVolatabu. A vola o Paula: “Ni kakua ni dau veibutakoci [“veidauci,” NW].” (1 Cesalonaika 4:3, VV) Na “veidauci” e vakaibalebaletaka na veiyacovi ena taudaku ni bula vakawati. Ena okati kina nodrau veiyacovi e rua rau bula vata rau sega ni vakamau, dina ni rau lalawataka me rau na vakamau. Koya gona, na iVolatabu e vakacala na vakasama me rau bula vata e rua, dina ni rau na lalawataka me rau vakamau.

E makawa beka na rai ni iVolatabu? Eso era nanuma ni vaka kina. Sa ivakarau tu ni bula ena levu na vanua me rau bula vata e rua​—eso e nodra inaki mera qai vakamau, so tale e sega. Ia, na cava sa vakadinadinataki? Era marautaka beka nodra bula vakavuvale o ira na bula vata ni bera nodra vakamau? Era marau cake ni vakatauvatani kei ira na vakamau? Era dau yalodina tiko ga ni oti nodra vakamau? Na vakadidike e caka e vakaraitaka na kena veibasai. Io, o ira na bula vata ni bera nodra vakamau e levu cake na leqa era sotava qai lai tini ena veisere.

Eso na kenadau era na kaya ni sega ni dina na vakadidike va qori. Me kena ivakaraitaki, e kaya e dua na vuniwai ni mona ni duidui kedra ituvaki o ira na bula vata eliu kei na kedra ituvaki o ira na vakamau eliu. E kaya o koya ni duidui qo e vakatau kina na iwiliwili ni veisere, sega ni nodra bula vata eliu ni bera nodra vakamau. Mai na nona rai, e bibi ga na “kena dokai na bula vakawati.”

Ke dina mada ga na vakasama qori, e vakaraitaka ga ni bibi me tiko vei keda na rai ni Kalou me baleta na vakamau. E kaya na iVolatabu: ‘Meda doka kece na tiko vakawati.’ (Iperiu 13:4, VV) Ni rau bubului na tagane kei na yalewa me rau lewe dua ga, oti rau doka na ituvatuva ni vakamau, ena sega ni tagutuvi rawarawa nodrau veivolekati vakaveiwatini.​—Dauvunau 4:12.

Nida raica na ivakatautauvata ena itekitekivu ni ulutaga qo, e ka vakayalomatua dina noda tovolea rawa e dua na isulu ni bera nida volia. Ia, e sega sara ga ni veisemati kei na nodrau bula vata e rua. Na tikina bibi ga, oya meda kilai koya vinaka eda vakasamataka tiko me watida. E dau lecavi na tikina bibi qo, ia qo e dua na yavu ni bula vakavuvale mamarau.

[iVakamacala e ra]

BAU VAKASAMATAKA?

◼ Na cava e yalana kina na iVolatabu na veiyacovi vei rau ga na vakamau?​—Same 84:11; 1 Korinica 6:18.

◼ Na itovo cava soti mo raica vua na kemu isa?​—Ruci 1:16, 17; Vosa Vakaibalebale 31:10-​31.

[Kato ena tabana e 27]

“SAI VALAVALA CA KI NA YAGONA”

E kaya na iVolatabu: “Ko koya sa daudara [“veidauci,” NW] sai valavala ca ki na yagona.” (1 Korinica 6:18) Ena vicasagavulu na yabaki sa oti e vakadinadinataki kina na vosa qo, nira mate e vica na milioni ni tauvi ira na AIDS kei na so tale na matedewa ni veiyacovi. Ia, e sega ni yala ga e keri. E dau vakaraitaka na vakadidike nira dau lomabibi ra qai saga mera vakamatei ira na itabagone era dau veiyacovi. Na veiyacovi vakaveitalia e tini ina bukete e sala, ena so sara na ituvaki era uqeti kina na yalewa mera vakalutu. Ni vakasamataki na tikina kece qo, e rawa ni tukuni ni yaga tiko ga nikua na itovo savasava e vakabibitaki ena iVolatabu.